1 Tsis txhob khib cov tibneeg phem, tsis txhob ntshaw nrog lawv nyob ua ke,

2 rau qhov lawv lub siab ntaus tswvyim ua nruj ua tsiv, thiab lawv daim tawv ncauj hais tej lus uas yuav mus ua phem. 3 Siv tswvyim thiaj ua tau lub tsev, thiab muaj kev thoob tsib to nrog ua lub tsev nyob ruaj khov. 4 Thiab muaj kev txawj ntse thiaj ua rau tej chav tsev muaj cuab txhiaj cuab tam zoo zoo nkauj puv nkaus. 5 Tus uas muaj tswvyim muaj zog heev, tus uas txawj ntse kuj muaj zog tuaj. 6 Yog muaj cov txawj ntse qhia mas koj thiaj nqes tes ua zib tau, thiab muaj ntau leej ua chaw sablaj koj thiaj kov yeej.

7 Tswvyim nyob siab dhau tus ruam, ntawm lub rooj loog nws tsis rua qhov ncauj hais. 8 Tus uas ntaus tswvyim ua phem luag yuav hu tias tus thab plaub.

9 Qhov uas ntaus tswvyim ua tej yam ruam kuj txhaum, thiab tus uas thuam luag yog tus uas tibneeg ntxub kawg. 10 Yog koj poob siab nthav rau hnub uas koj raug ceeblaj, koj kuj tsis muaj zog.

11 Cia li cawm cov uas raug cab mus tua kom dim, cia li pab tus uas raug cab nrhaj nrhuj nrheev mus tua kom dim.

12 Yog koj hais tias, peb tsis paub zaj no li, mas (יחוח)Yahweh uas tshuaj saib lub siab yuav tsis pom lov? Tus uas zov rawv koj tus ntsuj plig tsis paub thiab lov? Nws yuav tsis pauj rau tibneeg raws li lawv tau ua los lawm lov? 13 Kuv tub es, cia li noj zib ntab vim yog yam uas zoo, thiab zib ntab uas nrog ntawm lub tsev ntab kuj qab zib heev. 14 Yuav tsum paub tias tswvyim zoo ib yam li ntawd rau koj tus ntsuj plig, yog koj tau tswvyim, koj lub hauv ntej yuav zoo thiab koj yuav tsis plam tej uas koj vam.

15 Tsis txhob zov tos nrhw ib yam li tej tibneeg limhiam uas yuav lws tus ncaj ncees lub tsev, tsis txhob ua nruj ua tsiv rau nws lub tsev, 16 rau qhov tus ncaj ncees txawm ntog xya zaus los tseem sawv los thiab, tiamsis tus tibneeg limhiam raug vij sub vij sw muab ntxuav pov tseg. 17 Tsis txhob zoo siab xyiv fab rau thaum koj tus yeeb ncuab ntog, thiab tsis txhob zoo siab rau thaum nws dawm, 18 ntshai tsam (יחוח)Yahweh pom ces yuav tsis txaus siab thiab nws yuav thim qhov uas nws npau taws rau koj tus yeeb ncuab. 19 Koj tsis txhob nyuaj siab rau tej tibneeg uas ua phem thiab tsis txhob khib cov uas ua limhiam, 20 rau qhov tus tibneeg phem tsis muaj lub hauv ntej zoo, thiab tus tibneeg limhiam lub teeb yuav raug muab tua. 21 Kuv tub es, cia li hwm thiab paub ntshai (יחוח)Yahweh thiab vajntxwv, tsis txhob nrog tej tibneeg uas fav xeeb ua ib lub siab, 22 rau qhov nkawv yuav ua vij sub vij sw tshwm los sai sai, mas leejtwg yuav paub tej kev puam tsuaj uas nkawv ua?

​

Tej Lus Ntuas Ntxiv

23 Tej lus no yog cov uas muaj tswvyim hais. Qhov uas saib dej ua ntu saib tibneeg ua plhu mas tsis zoo li. 24 Tus uas hais rau tus tibneeg limhiam tias, koj tsis txhaum, mas yuav raug tej pejxeem cem foom thiab raug tej tebchaws ntxub.

25 Tiamsis cov uas qhuab ntuas tus tibneeg limhiam yuav tau nyob kaj siab thiab yuav tau koob hmoov. 26 Tus uas teb lo lus tseeb mas zoo li nwj daim tawv ncauj. 27 Cia li npaj koj tej haujlwm sab nraud thiab ua txhua yam kom txhij hauv koj daim teb, dhau ntawd kuj ua koj lub tsev. 28 Tsis txhob lam ua timkhawv tom koj kwvtij zej zog uas tsis tau ua txhaum, thiab koj daim tawv ncauj tsis txhob dag. 29 Tsis txhob hais tias, kuv yuav ua rau nws yam li nws tau ua rau kuv lawm, kuv yuav ua pauj tej uas nws twb ua lawm. 30 Kuv hla hauv tus tub nkeeg daim teb thiab tus tsis thoob tsib lub vaj txiv hmab, 31 ua ciav pos tuaj puv nkaus, nroj tsuag tuaj ntom qas nti, thiab tej ntsa laj kab pob zeb pob tag. 32 Kuv pom thiab ua tib zoo xav, kuv ntsia ntsoov mas kuv thiaj tau kev qhuab qhia. 33 Tsaug ib nyuag tsig zog, ib nyuag qe muag, khawm tes so ib pliag,

34 mas txojkev pluag yuav los txog koj yam nkaus li tub sab tuaj lws, thiab kev txom nyem yuav los yam nkaus li tus coj ntaj coj riam tuaj lws.