Tej Tsoos Meej Mom Uas Pov Thawj Hnav

1 Cia li coj koj tus tijlaug Aloos thiab nws cov tub uas yog Nadas, Anpihus, Ele‑axas thiab Ithamas, tawm hauv cov Ixayees tuaj cuag koj, lawv thiaj ua tau pov thawj ua kuv tes haujlwm.

2 Mas koj yuav tau xaws cev tsoos tsho meej mom dawb huv rau koj tus tijlaug Aloos hnav, nws thiaj tau koob meej thiab yuav zoo nkauj.

3 Koj hais rau txhua tus uas muaj peevxwm uas kuv tau pub tswvyim rau kom lawv ua Aloos tej tsoos tsho meej mom es thiaj tau tsa Aloos ua pov thawj los ua kuv tes haujlwm.

4 Lawv yuav tau ua tej tsoos ntawd raws li no, yog ib lub awv, ib lub tsho efauj, ib lub tsho ntev, ib lub tsho uas ntos txaij ua qhov muag, thiab txoj phuam uas ntoo saum taubhau, thiab ib txoj siv sia, mas lawv yuav ua tej tsoos meej mom dawb huv no rau koj tus tijlaug Aloos thiab nws cov tub hnav, es lawv thiaj tau ua pov thawj ua kuv tes haujlwm.

5 Kom lawv muab cov xov kub thiab xov xiav, xov tsamxem, xov liab, thiab xov maj uas nkoov zoo zoo los ua.

​

Lub Tsho Efauj

(Khiavdim 39:2-7)

6 Lawv yuav tau muab cov xov kub thiab xov xiav, xov tsamxem, xov liab thiab cov xov maj uas nkoov zoo zoo ntos ua lub tsho efauj zoo nkauj txaij nraug zees.

7 Ua ob pluaj ntaub khuam lub tsho efauj ntawm xub pwg, muab teem rau ob sab xub pwg tsho.

8 Txoj siv sia uas ntos zoo zoo uas muab xaws lo rau lub tsho efauj, yuav ua ib yam nkaus li lub tsho efauj. Muab cov xov kub thiab xov xiav, xov tsamxem, xov liab thiab cov xov maj uas nkoov zoo zoo ntos ua.

9 Muab ob lub qe zeb iav txho ci lam lug txaug Ixayees cov tub li npe rau hauv,

10 Mas txaug zuj zus tus hlob li npe ua ntej mus txog tus yau, ib lub qe zeb mas txaug rau lub npe rau.

11 Koj yuav txaug Ixayees cov tub li npe rau hauv ob lub qe zeb ntawd ib yam nkaus li txaug txwm, thiab muab xov kub qhaib ua ob lub tais kub txaij mos mos khawm ob lub qe zeb iav txho ci lam lug ntawd.

12 Muab ob lub qe zeb no xaws lo nkaus rau pluaj ntaub uas khuam lub tsho efauj ntawm ob sab xub pwg, ua lub chaw uas nco ntsoov Ixayees cov tub, mas Aloos yuav kwv lawv cov npe rau saum nws ob sab xub pwg ntawm (יחוח)Yahweh xubntiag, ua chaw nco ntsoov.

13 Muab xov kub qhaib ua ob lub tais txaij mos mos.

14 Muab cov tseem xov kub ntxias ua ob txoj saw thiab muab ob txoj saw khawm rau ob lub tais kub ntawd.

​

Lub Awv

(Khiavdim 39:8-21)

15 Koj yuav ua ib lub awv zoo nkauj txaij nraug zees uas siv txiav txim siab rau cov Ixayees. Muab xov kub thiab xov xiav, xov tsamxem, xov liab thiab cov xov maj uas nkoov zoo zoo ua ib yam nkaus li ua lub tsho efauj.

16 Ua lub awv xwm fab dav ib dos, ntev ib dos, thiab sab hauv khoob ua ib lub hnab.

17 Koj yuav muab qe zeb hlaws uas muaj nqis teem ua plaub leej rov ntav rau ntawm lub awv ntawd. Leej saum uas yog leej ib mas yog peb lub qe zeb, ib lub qe zeb liab tsim tseb, ib lub qe zeb daj pes lis, ib lub qe zeb ntsuab liab.

18 Leej uas ob mas yog ib lub qe zeb ntsuab txho, ib lub qe zeb phaithus tsamxem, ib lub qe zeb hlaws iav.

19 Leej uas peb mas yog ib lub qe zeb ntsuab xiav, ib lub qe zeb uas txho taws, ib lub qe zeb tsamxem zem ziv.

20 Leej uas plaub mas yog ib lub qe zeb ntsuab pes xiab, ib lub qe zeb iav txho ci lam lug thiab ib lub qe zeb daj tshiab tshiab. Mas muab cov xov kub qhaib ua kaum ob lub tais kub txaij mos mos khawm cov qe zeb ntawd.

21 Kaum ob lub qe zeb hlaws ntawd, yuav tau muaj Ixayees cov tub tej npe txaug rau hauv.  Txhua lub qe zeb hlaws yuav tau txaug kom zoo ib yam li lub cim nrog rau kaum ob lub npe uas yog cov Ixayees kaum ob xeem.

