Nrauj Pojniam Uas Yog Lwm Haiv Neeg

1 Thaum Exaleyah thov thiab lees lub txim quaj thiab ntog rau ntawm (יחוח)Yahweh lub tuam tsev, muaj cov pej xeem coob coob, tsis hais pojniam, txivneej thiab menyuam tuaj hauv cov Ixayees tuaj rau ntawm nws.  Lawv kuj quaj mob siab kawg.

2 Mas Yehi‑ees tus tub Sekhaniyah uas yog Elas caj ces hais rau Exaleyah tias, peb tau ntxeev siab rau peb Tus Tswv lawm thiab yuav lwm haiv neeg hauv lub tebchaws no tej ntxhais. Txawm yog muaj li no los nimno cov Ixayees tseem muaj chaw vam.

3 Vim li no cia peb cog lus rau (יחוח)Yahweh tias peb yuav nrauj tej pojniam no huvsi thiab tej menyuam uas lawv yug, raws li yawg hlob, koj thiab cov uas paub ntshai (יחוח)Yahweh tej lus cob qhia. Cia ua raws li txoj kevcai lauj.

4 Cia li sawv tsees ua, vim yog koj li haujlwm, peb nrog koj koom tes, cia li ua khov kho thiab ua mus.  

5 Ces Exaleyah txawm sawv tsees thiab kom cov pov thawj hlob thiab cov Levis thiab cov Ixayees sawvdaws cog lus twv tias lawv yuav ua raws li tau hais tseg lawm. Lawv txawm cog lus twv.

6 Ces Exaleyah txawm txav ntawm (יחוח)Yahweh lub tuam tsev mus rau hauv Eliyasis tus tub Yahkanas chav. Thaum nws los rau hauv lawm, nws tsis noj ncuav, tsis haus dej, rau qhov nws quaj txog qhov uas cov uas poob tebchaws rov los ntawd ntxeev siab.

7 Muaj lus tshaj tawm mus thoob plaws Yahdah thiab Yeluxalees rau cov uas poob tebchaws rov los sawvdaws kom tuaj txoos ua ke rau hauv Yeluxalees.

8 Yog leejtwg tsis tuaj rau peb hnub ntawd raws li cov thawj thiab cov kev txwj laug hais mas yuav txeeb nws cuab txhiaj cuab tam huvsi thiab tus ntawd yuav raug muab txiav tawm hauv cov uas poob tebchaws rov los mus.

9 Yahdah thiab Npeeyamees cov txivneej sawvdaws tuaj txoos ua ke rau hauv Yeluxalees rau peb hnub ntawd, yog lub cuaj hlis, hnub tim nees nkaum. Cov pejxeem sawvdaws zaum rau hauv lub tshav puam hauv (יחוח)Yahweh lub tuam tsev. Lawv tshee hnyo rau tej no thiab qhov uas nag los hlob heev.

10 Mas tus pov thawj Exaleyah sawv tsees hais rau lawv tias, nej tau ntxeev siab thiab yuav lwm haiv neeg tej ntxhais ua pojniam, nej thiaj li tsav cov xayees lub txim loj tuaj.

11 Nimno nej cia li lees txim rau (יחוח)Yahweh uas yog nej tej poj koob yawm txwv Tus Tswv thiab ua raws li nws lub siab nyiam. Cia li cais nej tawm hauv lwm haiv neeg, hauv lub tebchaws no thiab tawm hauv cov pojniam uas yog lwm haiv neeg.

12 Ib tsoom pejxeem sawvdaws teb suab nrov hais tias, yog li koj hais, peb yuav ua raws li koj hais ntag.

13 Tiamsis cov pejxeem coob heev thiab yog lub caij nag los heev, peb nyob tsis taus ntawm tshav puam no.  Yuav tu kom tiav rau ib hnub ob hnub no tsis tau, vim peb twb ua txhaum tej no ntau heev lawm.

14 Thov cia peb cov thawj nyob cov pejxeem chaw tu tej no, thiab cia txhua tus uas nyob hauv peb tej moos uas tau yuav lwm haiv neeg ua pojniam tuaj raws li uas teem cia rau lawv, thiab cov kev txwj laug thiab cov uas tu plaub hauv txhua lub moos nrog lawv tuaj ua ke mus txog thaum uas peb Tus Tswv txojkev npau taws heev thim ntawm peb mus lawd.

