1 Tibneeg tus tub, koj cia li cev (יחוח)Yahweh lus tawm tsam Kaus hais tias, (יחוח)Yahweh hais li no tias, kaus es, koj yog Meses thiab Thunpas tus thawj, kuv tawm tsam koj. 2 Kuv yuav ua rau koj tig rov qab thiab muab koj ntiab mus, thiab coj koj tuaj sab ped kawg nkaus tuaj, thiab coj mus tawm tsam Ixayees tej roob. 3 Mas kuv yuav ntaus koj rab hneev kom poob ntawm koj sab tes laug, thiab ua rau koj cov xub poob ntawm koj sab tes xis.

4 Koj yuav tuag rau saum Ixayees tej roob, koj thiab koj tej pab tub rog huvsi thiab tej haiv neeg uas koom nrog koj yuav tuag. Kuv yuav muab koj rau txhua yam dav thiab tsiaj qus noj. 5 Koj yuav tuag rau tom tej teb, rau qhov kuv hais cia lawm. (יחוח)Yahweh hais li no ntag. 6 Kuv yuav tso nplaim taws los raug Makau tebchaws thiab raug cov uas nyob tso siab plhuav ntawm ntug hiavtxwv. Mas lawv yuav paub tias kuv yog (יחוח)Yahweh. 7 Kuv yuav ua kuv lub npe dawb huv rau lawv paub rau hauv nruab nrab kuv haiv neeg Ixayees, thiab kuv yuav tsis kheev kuv lub npe uas dawb huv raug muab ua qias puas tsuas dua li lawm. Mas ib tsoom tebchaws yuav paub tias kuv yog (יחוח)Yahweh, yog tus Dawb Huv rau hauv cov Ixayees. 8 (יחוח)Yahweh hais tias, Saib maj, hnub ntawd tabtom los, yuav los tiag tiag li. No yog hnub uas kuv twb hais cia lawm. 9 Mas cov tibneeg uas nyob hauv Ixayees tej moos yuav tawm mus thiab muab lawv tej cuab yeej ua rog hlawv yog tej daim hlau loj thiab daim me uas tiv thaiv, tej hneev thiab tej xub, tej hmuv ntev thiab tej hmuv uas laim nkaug, los lawv yuav muab los ua taws rauv txaus xya xyoo. 10 Vim li no tsis txog lawv txiav taws tom teb lossis tom hav zoov, rau qhov lawv yuav muab tej cuab yeej ua taws rauv. Lawv yuav txeeb ntawm cov uas txeeb lawv li mus lawm rov los, thiab yuav lws ntawm cov uas lws lawv li lawm.

(יחוח)Yahweh hais li no ntag. 11 Hnub ntawd kuv yuav pub Kaus muaj toj ntxas rau hauv Ixayees tebchaws, yog ntawm lub hav uas tibneeg mus mus los los uas nyob ntawm hiavtxwv Tuag sab hnub tuaj, yuav ua chaw thaiv cov uas mus mus los los kev vim yog muab Kaus thiab nws cov tibneeg coob coob huvsi log rau qhov ntawd. Luag yuav hu tias, lub hav Hamookaus. 12 Cov Ixayees yuav muab lawv cov ntawd log xya lub hli thiaj li ntxuav tau lub tebchaws kom huv.

13 Txhua tus hauv lub tebchaws yuav muab lawv cov ntawd log. Lawv ua li ntawd lawv thiaj yuav tau koob meej rau hnub uas kuv ua kuv lub hwjchim ci ntsa iab tshwm los. (יחוח)Yahweh hais li no ntag. 14 Lawv yuav tsa ib co tibneeg mus mus los los thoob plaws hauv lub tebchaws tsis tu li, thiab muab cov tuag uas tseem tshuav nyob saum npoo av log, kom thiaj ntxuav tau lub tebchaws kom huv. Dhau xya lub hli ntawd lawm lawv li mus nrhiav.

