Muaj Caij Muaj Nyoog Rau Txhua Yam

1 Muaj caij muaj nyoog rau txhua yam, muaj sijhawm rau txhua yam uas tshwm los hauv lub qab ntuj. 2 Muaj caij yug thiab muaj caij tuag, muaj caij cog thiab caij dob yam uas cog. 3 Muaj caij muab tua thiab muaj caij kho kom zoo, muaj caij rhuav thiab muaj caij tsim dua tshiab. 4 Muaj caij quaj thiab muaj caij luag, muaj caij quaj ntsuag thiab muaj caij seev cev zoo siab. 5 Muaj caij muab pob zeb laim pov tseg thiab muaj caij sau los ua ke, muaj caij sib puag thiab muaj caij tso tseg tsis puag. 6 Muaj caij nrhiav thiab muaj caij ua kom ploj, muaj caij khaws cia thiab muaj caij tso pov tseg. 7 Muaj caij muab dua, thiab muaj caij muab xaws, muaj caij nyob twjywm thiab muaj caij hais lus. 8 Muaj caij hlub thiab muaj caij ntxub, muaj caij ua rog thiab muaj caij nyob tiaj tus. 9 Tus uas ua haujlwm tau abtsi ntawm nws tes haujlwm? 10 Kuv pom tej haujlwm uas (יחוח)Yahweh muab rau tibneeg ua. 11(יחוח)Yahweh ua rau ib puas tsav yam zoo nkauj raws li nws lub caij lub nyoog. Nws muab qhov uas nyob mus ib txhis tsis kawg tso rau hauv tibneeg lub siab, tiamsis tibneeg tseem tsis txawj tshawb nrhiav tej uas (יחוח)Yahweh ua thaum chiv keeb chiv thawj mus txog thaum kawg. 12 Kuv paub lawm tias tsis muaj ib yam abtsi zoo dua li qhov uas tibneeg kaj siab thiab xyiv fab tag lawv sim neej. 13 Thiab paub tias qhov uas muaj noj muaj haus thiab tau kev zoo siab ntawm tej haujlwm huvsi uas ua, yog yam uas (יחוח)Yahweh pub rau tibneeg. 14 Kuv paub tias txhua yam uas(יחוח)Yahweh ua nyob ruaj mus ib txhis, thiab muab ib yam abtsi tsav ntxiv rau hauv kuj tsis tau, thiab muab ib yam abtsi rho tawm mus kuj tsis tau.

(יחוח)Yahweh tau ua li ntawd kom tibneeg thiaj li hwm thiab paub ntshai nws.

15 Yam uas nimno muaj kuj yog yam uas twb muaj tshwm los ua ntej lawm. Yam uas yuav muaj tshwm los kuj yog yam uas twb muaj tshwm los lawm. Thiab (יחוח)Yahweh tshawb nrhiav yam uas twb dua tag lawm.

16 Tsis tag li ntawd xwb, hauv lub qab hnub kuv tseem pom tias hauv lub chaw uas txiav txim ncaj tseem muaj kev ua phem, thiab hauv lub chaw uas ua ncaj ncees tseem muaj kev ua phem thiab. 17 Kuv thiaj xav hauv kuv lub siab tias, (יחוח)Yahweh yuav txiav txim rau cov uas ncaj ncees thiab cov uas ua phem, rau qhov nws twb teem sijhawm rau txhua yam thiab rau txhua tes haujlwm lawm.

18 Hais txog tibneeg mas kuv xav hauv kuv lub siab tias, (יחוח)Yahweh tabtom sim lawv kom thiaj qhia lawv paub tias lawv tsuas yog tsiaj txhu xwb. 19 Rau qhov tibneeg tej khuab thiab tsiaj txhu tej khuab kuj zoo ib yam nkaus. Ob co no puavleej txawj tuag ib yam nkaus. Ob co no yeej ua pa ib yam nkaus, thiab tibneeg tsis muaj ib yam abtsi zoo dua tej tsiaj txhu. Vim yog txhua yam qhuav qhawv xwb. 20 Txhua tus puavleej mus rau tib lub chaw. Txhua tus puavleej yog tshwm ntawm hmoov av los thiab txhua tus yuav rov mus ua hmoov av.

21 Leejtwg yuav paub tias tibneeg tus ntsuj plig mus rau saum ntuj thiab tsiaj txhu tus plig nqes mus rau hauv av los tsis mus? 22 Kuv thiaj pom tias tsis muaj ib yam abtsi zoo dua qhov uas nws zoo siab rau tej haujlwm uas nws ua vim yog nws li ntiag tug. Leejtwg yuav qhia tau rau nws paub tias abtsi yuav tshwm los ua nws qab?