Ixayees Fav xeeb

1 Hnub xiab kaum, lub tsib hlis, xyoo xya, Ixayees cov kev txwj laug qee leej tuaj nyob ntawm kuv xubntiag ua nug rau (יחוח)Yahweh. 2 Mas (יחוח)Yahweh hais lus tuaj rau kuv tias, 3 tibneeg tus tub, cia li hais rau Ixayees cov kev txwj laug, hais rau lawv tias, (יחוח)Yahweh hais li no tias, Qhov uas nej tuaj no yog tuaj ua nug rau kuv lov?

(יחוח)Yahweh hais tias, kuv yeej muaj txojsia nyob, mas kuv yuav tsis kheev nej tuaj ua nug rau kuv. 4 tibneeg tus tub, koj yuav txiav txim rau lawv, koj yuav txiav txim rau lawv ntag lov? Mas koj cia li qhia rau lawv paub txog tej uas lawv tej poj koob yawm txwv tau ua qias vuab tsuab lawm. 5 Thiab cia li hais rau lawv tias, (יחוח)Yahweh hais li no tias, Hnub uas kuv xaiv Ixayees, mas kuv cog lus khov kho rau Yakhauj caj ces.

Thaum lawv nyob hauv Iziv tebchaws, kuv qhia kuv rau lawv thiab kuv cog lus rau lawv tias, kuv yog (יחוח)Yahweh, yog nej Tus Tswv. 6 Hnub ntawd kuv cog lus khov kho rau lawv tias kuv yuav coj lawv tawm hauv Iziv tebchaws los mus rau lub tebchaws uas kuv nrhiav cia rau lawv lawm, yog lub tebchaws uas muaj kua mis thiab muaj zib ntab ntws nto, yog lub tebchaws uas zoo tshaj plaws lwm lub tebchaws huvsi. 7 Thiab kuv hais rau lawv tias, nej cia li muab tej yam uas kuv ntxub kawg tso pov tseg yog tej uas nej txhua tus liab muag qas khiav rau, thiab tsis txhob ua rau nej qias puas tsuas rau qhov uas nej pe hawm Iziv tej dab mlom.

Kuv yog (יחוח)Yahweh, yog nej Tus Tswv. 8 Tiamsis lawv tau fav xeeb rau kuv thiab tsis yeem mloog kuv lus. Lawv txhua tus tsis tso tej uas kuv ntxub kawg uas lawv liab muag qas khiav rau pov tseg, thiab lawv tsis tso Iziv tej dab mlom tseg. Kuv xav tias kuv yuav nchuav kuv txojkev npau taws los raug lawv thiab ua kuv txojkev chim raug lawv rau thaum lawv nyob hauv Iziv tebchaws mus txog kuv siab nqeg. 9 Tiamsis kuv tsis ua vim saib rau kuv lub npe kom thiaj tsis ua puas tsuas kuv lub npe rau hauv ib tsoom tebchaws uas lawv nyob, yog tej tebchaws uas kuv qhia lawv paub txog kuv lawm rau thaum uas kuv coj cov Ixayees tawm hauv Iziv tebchaws mus. 10 Yog li ntawd kuv thiaj coj lawv tawm hauv Iziv tebchaws thiab coj lawv los rau hauv tebchaws moj sab qhua. 11 Kuv muab kuv tej kab ke rau lawv thiab qhia kuv tej kevcai rau lawv paub, yog tibneeg coj tau li ntawd yuav muaj txojsia nyob.

12 Tsis tag li ntawd xwb, kuv tseem pub kuv hnub Sabbath rau lawv ua lub chaw cim rau lawv thiab kuv, kom lawv thiaj paub tias kuv uas yog (יחוח)Yahweh ua rau lawv dawb huv. 13 Tiamsis cov Ixayees tau fav xeeb rau kuv hauv tebchaws moj sab qhua. Lawv tsis ua raws li kuv tej kab ke thiab tsis yuav kuv tej kevcai uas yog tibneeg coj tau yuav muaj txojsia nyob. Lawv ua qias puas tsuas kuv hnub Sabbath heev. Kuv xav tias kuv yuav nchuav kuv txojkev npau taws los raug lawv hauv lub tebchaws moj sab qhua, thiab ua rau lawv tu noob nrho.

