Faib Tebchaws

1 Thaum koj faib tebchaws rau lawv ua lawv tug, koj yuav rho ib thaj av ntev ob vam tsib txhiab tshim dav ob vam tshim pub rau (יחוח)Yahweh ua thaj uas dawb huv. Yuav dawb huv thoob plaws thaj ntawd. 2 Hauv thaj no yuav muab tu ib thaj xwm fab xwm meem ntev tsib puas tshim dav tsib puas tshim ua qhov chaw uas pe hawm kuv, tseg sab nraud dav tsib caug tshim thoob plaws ib ncig. 3 Thaj uas dawb huv ntawd koj yuav ntsuas ib thaj ntev ob vam tsib txhiab tshim, dav ib vam tshim, mas lub chaw pe hawm kuv yuav nyob hauv nruab nrab thaj no, yog lub chaw uas dawb huv kawg nkaus.

4 Thaj ntawd yog thaj uas dawb huv hauv lub tebchaws, yog cov pov thawj uas ua haujlwm hauv lub chaw pe hawm (יחוח)Yahweh thiab tuaj ua num rau ntawm (יחוח)Yahweh lub xubntiag li chaw, ua lub chaw uas lawv ua vaj ua tsev thiab yog thaj dawb huv rau lub chaw pe hawm kuv. 5 Thiab muaj dua ib thaj ntev ob vam tsib txhiab tshim dav ib vam tshim ua cov Levis uas ua haujlwm rau hauv lub tuam tsev li tug uas yuav ua tsev ua moos nyob. 6 Ti nkaus thaj av uas tu ua thaj dawb huv ntawd, koj yuav tseg ib thaj dav tsib txhiab tshim ntev ob vam tsib txhiab tshim ua lub nroog, yog cov Ixayees sawvdaws li tug. 7 Ob thaj av uas nyob ob sab ntawm thaj uas dawb huv thiab ob sab ntawm thaj uas yog lub nroog li, yog tus thawj li tug, yog thaj uas npuas thaj uas dawb huv thiab npuas lub nroog sab hnub poob thiab thaj uas npuas sab hnub tuaj, ntev mus txog ntua sab hnub poob ciam teb thiab ntev mus txog ntua sab hnub tuaj ciam teb, npaum li uas ib thaj uas tu rau ib lub xeem. 8 Ob thaj no yuav ua tus thawj li tug, xwv kuv cov thawj thiaj tsis quab yuam kuv haiv neeg dua li lawm, tiamsis lawv yuav tsum cia cov Ixayees tau lub tebchaws ua lawv tug raws li lawv xeem.

9 (יחוח)Yahweh hais li no tias, Ixayees cov thawj es, cia li txaus los maj. Cia li tso kev ua nruj ua tsiv thiab kev quab yuam tseg es txiav txim ncaj thiab ua ncaj ncees. Cia li tseg qhov uas ntiab kuv haiv neeg tawm hauv lawv thaj av mus. (יחוח)Yahweh hais li no ntag. 10 Nej yuav tsum muaj rab teev ncaj thiab efas thiab npas ncaj. 11 Efas thiab npa yuav tsum luj sib luag zos, ib haumaws muaj kaum npas, ib haumaws kuj muaj kaum efas, haumaws yuav tsum yog lub thoob luj uas ruaj khov. 12 Ib sekhees yuav tsum muaj nees nkaum kelas, thiab nej li ib minas yuav tsum muaj rau caum sekhees

​

Tej Uas Muab Xyeem Thiab Tej Kevcai

13 Ntawm no yog tej uas nej yuav tsum muab xyeem. Ib haumaws mog yuav muab ib feem hauv rau caum pub, ib haumaws qeb yuav muab ib feem hauv rau caum pub. 14 Tej roj uas yuav tsum xyeem, mas ib khaulas yuav pub ib feem hauv ib puas, (ib khaulas muaj kaum npas, ib yam li ib haumaws muaj kaum efas). 15 Ob puas tus yaj kuj muab ib tug xyeem. Txhua yim Ixayees yuav ua li no. No yog tej uas muab xyeem ua kevcai xyeem qoob loo, thiab tej uas ua kevcai hlawv xyeem thiab tej uas ua kevcai xyeem sib raug zoo, kom thiaj li ntxuav tau lawv kev txhaum txim. (יחוח)Yahweh hais li no ntag. 16 Tej pejxeem sawvdaws hauv lub tebchaws yuav pub tej no rau Ixayees tus thawj. 17 Tus thawj yog tus uas yuav tsum npaj tej uas hlawv xyeem thiab tej qoob loo uas xyeem thiab tej cawv txiv hmab xyeem rau thaum uas ua tej kevcai teem tseg, thiab thaum hli xiab thiab hnub Sabbath, yog txhua txoj kevcai uas teem cia rau cov Ixayees ua. Nws yuav tsum npaj tej uas ua kevcai xyeem daws txim thiab tej qoob loo xyeem thiab tej uas hlawv xyeem thiab tej uas ua kevcai xyeem sib raug zoo, kom thiaj ntxuav tau cov Ixayees tej kev txhaum txim.

18 (יחוח)Yahweh hais li no tias, hnub xiab ib lub ib hlis koj yuav tsum muab ib tug thav nyuj uas tsis muaj chaw thuam li, thiab koj yuav ua kevcai ntxuav qhov chaw uas pe hawm kuv. 19 Tus pov thawj yuav muab tus tsiaj uas xyeem daws txim tej ntshav ib qho los pleev tej npuab rooj ntawm lub tuam tsev thiab pleev plaub lub kaum thaj thiab pleev tej npuab rooj ntawm tej qhov rooj uas mus rau hauv lub tshav puam sab hauv. 20 Hnub xiab xya lub hli ntawd koj yuav tsum ua ib yam li ntawd rau ib tug twg uas tsis paub es yuam kev mus ua txhaum, kom thiaj ntxuav tau tej kev phem kev qias hauv lub tuam tsev. 21 Lub ib hlis hnub xiab kaum plaub, nej yuav tsum ua kevcai Hla Dhau thiab noj tej ncuav uas tsis xyaw keeb kom tag xya hnub. 22 Hnub ntawd tus thawj yuav muab ib tug thav nyuj los ua kevcai daws nws thiab cov pejxeem sawvdaws hauv lub tebchaws li txim. 23 Thiab xya hnub uas ua kevcai Hla Dhau ntawd, nws yuav npaj xya tus thav nyuj thiab xya tus txiv yaj uas tsis muaj chaw thuam li los ua kevcai hlawv xyeem rau (יחוח)Yahweh txhua hnub, thiab npaj ib tug txiv tshis los ua kevcai xyeem daws txim txhua hnub kom puv xya hnub. 24 Nws yuav npaj tej hmoov uas ua kevcai xyeem qoob loo los, ib efas nrog ib tug thav nyuj thiab ib efas nrog ib tug txiv yaj, thiab ib hee roj nrog ib efas hmoov.

25 Lub xya hli hnub xiab kaum tsib uas ua kevcai nyob tsev pheeb suab, nws yuav npaj ib yam nkaus li ntawd kom puv xya hnub, yuav npaj tej uas ua kevcai xyeem daws txim thiab tej uas hlawv xyeem thiab tej uas ua kevcai xyeem qoob loo thiab tej roj.

​