Tus Hluas Nraug Hais:

1 Tus hluas nkauj uas zoo li poj vaj es, koj kotaw uas rau khau paj zoo nkauj ua luaj li. Koj ob txhais ncej qab kheej qas lam li lub pov haum uas tus Kws twb txhuam tau lawm. 2 Koj lub ntaws yog lub phaj uas ntim cawv txiv hmab uas tov lawm tsis tu li. Koj lub plab yog ib pawg mog muaj tej paj lilij nyob ib ncig.

3 Koj ob lub mis zoo yam nkaus li ob tug menyuam kauv seb ntxaib.

4 Koj lub caj dab zoo yam nkaus li lub chaw tsom faj uas muab kaus ntxhw ua. Koj ob lub qhov muag zoo yam nkaus tej pas dej hauv lub moos Hesanpoos uas nyob ntawm rooj loog Npalanpis. Koj caj ntswm zoo yam li lub chaw tsom faj hauv Lenpanoos uas saib rau nram lub nroog Damaxakas.

5 Koj lub taubhau zoo yam nkaus li lub hauv roob Khamees, koj cov plaubhau npws loo zoo yam nkaus li cov xov tsamxem, ua rau koj tus vajntxwv siab qaug lias.

6 Tus uas kuv nyiam es, tus hluas nkauj uas txaus kuv lub siab, koj zoo nkauj thiab raug muag kawg li.

7 Koj cev yiag ntxiag yam tsob toov laj thiab koj ob lub mis zoo yam nkaus li ob tauv txiv toov laj.

8 Kuv xav tias kuv yuav daum tsob toov laj ntawd, kuv yuav tuav rawv tauv txiv ntawd cia. Thov cia koj ob lub mis zoo nkaus li tauv txiv hmab, thiab thov cia koj tej pa tsw qab yam li txiv duaj, 9 thiab thov cia qhov uas koj nwj zoo yam li tej tseem cawv txiv hmab uas haus ntaug qas lees, ntws rau tej tawv ncauj thiab kaus hniav.

Tus Hluas Nkauj Hais

10 Kuv yog tus uas ntxim kuv siab li teej tug, thiab nws yeej ntshaw tau kuv kawg li.

11 Tus uas kuv ntxim siab, cia li los maj, cia wb ua ke mus tom teb, wb mus so hauv tej zej zog.

12 Cia wb sawv ntxov mus tom vaj txiv hmab, wb mus saib tej txiv hmab ua cos paj los tsis tau, saib tej txiv twb nra paj los tsis tau thiab saib tej txiv ntsiav kws tawg paj los tsis tau. Kuv yuav pub kuv txojkev nyiam rau koj qhov ntawd.

13 Tus uas kuv ntxim siab es, cov txiv lws duda‑is tsw qab ntxiag thoob plaws, thiab ntawm wb ob leeg qhov rooj muaj txhua yam txiv ntoo qab qab, muaj cov txiv qub thiab txiv tshiab uas kuv de cia rau koj.

​