14 Tiamsis kuv tsis ua li ntawd vim xam pom rau kuv lub npe, kom thiaj tsis ua puas tsuas kuv lub npe rau hauv ib tsoom tebchaws, uas pom kuv coj cov Ixayees tawm hauv Iziv tebchaws mus. 15 Tsis tag li ntawd xwb, kuv tseem cog lus khov kho rau lawv hauv tebchaws moj sab qhua tias kuv yuav tsis coj lawv los rau hauv lub tebchaws uas kuv muab pub rau lawv, yog lub tebchaws uas muaj kua mis thiab muaj zib ntab ntws nto, yog lub tebchaws uas zoo tshaj plaws lwm lub tebchaws huvsi, 16 vim yog lawv tsis yuav kuv tej kevcai thiab tsis ua raws li kuv tej kab ke, thiab ua qias puas tsuas kuv hnub Sabbath vim lawv qaug siab rau lawv tej dab mlom. 17 Txawm li ntawd, los kuv lub qhov muag tseem khuvleej lawv, kuv tsis muab lawv ua kom puam tsuaj thiab tsis ua rau lawv tu noob nrho hauv tebchaws moj sab qhua. 18 Thiab kuv hais rau lawv tej tub ki hauv tebchaws moj sab qhua ntawd tias, tsis txhob ua raws li nej tej poj koob yawm txwv li kab ke thiab coj raws li lawv tej kevcai lossis pe hawm lawv tej dab mlom ua qias puas tsuas nej. 19 Kuv yog (יחוח)Yahweh, yog nej Tus Tswv. Nej cia li ua raws li kuv tej kab ke thiab ua tib zoo coj raws li kuv tej kevcai, 20 thiab hwm kuv hnub Sabbath ua hnub uas dawb huv kom thiaj ua tau lub chaw cim rau kuv thiab nej, nej thiaj paub tias kuv yog (יחוח)Yahweh, yog nej Tus Tswv.

21 Tiamsis nej tej tub ki kuj fav xeeb rau kuv. Lawv tsis ua raws li kuv tej kab ke, thiab tsis ua tib zoo coj raws li kuv tej kevcai uas yog tibneeg coj tau yuav muaj txojsia nyob, thiab lawv ua qias puas tsuas kuv hnub Sabbath. Kuv xav tias kuv yuav nchuav kuv txojkev npau taws thiab kuv txojkev chim los raug lawv hauv tebchaws moj sab qhua mus txog thaum kuv siab nqeg. 22 Tiamsis kuv tau nkaum kuv txhais tes, thiab kuv tsis ua li ntawd vim kuv saib rau kuv lub npe, kom thiaj tsis ua puas tsuas kuv lub npe rau hauv ib tsoom tebchaws, uas pom kuv coj cov Ixayees tawm hauv Iziv tebchaws mus. 23 Tsis tag li ntawd xwb, kuv tseem cog lus twv rau lawv hauv tebchaws moj sab qhua tias kuv yuav ua rau lawv tawg ri sua mus rau hauv ib tsoom tebchaws thiab khiav lawv mus nyob rau hauv luag tej tebchaws, 24 vim yog lawv tsis coj raws li kuv tej kevcai thiab tsis yuav kuv tej kab ke thiab ua qias puas tsuas kuv hnub Sabbath, thiab lawv lub qhov muag saib ntsoov rau lawv tej poj koob yawm txwv tej dab mlom. 25 Tsis tag li ntawd xwb, kuv thiaj muab tej kab ke uas tsis zoo thiab tej kevcai uas yog lawv ua raws li ntawd lawv yuav tsis muaj txojsia nyob.