15 Thaum cov tibneeg ntawd mus nrhiav thoob plaws lub tebchaws yog leejtwg pom pob txha tibneeg, nws yuav rhais phua rau ntawm cov pob txha, mas cov uas log yuav tuaj muab coj mus log rau hauv lub hav Hamookaus. 16(Ib lub moos hu ua Hamaunas kuj nyob qhov ntawd. ) Lawv yuav ntxuav lub tebchaws kom huv li no. 17 Tibneeg tus tub, (יחוח)Yahweh hais li no tias, cia li hais rau txhua yam nas noog thiab tej tsiaj qus huvsi tias, cia li sau zog tuaj ua ke, cia li tuaj txhua qhov tuaj, tuaj noj tej uas muab tua xyeem uas kuv tabtom npaj rau nej, yuav noj haus tej uas muab xyeem saum Ixayees tej roob, nej yuav noj nqaij thiab haus ntshav. 18 Nej yuav noj cov uas siab loj siab tuab li nqaij thiab haus cov thawj hauv ntiajteb li ntshav, ib yam li noj tej txiv yaj tej menyuam yaj thiab tej tshis tej txiv nyuj, uas puavleej yog tsiaj rog rog hauv Npasas tebchaws.

19 Nej yuav noj roj kom tsau npo thiab haus ntshav kom qaug rau thaum uas nej noj haus tej uas muab xyeem yog tej uas kuv npaj rau nej. 20 Nej yuav noj nqaij nees thiab cov uas caij nees thiab tej uas siab loj siab tuab thiab txhua yam tub rog tsau npo rau ntawm kuv rooj mov. (יחוח)Yahweh hais li no ntag. 21 Kuv yuav ua rau kuv lub hwjchim ci ntsa iab tshwm rau hauv ib tsoom tebchaws, thiab txhua lub tebchaws yuav pom tej uas kuv txiav txim rau lawv thiab pom kuv txhais tes uas ntaus lawv. 22 Txij hnub ntawd mus cov Ixayees yuav paub tias kuv yog (יחוח)Yahweh uas yog lawv Tus Tswv. 23 Mas ib tsoom tebchaws yuav paub tias cov Ixayees raug muab ntes coj mus poob tebchaws vim yog tim lawv tej kev phem. Yog vim lawv fav xeeb rau kuv, kuv thiaj fee plhu ntawm lawv thiab muab lawv cob rau hauv cov yeeb ncuab txhais tes, thiab lawv sawvdaws raug hniav ntaj hniav riam tuag. 24 Kuv ua rau lawv raws li lawv tej kev phem kev qias thiab raws li lawv tej kev fav xeeb, thiab kuv fee plhu ntawm lawv.

25 Yog li no (יחוח)Yahweh hais li no tias, nimno kuv yuav ua rau Yakhauj  rov vam meej li qub, thiab kuv yuav khuvleej cov Ixayees huvsi, thiab kuv yuav khib xeeb kuv lub npe uas dawb huv. 26 Thaum lawv nyob tso siab plhuav hauv lawv lub tebchaws tsis muaj leejtwg ua rau lawv ntshai, mas lawv yuav tsis nco qhov uas lawv raug txaj muag thiab tsis nco txhua yam uas lawv ua fav xeeb rau kuv lawm. 27 Thaum kuv tau coj lawv tawm hauv ib tsoom tibneeg los thiab tau sau zog hauv lawv tej yeeb ncuab tebchaws los, thiab thaum kuv ua kuv txojkev dawb huv tshwm rau hauv lawv rau ntau lub tebchaws pom, 28 mas lawv yuav paub tias kuv yog (יחוח)Yahweh uas yog lawv Tus Tswv, rau qhov kuv ntiab lawv poob mus nyob rau hauv nruab nrab ib tsoom tebchaws, thiab sau lawv rov los nyob hauv lawv lub tebchaws lawm. Kuv yuav tsis tso lawv ib tug tseg rau hauv tej tebchaws uas lawv mus nyob ntawd dua li lawm. 29 Thiab thaum kuv hliv kuv Tus Ntsuj Plig Dawbhuv rau saum cov Ixayees, kuv yuav tsis fee plhu ntawm lawv dua li lawm. (יחוח)Yahweh hais li no ntag .