1 Leejtwg yuav zoo cuag li tus uas muaj tswvyim? Leejtwg yuav paub txhua yam lub ntsiab? Tibneeg lub tswvyim ua rau nws lub ntsej muag ci luag ntxhi, thiab ua rau nws lub plhu uas tuab hloov dua tshiab.

​

Yuav Mloog Vajntxwv Lus

2 Cia li ua raws li vajntxwv hais, vim yog tej lus tseem ceeb uas koj tau cog lus tseg lawm.

3 Tsis txhob maj tawm ntawm vajntxwv lub xubntiag. Thaum muaj xwm txheej tsis zoo, tsis txhob tawv ncauj, rau qhov vajntxwv yeej ua txhua yam raws li nws lub siab nyiam.

4 Vajntxwv tej lus muaj hwjchim, mas leejtwg yuav nug tau vajntxwv tias, koj ua abtsi li no?

5 Tus uas ua raws li vajntxwv hais yuav tsis raug ceeblaj, thiab tus uas muaj tswvyim lub siab yuav paub lub caij thiab paub kev ua haujlwm. 6 Txawm yog tibneeg txojkev ceeblaj ua lub nra hnyav rau lawv, los txhua yam nyias muaj nyias caij thiab nyias muaj nyias kev ua haujlwm. 7 Rau qhov lawv tsis paub tias abtsi yuav tshwm los, thiab leejtwg yuav hais rau lawv tias yam ntawd yuav tshwm los li cas? 8 Tsis muaj leejtwg yuav tav tau nws tus ntsuj plig, lossis muaj hwjchim kav hnub uas tuag. Nyob hauv tshav rog tsis pub leejtwg tawm tub rog. Txojkev ua phem yeej tsis tso tus uas raug muab cob rau hauv txojkev phem lawm. 9 Txhua yam no kuv twb pom rau thaum kuv tabtom kub siab lug rau txhua yam uas tibneeg ua hauv lub qab hnub, yog qhov uas ib tug muaj hwjchim kav ib tug, ua rau nws raug txom nyem.

10 Kuv pom lawv log cov tibneeg phem uas txeev mus los ntawm lub chaw dawb huv, thiab luag qhuas lawv rau hauv lub moos uas cov tibneeg phem ntawd ua phem ntag. No yog qhuav qhawv xwb. 11 Vim tias qhov uas txiav txim rau tej kev phem luag tsis txiav txim sai sai, mas tej tibneeg lub siab thiaj li huas qas ntshis mus ua phem. 12 Txawm yog cov tibneeg muaj txim ua phem ib puas zaus thiab lawv tseem muaj txojsia nyob, los kuv yeej paub tias cov uas hwm thiab paub ntshai (יחוח)Yahweh yuav tau zoo vim lawv paub ntshai rau ntawm nws lub xubntiag.

13 Tiamsis tus tibneeg phem yuav tsis tau zoo, nws lub hnub nyoog zoo yam nkaus li tus duab yuav tsis nyob ntev, rau qhov nws tsis paub ntshai rau ntawm (יחוח)Yahweh lub xubntiag. 14 Tseem tshuav ib yam qhuav qhawv uas ua hauv lub ntiajteb, yog qhov uas muaj cov ncaj ncees saws cov tsis ncaj lub khuab, thiab muaj cov tibneeg phem saws cov uas ncaj ncees lub khuab. Kuv hais tias qhov no kuj yog qhuav qhawv xwb. 15 Kuv pom zoo cia nrhiav kev zoo siab xyiv fab rau hauv peb lub neej, rau qhov hauv lub qab hnub tibneeg tsis muaj ib yam abtsi zoo dua qhov uas noj haus thiab muaj kev zoo siab xyiv fab. Vim tias qhov uas zoo siab xyiv fab yuav nrog nraim nws hauv nws tej haujlwm tag nws sim neej uas (יחוח)Yahweh pub rau nws hauv lub qab hnub. 16 Thaum kuv kub siab lug xav paub txog tswvyim thiab tej haujlwm uas ua hauv lub ntiajteb, thiab qhov uas lawv nyiaj dab ntub tag hnub tag hmo, 17 kuv thiaj pom (יחוח)Yahweh tes haujlwm huvsi, thiab pom tias tibneeg tsis nkag siab rau tej haujlwm uas ua rau hauv lub qab hnub. Tibneeg siv zog tshawb nrhiav npaum li cas, kuj nrhiav tsis tau. Txawm yog tus uas muaj tswvyim xav tias nws nkag siab, los nws kuj nrhiav tsis tau.