22 Muab cov tseem xov kub ntswj ua ib txoj saw kheej zoo li txoj hlua tis rau lub awv.

23 Muab kub ua ob lub ntsej mas muab tis rau ob lub kaum awv.

24 Muab ob txoj qab saw kub los khawm rau ob lub ntsej ntawm ob lub kaum awv,

25 Thiab muab ob yav qab saw saum tis rau ob lub tais kub txaij mos mos uas muab lo rau lub tsho efauj ntawm ob sab xub pwg sab xubntiag.

26 Muab kub ua ob lub ntsej tis rau ob lub kaum awv hauv qab sab hauv uas npuas lub tsho efauj.

27 Muab kub ua ob lub ntsej tis rau ob pluaj ntaub ntawm xub pwg ntawm lub tsho efauj sab xubntiag, ze kab lej leeg tsho ntawm txoj siv sia uas ntos zoo zoo sab saud.

28 Mas lawv yuav muab xov xiav ntswj ua ob txoj hlua khi ob lub ntsej awv sab hauv rau ob lub ntsej ntawm lub tsho efauj, lub awv thiaj nyob sab saum txoj siv sia uas ntos zoo zoo uas sia ntawm duav, thiaj tsis plam ntawm lub tsho efauj.

29 Thaum Aloos nkag mus rau hauv lub chaw dawb huv, nws thiaj muab Ixayees cov tub tej npe uas nyob ntawm lub awv uas siv txiav txim siab rau cov Ixayees los coj rau ntawm nws hauv siab ua lub chaw rau (יחוח)Yahweh nco ntsoov mus li.

30 Koj yuav muab Ulis thiab Thumis tso rau hauv lub awv, mas Ulis thiab Thumis thiaj nyob ntawm Aloos hauv siab rau thaum nws mus rau ntawm (יחוח)Yahweh xubntiag. Aloos thiaj yuav ris qhov uas yuav txiav txim siab rau cov Ixayees rau ntawm nws hauv siab tab meeg (יחוח)Yahweh lub xubntiag mus li.

​

Lub Tsho Ntev Thiab Txoj Phuam

(Khiavdim 39:22-31)

31 Koj yuav muab xov xiav ntos ua lub tsho ntev phim lub tsho efauj. 

32 Ua lub tsho looj thiab muab lub ntsej tsho ntawd foob zoo zoo thiaj tsis ntuag.

33 Muab xov xiav, xov tsam xem thiab xov liab ua tej lub zoo li txiv ntsiav kws thiab ua tej lub tswb kub los dai quas cov txiv ntsiav kws ntawm lub qab tsho ntev ntawd.

34 Dai ib lub tswb quas ib lub txiv ntsiav kws, dai li no thoob plaws lub qab tsho ntev.

35 Thaum Aloos ua kuv li haujlwm mas nws yuav tau hnav lub tsho no, thiab thaum nws mus rau ntawm (יחוח)Yahweh xubntiag hauv lub chaw dawb huv thiab thaum nws tawm rov los mas yuav hnov cov tswb ntawd nrov, nws thiaj tsis tuag.

36 Koj yuav tau muab cov tseem kub los ua kom tau ib pluaj kub uas zoo txaij nraug zees sau zoo li ntau cim rau tus dawb huv uas yog (יחוח)Yahweh.

37 Thiab muab xov xiav ua hlua khi pluaj kub ntawd rau saum hau phuam sab ntawm hauv pliaj.

38 Aloos yuav tau coj pluaj kub ntawd rau ntawm nws hauv pliaj. Thaum cov Ixayees xyeem qhov txhia chaw ua kevcai dawb huv pub rau (יחוח)Yahweh es ua txhaum, los Aloos yuav ris lawv tej kev txhaum. Aloos yuav tau coj pluaj kub ntawd rau ntawm nws hauv pliaj mus li, (יחוח)Yahweh thiaj lees yuav lawv.

39 Muab xov maj uas nkoov zoo zoo ntos ua lub tsho txaij ua qhov muag, thiab muab xov maj uas nkoov zoo zoo ntos ua phuam, thiab ntos txoj siv sia thiab ua paj rau.

40 Ua cov tsho, cov siv sia thiab mom rau Aloos cov tub hnav, lawv thiaj tau koob meej thiab yuav zoo nkauj.

41 Muab tej tsoos meej mom no ua rau koj tus tijlaug Aloos thiab nws cov tub hnav es muab roj hliv ywg ua kevcai xaiv tsa lawv thiab tu kom lawv dawb huv rau kuv, lawv thiaj ua tau pov thawj ua kuv tes haujlwm.

42 Muab ntaub mag xaws cov ris luv uas ceg txog ntawm ncej qab xwb rau lawv hnav, thiaj npog tau lawv ceg ncau.

43 Aloo thiab nws cov tub yuav tau hnav cov ris no rau thaum uas mus rau hauv lub tsev ntaub sib ntsib, thiab thaum uas mus ua haujlwm ntawm lub thaj uas xyeem hauv lub chaw dawb huv kom thiaj tsis muaj txim, lawv thiaj tsis tuag. Qhov no yog txoj kevcai uas Aloos thiab nws caj ces yuav tau coj mus ib txhiab ib txhis li.