Lub Raj Xyu Uas Tsib

1 Tus tubtxib saum ntuj uas tsib tshuab nws lub raj xyu, kuv txawm pom ib lub hnub qub poob saum ntuj los rau hauv ntiajteb, thiab muab tus yuam sij uas qheb lub niag qhov tob tob pub rau lub hnub qub ntawd.

2 Thaum nws qheb lub niag qhov tob tob ntawd, muaj pa taws tshwm hauv lub qhov ntawd tuaj zoo yam li tej pa ncho hauv lub qhov hluavtaws hlob hlob. Lub hnub thiab saum nruab ntug, kuj tsaus ntuj nti, vim cov pa ncho uas tawm hauv lub qhov ntawd. 3 Ib pab kooj txig txawm tawm hauv cov pa ncho ntawd, los rau hauv lub ntiajteb, thiab pub cov kooj ntawd muaj peevxwm ib yam li raub ris teb hauv ntiajteb, 4 tsis kheev cov kooj ntawd, ua phem rau tej nyom hauv ntiajteb lossis tej nplooj ntsuab, lossis tej xyoob ntoo, tiamsis ua phem rau cov tibneeg uas tsis muaj Abba (יחוח)Yahweh lub cim nias rau ntawm hauv pliaj xwb, 5 tsis kheev muab cov tibneeg ntawd, tua tiamsis muab tsim txom tsib lub hlis. Qhov uas lawv raug tsim txom ntawd, mob ib yam li thaum raub ris teb plev.

6 Ncua sijhawm ntawd, cov tibneeg yuav nrhiav txojkev tuag, tiamsis nrhiav tsis ntsib.

Lawv xav tuag tiamsis txojkev tuag yuav khiav ntawm lawv lawm. 7 Cov kooj txig ntawd, lub cev zoo ib yam li tej nees npaj txhij yuav ua rog. Saum lawv taubhau, muaj ib yam zoo li lub mom kub, thiab lawv lub ntsej muag zoo li tibneeg.

8 Lawv cov plaubhau zoo ib yam li cov pojniam, thiab lawv cov kaus hniav zoo ib yam li kaus hniav tsov ntxhuav.

9 Lawv muaj ib cov nplai zoo ib yam li daim hlau thaiv hauv siab. Lawv phab tis, lub suab nrov ib yam li tej tsheb nees coob coob dhia mus ua rog . 10 Lawv muaj kotw thiab muaj ple ib yam li raub ris teb, lawv tus kotw muaj hwjchim tsim txom tibneeg tsib lub hlis.

11 Lawv muaj tus tubtxib saum ntuj uas kav lub niag qhov tob tob, ua vajntxwv kav lawv.

Nws lub npe Hebrew hu ua Anpadoos, lus Greek hu ua Apauliyoos. 12 Thawj yam kev txom nyem dhau lawm. Saib maj, tseem tshuav ob yam kev txom nyem yuav los thiab.

Lub Raj Xyu Uas Rau

13 Tus tubtxib saum ntuj uas rau, txawm tshuab nws lub raj xyu, mas kuv hnov ib lub suab ntawm plaub tug kub uas nyob plaub ceg kaum thaj kub ntawm Abba (יחוח)Yahweh lub xubntiag tuaj 14 hais rau tus tubtxib saum ntuj uas rau uas tuav lub raj xyu hais tias, cia li tso plaub tug tubtxib saum ntuj uas raug khi rau ntawm tus niag dej loj Yufetis. 15 Ces plaub tug tubtxib saum ntuj txawm raug muab tso. Lawv twb npaj txhij rau teev twg, hnub twg, hli twg, xyoo twg, uas yuav tua tibneeg ib feem hauv peb. 16 Cov tub rog caij nees yog 200,000,000 leej. Kuv hnov lawv coob li ntawd. 17 Hauv zaj yog toog, kuv pom cov nees zoo li no. Cov uas caij nees hnav daim hlau thaiv hauv siab uas liab ploog li nplaim taws, thiab tsamxem li qe zeb phaithus, thiab daj li lawj faj. Cov nees lub taubhau, zoo yam li taubhau tsov ntxhuav, thiab muaj hluavtaws, pa taws, thiab lawj faj, tawm hauv lawv lub qhov ncauj los. 18 Tibneeg raug peb yam vij sub vij sw no tuag tag ib feem hauv peb, yog raug hluavtaws thiab pa taws, thiab lawj faj, uas tawm hauv cov nees qhov ncauj los tua.

19 Cov nees no, lub hwjchim nyob ntawm lawv lub qhov ncauj thiab ntawm lawv tus kotw. Lawv tus kotw zoo li tus nab muaj taubhau uas lawv siv ua phem rau tibneeg.

20 Cov tibneeg tseem tshuav nyob uas tsis raug tej vij sub vij sw no tua, lawv kuj tsis ntxeev dua siab tshiab ntawm tej uas lawv txhais tes ua, thiab tsis tseg qhov uas pe dab, thiab pe tej dab mlom nyiaj, dab mlom kub, dab mlom pob zeb, dab mlom ntoo, uas tsis txawj pom, tsis txawj hnov, tsis txawj mus kev. 21 Thiab lawv kuj tsis ntxeev dua siab tshiab ntawm qhov uas tua tibneeg, ua khawv koob, ua nkauj ua nraug, thiab ua tub sab.