26 Thiab kuv ua rau tej uas lawv coj tuaj xyeem qias puas tsuas lawv, vim kuv cia lawv muab tej menyuam uas yog tus hlob huvsi hlawv xyeem rau dab, kom kuv thiaj ua rau lawv ntshai kawg. Kuv ua li ntawd kom lawv thiaj paub tias kuv yog (יחוח)Yahweh. 27 Vim li no, tibneeg tus tub, cia li hais rau cov Ixayees thiab hais rau lawv tias, (יחוח)Yahweh hais li no tias, qhov no nej tej poj koob yawm txwv kuj ua tub qaug rau kuv dua thiab, yog ua fav xeeb rau kuv thiab. 28 Thaum kuv coj lawv los rau hauv lub tebchaws uas kuv cog lus cia tias kuv yuav muab pub rau lawv, thaum lawv pom lub roob siab twg thiab pom tsob ntoo nplooj ntsuab tsaus nti twg, lawv kuj muab tsiaj xyeem rau dab, thiab muab qhov txhia chaw xyeem rau qhov ntawd zes ua rau kuv chim. Qhov chaw ntawd lawv hlawv xyab thiab lawv hliv cawv txiv hmab xyeem. 29 Ces kuv thiaj nug lawv tias, Lub chaw siab uas teev dab uas nej mus ntawd yog abtsi? (Lawv thiaj hu lub chaw ntawd ua Npamas los txog niaj hnub nimno).

​

(יחוח)Yahweh Txiav Txim Thiab Txais Lawv Rov Los

30 Vim li no cia li hais rau cov Ixayees tias,    (יחוח)Yahweh hais li no tias, nej yuav ua qias puas rau nej ib yam li nej tej poj koob yawm txwv ua thiab raws lawv qab ua tej uas kuv ntxub kawg li lov? 31 Thaum nej muab qhov txhia chaw pub rau dab thiab muab nej tej tub hlawv xyeem rau dab, mas nej tej dab mlom huvsi ua rau nej qias puas tsuas los txog niaj hnub nimno. Au cov Ixayees es, nej tseem yuav ua nug rau kuv lov? (יחוח)Yahweh hais tias, kuv yeej muaj txojsia nyob, mas kuv yuav tsis kheev nej ua nug rau kuv kiag li. 32 Yam uas nyob hauv nej lub siab yuav tsis tshwm los, yog qhov uas nej xav hais tias, cia peb ua ib yam li ib tsoom tebchaws, ua ib yam li txhua haiv neeg hauv tej tebchaws, es mus pe hawm ntoo thiab pob zeb. 33 (יחוח)Yahweh hais tias, kuv yeej muaj txojsia nyob mas kuv yuav siv kuv txhais tes uas muaj hwjchim thiab kuv txhais npab uas tsa hlo, thiab nchuav kuv txojkev npau taws los, ua vajntxwv kav kiag nej. 34 Kuv yuav siv kuv txhais tes uas muaj hwjchim thiab kuv txhais npab uas tsa hlo, thiab nchuav kuv txojkev npau taws los, coj nej tawm hauv txhua haiv neeg los thiab qaws nej tawm hauv tej tebchaws uas nej tawg ri sua mus lawm los. 35 Thiab kuv yuav coj nej mus rau hauv tebchaws moj sab qhua uas yog ib tsoom tebchaws uas nej mus nyob, mas qhov chaw ntawd kuv yuav txiav txim rau nej tim ntsej tim muag. 36 Kuv txiav txim rau nej tej poj koob yawm txwv hauv tebchaws moj sab qhua ntawm Iziv tebchaws li cas, kuv yuav txiav txim rau nej ib yam li ntawd. (יחוח)Yahweh hais li no ntag.