15 Tsuas yog Axahees tus tub Yahnathas thiab Thivas tus tub Yaxeyah tawm tsam tej no xwb, thiab Mesulas thiab Sanpethais uas yog ib tug Levis tuaj nkawv tog.

16 Cov uas poob tebchaws rov los kuj ua raws li ntawd.  Mas tus pov thawj Exaleyah xaiv tsa cov thawj hauv txhua cum, ib cum ib tug, yog txhua tus uas twb hais npe lawm. Mas hnub xiab ib, lub kaum hli, lawv zaum tshuaj saib tej no,

17 mas thaum txog hnub xiab ib, lub ib hlis, lawv tshuaj saib txhua tus txivneej uas yuav lwm haiv neeg ua pojniam lawd tiav.  

18 Cov pov thawj caj ces uas yuav lwm haiv neeg muaj li no. Yahxadas tus tub Yahshua caj ces thiab nws cov kwvtij yog Ma‑axeyah, Eliyexaws, Yalis thiab Kedaliyah.

19 Lawv cog lus tias lawv yuav nrauj lawv tej pojniam tseg thiab lawv muab ib tug txiv yaj ua kevcai ntxuav lawv kev txaug kev txhaum.

20 Imaws caj ces yog Hananis thiab Xenpadiyah.

21 Halees caj ces yog Ma‑axeyah, Eliyah, Semayah, Yehi‑ees, thiab Uxiyah.

22 Pasaws caj ces yog Eeyahenais, Ma‑axeyah, Yisama‑ees, Nethanees, Yahxanpas thiab Elaxas.

23 Cov Levis yog Yahxanpas, Sime‑is, Khelayah (uas yog Khelithas), Pethahiyah, Yahdah thiab Eliyexaws.  

24 Cov uas hu nkauj yog Eliyasis.  Cov zov tej rooj loog yog Salus, Thelees thiab Ulis.

25 Thiab cov Ixayees mas Palaus caj ces yog Lamiyah, Ixiyah, Makhiyah, Miyamees, Ele‑axas, Makhiyah thiab Npenayah.  

26 Elas caj ces yog Mathaniyah, Xekhaliyah, Yehi‑ees, Adis, Yelemaus thiab Eliyah.

27 Xathus caj ces yog Eeyahenais, Eliyasis, Mathaniyah, Yelemaus, Xanpas thiab Axixas.

28 Npenpais caj ces yog Yahkanas, Hana-niyah, Xanpais thiab Athalais.

29 Npanis caj ces yog Mesulas, Malus, Adayah, Yasus, Se‑as thiab Yelemaus.   

30 Pahas Mau‑as caj ces yog Anas, Khelas, Npenayah, Ma‑axeyah, Mathaniyah, Npexalees, Npinu‑is thiab Manaxes.

31 Halees caj ces yog Eliyexaws, Isiyah, Makhiyah, Semayah, Sime‑oos,

32 Npeeya-mees, Malus thiab Semaliyah.

33 Hasus caj ces yog Mathenais, Mathathias, Xanpas, Elifeles, Yelemais, Manaxes thiab Sime‑is.  

34 Npanis caj ces yog Ma‑adais, Alav, U‑ees,

35 Npenayah, Npedeyah, Kheluhis,

36 Vaniyah, Melemaus Eliyasis,

37 Mathaniyah, Mathenais thiab Ya‑asais.

38 Npinu‑is caj ces yog Sime‑is,

39 Selemiyah, Nathas, Adayah,

40 Manadenpais, Sasais, Salais,

41 Axalees, Selemiyah, Semaliyah,

42 Salus, Amaliyah thiab Yahxej.  

43 Nenpaus caj ces yog Ye‑i‑ees, Mattithyah, Xanpas, Xenpinas, Yadais, Yahees thiab Npenayah.

44 Cov tibneeg no sawvdaws yuav lwm haiv neeg tej ntxhais ua pojniam, mas lawv muab tej pojniam menyuam ntawd nrauj huvsi.