Tej Lus Hais Txog Cov Asmoos

1 (יחוח)Yahweh hais lus tuaj rau kuv tias, 2 tibneeg tus tub, cia li tsom ntsoov rau cov Asmoos thiab cev (יחוח)Yahweh tej lus tawm tsam lawv.

3 Cia li hais rau cov Asmoos tias, nej cia li mloog (יחוח)Yahweh tej lus, (יחוח)Yahweh hais li no tias, vim nej qw hnyos zoo siab rau thaum qhov chaw uas pe hawm kuv qias puas tsuas tag thiab Ixayees tebchaws raug muab tso tseg nyob do cuas thiab thaum cov Yahdah raug kuav tawm tebchaws lawm, 4 vim li no kuv yuav muab nej cob rau cov tibneeg uas nyob sab hnub tuaj ua lawv tug. Lawv yuav ua lub yeej rau tub rog nyob rau hauv nej nruab nrab thiab lawv yuav ua vaj ua tsev nyob hauv nej nruab nrab. Lawv yuav noj nej tej txiv ntoo thiab haus nej tej kua mis.

5 Kuv yuav ua rau lub moos Lanpas ua lub tshav zaub yug ntxhuav, thiab ua rau Asmoos tebchaws ua nkuaj yaj nkuaj tshis. Mas nej yuav paub tias kuv yog (יחוח)Yahweh.

6 (יחוח)Yahweh hais li no tias, vim nej npuaj teg ntaug taw zoo siab hnyos thiab ntxub Ixayees tebchaws kawg li, 7 vim li no, saib maj, kuv tsa kiag kuv txhais tes tawm tsam nej, thiab kuv yuav muab nej cob rau ib tsoom tebchaws lws nej, thiab kuv yuav muab nej txiav kom ploj tag rau hauv txhua haiv neeg thiab ua rau nej puam tsuaj tag rau hauv tej tebchaws. Kuv yuav ua rau nej puam tsuaj. Nej thiaj paub tias kuv yog (יחוח)Yahweh.

​

Tej Lus Hais Txog Mau-as

8 (יחוח)Yahweh hais li no tias, vim Mau-as thiab Xe-is hais tias, saib maj, cov Yahdah kuj zoo ib yam li txhua lub tebchaws xwb, 9 vim li no kuv yuav qheb kev rau luag ntaus Mau-as tej moos uas nyob ntawm ciam teb ua ntej, yog tej moos uas ua rau lub tebchaws tau koob meej, yog lub moos Npe Yesimaus thiab lub moos Npa‑ame‑oos thiab lub moos Khiliyathais.

10 Kuv yuav muab Mau-as tebchaws nrog cov Asmoos ua ke cob rau cov tibneeg uas nyob sab hnub tuaj ua lawv tug, xwv thiaj tsis muaj leejtwg nco txog cov Asmoos rau hauv ib tsoom tebchaws.

11 Thiab kuv yuav txiav txim rau Mau-as. Mas lawv yuav paub tias kuv yog (יחוח)Yahweh.

Tej Lus Hais Txog Edoos

12 (יחוח)Yahweh hais li no tias, vim Edoos tebchaws ua nruj ua tsiv ua pauj rau cov Yahdah thiab qhov uas ua pauj yog ua txhaum muaj txim loj, 13 vim li no (יחוח)Yahweh hais li no tias, kuv yuav tsa tes kiag tawm tsam Edoos thiab muab tibneeg thiab tsiaj txhu txiav tu nrho hauv lub tebchaws ntawd, kuv yuav ua rau lub tebchaws nyob do cuas. Txij ntua ntawm lub moos Themas mus txog lub moos Dedas lawv yuav raug hniav ntaj hniav riam tuag tag.

14 Thiab kuv yuav siv kuv haiv neeg Ixayees txhais tes ua pauj rau Edoos, mas lawv yuav ua raws li kuv txojkev chim thiab kev npau taws rau hauv Edoos tebchaws. Mas lawv yuav paub qhov uas kuv ua pauj. (יחוח)Yahweh hais li no ntag.

Tej Lus Hais Txog Cov Filixatees

15 (יחוח)Yahweh hais li no tias, vim cov Filixatees ua nruj ua tsiv ua pauj rau cov Yahdah thiab ua yeeb ncuab rau lawv tsis paub kawg li thiab ntxub lawv heev xav ua pauj kom puam tsuaj.

16 Vim li no, (יחוח)Yahweh hais li no tias, saib maj, kuv yuav tsa tes kiag tawm tsam cov Filixatees, thiab kuv yuav txiav cov Khelethis tu nrho thiab muab cov uas nyob raws ntug hiavtxwv ua kom puam tsuaj tag.

17 Kuv yuav ua pauj rau lawv loj kawg thiab yuav nplawm lawv ua npau taws heev. Mas lawv yuav paub tias kuv yog (יחוח)Yahweh rau thaum kuv ua pauj rau lawv.