Ninaves Pob Tag​

1 Lub nroog uas lo ntshav raug txom nyem lauj! Yog lub nroog muaj kev dag thiab muaj tej qhov txhia chaw uas txeeb tau puv nkaus hauv, tsuas yog mus lws luag tsis tseg tsis tu li xwb.

2 Mloog saib, suab pas nplawm nees nrov nplaj, suab tsheb nees nrov dig dawg, nees khiav noj tuam pwm, tsheb nees khiav ya qas ntxiag.

3 Cov tub rog caij nees khiav npoj ntws ceev kawg li, hniav ntaj ci nplas, hauv hmuv ci hob. Tibneeg raug tua coob kawg, cev tuag tej niag pawg, cev tuag suav tsis txheeb, lawv dawm tej cev tuag.

4 Qhov no yog vim Ninaves ua niag poj muag cev tsis txawj pov khawv li, nws zoo nkauj ntxim siab txawj haub txawj ntxias txawj ua khaws koob rau luag qaug siab tuag rau nws tes. Nws muab nws lub cev muag ntxias tau ib tsoom tebchaws thiab ua khaws koob ntxias tau ib tsoom tibneeg ua qhev.

5 (יחוח)Yahweh  uas muaj hwjchim loj kawg nkaus hais tias, saib maj, kuv tawm tsam koj. Kuv yuav yaws koj daim tiab mus npog nkaus koj lub ntsej muag, kuv yuav cia ib tsoom tibneeg saib koj liab qab, kuv yuav cia ib tsoom tebchaws saib koj chaw txaj muag.

6 Kuv yuav muab tej niag kua lwj qias qas ntsuav laim rau koj. Kuv yuav saib tsis taus koj thiab ua rau sawvdaws thuam koj.

7 Txhua tus uas pom koj yuav cia li nkaum zog khiav rov qab. Lawv yuav hais tias, lub nroog Ninaves puam tsuaj tag do cuas li lawm. Leejtwg yuav quaj ntsuag nws? Yuav nrhiav leejtwg qhovtwg tuaj nplij tau nws?

8 Koj tseem zoo dua lub moos Thenpes uas nyob ntawm tus niag dej Nais lov? Muaj dej vij lub moos ntawd, thiab muaj dej hiavtxwv thaiv quas sab nraud, thiab muaj dej thaiv ua ntsa loog.

9 Khuj tebchaws thiab Iziv tebchaws yog nws lub zog loj kawg tsis txawj tag. Phuj tebchaws thiab Linpias tebchaws kuj pab nws thiab.

10 Txawm yog li ntawd los nws tseem raug muab kuav kiag mus poob tebchaws lawm. Nws tej menyuam kuj raug muab ntsawm ntsoog tag rau txhua txoj ncauj kev. Lawv muab cov uas muaj meej hauv lub moos ntawd rho ntawv saib leejtwg tau tus twg, cov uas ua hlob puavleej raug muab saw hlau khi.

11 Ninaves, koj yuav qaug cawv ua tus niag vwm loj vwm leg feeb tsis meej kiag li. Koj yuav mus nrhiav chaw cawm siav kom dim koj cov yeeb ncuab.

12 Koj tej chaw ruaj khov txhua lub zoo li tsob txiv cev uas txiv siav thawj phaum, yog diaj mas cov txiv yuav zeeg rau hauv tus uas noj lub qhov ncauj.

13 Saib maj, koj cov tub rog hauv nej nruab nrab tsuas zoo li tej niag pojniam xwb. Koj tej rooj loog twb qheb lug rau koj cov yeeb ncuab. Hluavtaws twb kub koj tej las rooj tag lawm.

14 Cia li nqa dej los cia, vim yeeb ncuab yuav tuaj vij. Kho koj tej chaw zov khuav kom ruaj khov. Cia li nqes kiag mus rau hauv lub niag qhov av nplaum thiab tuav kiag av nplaum, coj lub dab thwv cib tuaj.

15 Tiamsis hluavtaws yuav kub koj qhov ntawd thiab hniav ntaj hniav riam yuav txiav koj, yuav noj koj yam nkaus li menyuam kooj txig noj. Cia li huaj vam coob li kooj tshuab, cia li huaj vam coob li kooj txig.

16 Koj cov tub lag tub luam huaj vam coob yam nkaus li tej hnub qub saum nruab ntug. Lawv zoo yam li tej kooj txig uas noj nroj tsuag tag es nthuav tis kiag ya ploj ntais lawm.

17 Koj cov thawj zoo nkaus li cov kooj txig, koj cov nom tswv zoo nkaus li ib npoj kooj txig uas thaum tseem no ces dai ntawm tej ntsa laj kab, thaum hnub tuaj lawd ces ya tag nrho lawm tsis muaj leejtwg paub tias dua qhovtwg lawm. 18 Cov Axilias tus vajntxwv es, koj cov tibneeg yug yaj twb tsaug zog lawm, koj cov thawj twb mus ncaws dab ntub lawm. Koj cov pejxeem tawg ua sab ua sua rau pem tej roob, tsis muaj leejtwg qaws tau lawv los.

19 Koj qhov mob tsis ntaug kiag li, koj qhov kiav txhab mas sab kawg li kho tsis tau. Txhua tus uas tau hnov koj lub moo mas yuav npuaj teg luag koj. Muaj leejtwg txeev dim tau ntawm koj txojkev tsim txom uas tsis txawj tag li?