1 Kuv pom muaj ib yam phem nyob hauv lub qab hnub, yam ntawd hnyav kawg rau tibneeg, 2 yog tus tibneeg uas Yahweh muab nyiaj txiag, qhov txhia chaw thiab meej mom pub rau nws thiaj tau txhua yam uas nws ntshaw tsis tu ncua ib yam kiag li, tiamsis (יחוח)Yahweh tsis pub nws tau siv tej ntawd, tiamsis luag lwm tus yuav tau siv. No kuj yog qhuav qhawv, yog kev nyuaj siab loj kawg.

3 Txawm yog leejtwg muaj ib puas tus menyuam thiab nyob ntau xyoo, nws lub caij lub nyoog uas nws muaj txojsia nyob ntev, tiamsis nws tsis muaj kev zoo siab ntawm tej yam uas zoo thiab nws tuag tsis muaj ntees, los kuv hais tias tus menyuam uas nchuav lawm tseem zoo dua tus ntawd. 4 Rau qhov tus menyuam ntawd yug los qhuav qhawv thiab tuag rau hauv qhov tsaus ntuj, thiab nws lub npe yeej muab npog rau hauv qhov tsaus ntuj lawm, 5 thiab yeej tsis tau pom lub hnub thiab tseem tsis tau paub ib yam abtsi li. Tus menyuam no tau so siab tus yees ntau dua tus ntawd. 6 Txawm yog nws ua neej nyob ib txhiab xyoo thiab tseem ntxiv ib npaug rau los tsis tau ib yam abtsi uas zoo. Txhua tus tsis yog nqes mus rau hauv tib qhov chaw lov?

7 Tibneeg tej haujlwm huvsi puavleej yog ua rau lub qhov ncauj xwb, txawm yog li ntawd los lawv tsis txawj tsau li.

8 Tus uas muaj tswvyim tau abtsi zoo dua tus uas tsis thoob tsib? Tus pluag uas paub xyaum zoo rau ntawm cov uas muaj txojsia nyob xubntiag tau abtsi thiab?

9 Pom ntawm lub qhov muag zoo dua li uas pheej ntshaw thiab mus nrhiav. No kuj yog qhuav qhawv thiab haus cua xwb. 10 Yam uas muaj nimno kuj yog yam uas teem cia lawm, thiab kuj paub tias tibneeg yog abtsi thiab lawv kuj tsis txawj nrog tus uas muaj hwjchim loj dua lawv sib cam. 11 Yim hais ntau kuj yimhuab qhuav qhawv ntau, mas yuav muaj qabhau abtsi rau tibneeg? 12 Thaum tibneeg tseem muaj txojsia nyob lub caij lub nyoog tsawg tsawg uas qhuav qhawv thiab dhau plaws yam li tus duab, leejtwg paub tias yam twg zoo rau tibneeg? Leejtwg hais tau rau tibneeg tias yam twg yuav tshwm los tom qab nws hauv lub qab hnub?