Tej Lus Uas Hais Txog Thailab Thiab Xaidoos

1 Tej lus uas hais txog lub nroog Thail-ab. Tej nkoj txwg ntawm lub moos Thasis es, cia li quaj nyiav, rau qhov lub nroog Thailab raug muab tso tseg piam tag, tsis muaj vaj tse tsis muaj chaw nres nkoj. Thaum lawv tawm hauv Xaiplas tebchaws los lawv hnov tej xov ntawd. 2 Cov uas nyob raws ntug hiavtxwv es, nej cov tub lag tub luam hauv Xaidoos es, cia li nyob twjywm. Nej hla dej hiavtxwv mus los ua rau nej vam meej. 3 Nej hla dej ntau heev, mas tej uas nej tau yog tej qoob hauv lub moos Sihau, yog tej qoob uas sau ntawm tus dej Nai. Nej ua lag ua luam rau ib tsoom tebchaws. 4 Xaidoos es, koj yog lub chaw ruaj khov hauv hiavtxwv, cia li txaj muag los maj, rau qhov hiavtxwv twb hais lawm tias, kuv tsis tau mob plab thiab tsis tau yug menyuam, kuv tsis tau tu tej tub hluas ntxhais hluas. 5 Thaum tej xov no tuaj txog Iziv tebchaws, lawv yuav quaj lwj siab txog tej xwm txheej hauv Thailab. 6 Cia li hla mus rau lub moos Thasis. Cov tibneeg ntawm ntug hiavtxwv es, cia li quaj nyiav. 7 Lub nroog no sub tsis yog lub uas nej lomzem heev lov? Yog lub nroog uas yav thaum ub tsim los lawd, thiab yog lub uas txhais kotaw coj nws haiv neeg mus nyob lwm lub tebchaws deb.

8 Leejtwg npaj ua li no rau lub nroog Thailab? Yog lub nroog uas muab mom kub rau luag, thiab nws cov tub lag tub luam yog cov uas ua hlob, thiab cov uas txais nws li kev lag kev luam yog cov uas muaj koob meej hauv lub ntiajteb.

9 (יחוח)Yahweh uas muaj hwjchim loj kawg nkaus yog tus uas npaj tej no cia, kom thiaj li rhuav tshem lawv tej meej mom huvsi uas lawv khav theeb, thiab txo tau txhua tus uas muaj koob meej hauv ntiajteb. 10 Thasi tus ntxhais es, cia li laij nej daim teb ib yam li laij ntawm tus dej Nais, tsis muaj ib lub chaw nres nkoj li lawm. 11 (יחוח)Yahweh tsa hlo nws txhais tes rau saum hiavtxwv, nws co ib tsoom tebchaws ua zog, nws nkaw lus txog Khana‑as tebchaws kom muab tej chaw ruaj khov ua puam tsuaj tag. 12 Nws hais tias, Xaidoos tus ntxhais Dawbhuv uas raug quab yuam es, koj yuav tsis lomzem dua li lawm. Cia li sawv tsees hla mus rau Xaiplas tebchaws, txawm yog nyob qhov ntawd los koj yuav tsis muaj siab tus li. 13 Cia li saib cov Kheedias lub tebchaws nawj. Yog haiv neeg no, tsis yog cov Axilias, lawv hom lub nroog Thailab rau tsiaj qus nyob, lawv tib tej chaw siab vij ntaus lub nroog, lawv rhuav vajntxwv tej vaj tse pob tag huvsi, thiab muab lub nroog rhuav pob ua tej niag pawg. 14 Thasis tej nkoj txwg es, cia li quaj nyiav lauj, rau qhov koj lub chaw ruaj khov raug muab tso tseg piam tag lawm. 15 Lub sijhawm ntawd lawv yuav tsis nco qab Thailab xya caum xyoo, yam li ib tug vajntxwv hnub nyoog. Thaum dhau xya caum xyoo yuav muaj tshwm rau Thailab raws li cov poj muag cev hu nkauj hais tias, 16 Tus poj muag cev uas lawv tsis nco qab lawd es, cia li coj nkauj nog ncas mus thoob plaws lub nroog, cia li hu nkauj suab zoo zoo, cia li hu ntau zaj nkauj, xwv luag thiaj nco txog koj.

17 Thaum dhau xya caum xyoo lawm (יחוח)Yahweh yuav los xyuas lub nroog Thailab, mas Thailab yuav rov qab muag cev thiab deev ib tsoom tebchaws huvsi hauv lub qab ntuj. 18 Nws tej lag luam thiab nws tej nqe ntiav yuav muab pub kiag rau (יחוח)Yahweh, yuav tsis muab khaws cia lossis muab ceev cia. Nws tej lag luam yuav siv ua zaub mov nplua mias thiab tej tsoos tsho zoo nkauj rau cov uas nyob ntawm (יחוח)Yahweh lub xubntiag.