37 Kuv yuav suav nej los chaws hauv kuv tus qab pas nrig thiab kuv yuav coj nej los yuav kuv tej lus cog tseg. 38 Kuv yuav rhuav tshem cov uas fav xeeb thiab cov uas ua txhaum rau kuv tawm hauv nej mus. Kuv yuav coj lawv tawm hauv lub tebchaws uas lawv khiav mus nyob hauv, tiamsis lawv yuav tsis tau los nyob hauv Ixayees tebchaws. Thaum ntawd nej yuav paub tias kuv yog (יחוח)Yahweh.

39 (יחוח)Yahweh hais li no tias, cov Ixayees es, yog nej tsis mloog kuv lus, mas nej txhua tus cia li mus ua koom tu nej tej dab mlom txij no mus. Tiamsis nej tsis txhob ua qias puas tsuas kuv lub npe uas dawb huv rau qhov uas nej xyeem qhov txhia chaw thiab pe hawm nej tej dab mlom dua li lawm.

40 (יחוח)Yahweh hais tias, saum kuv lub roob dawb huv, yog Ixayees lub roob siab, mas ib tsoom Ixayees sawvdaws yuav ua koom tu kuv hauv lub tebchaws. Kuv yuav txais yuav lawv qhov chaw ntawd, thiab kuv kom nej coj qhov txhia chaw tuaj pub thiab coj tej uas zoo kawg nkaus tuaj xyeem thiab coj tej uas tua xyeem ua yam uas dawb huv tuaj rau qhov ntawd. 41 Thaum kuv coj nej tawm hauv ib tsoom tebchaws thiab qaws nej tawm hauv tej tebchaws uas nej tawg ri sua mus nyob los, kuv yuav txais yuav nej ib yam li tej pa tshuaj tsw qab uas kuv txaus siab. Thiab yuav ua kuv txojkev dawb huv tshwm rau hauv nej nruab nrab tab meeg ib tsoom tebchaws. 42 Mas nej yuav paub tias kuv yog (יחוח)Yahweh rau thaum kuv coj nej los rau hauv Ixayees tebchaws uas kuv cog lus cia tias kuv yuav pub rau nej tej poj koob yawm txwv. 43 Qhov chaw ntawd nej yuav nco tej uas nej tau ua los lawm thiab txhua yam uas nej ua rau nej qias puas tsuas, mas nej yuav ntxub nej tus kheej vim tej kev phem uas nej tau ua ntawd. 44 Cov Ixayees es, thaum kuv ua rau nej vim kuv saib rau kuv lub npe, kuv thiaj tsis ua rau nej raws li nej tej kev phem thiab nej tej kev qias huvsi, thaum ntawd nej yuav paub tias kuv yog (יחוח)Yahweh. (יחוח)Yahweh hais li no ntag.

​

Rau Txim Rau Sab Tebchaws Nrad

45 (יחוח)Yahweh hais lus tuaj rau kuv tias, 46 tibneeg tus tub, cia li tsom ntsoov rau sab nrad, cia li piav rau sab tebchaws nrad, cia li cev lus tawm tsam lub hav zoov sab nrad. 47 Cia li hais rau lub hav zoov hauv Nekes tias, cia li mloog (יחוח)Yahweh tej lus.

(יחוח)Yahweh hais li no tias, saib maj, kuv yuav zes taws rau hauv koj, mas hluavtaws yuav kub txhua tsob ntoo ntsuab thiab txhua tsob ntoo qhuav hauv koj. Yuav tua tsis tau tej nplaim taws hlob ntawd li, thiab txhua lub ntsej muag tag nrho sab nrad mus txog sab ped yuav kub hiav tag. 48 Ib tsoom tibneeg yuav pom tias kuv uas yog (יחוח)Yahweh zes taws hlawv ntag, tsis muaj leejtwg tua tau li.

49 Kuv thiaj hais tias, Au (יחוח)Yahweh, lawv tabtom hais txog kuv tias, nws yog ib tug uas rhawv tej paj lug los tsis yog?