Ua Yog Toog Pom Kev Phem Kev Qias Hauv Yeluxalees

1 Hnub xiab tsib, lub rau hli, xyoo rau, thaum kuv zaum hauv kuv tsev thiab Yahdah cov kev txwj laug nrog kuv nyob ua ke, (יחוח)Yahweh txhais tes los rau saum kuv, hauv qhov chaw ntawd.

2 Ces kuv saib mas ua ciav pom ib yam zoo li ib tug tibneeg. Txij ntawm lub duav rov hauv mas pom muaj hluavtaws, txij ntawm duav rov saud mas pom ib yam ci nplas zoo li tej tooj dag uas ci heev. 3 Nws cev qhov uas zoo li txhais tes tuaj ntsiab kuv ib qais plaubhau, mas Tus Ntsuj Plig Dawbhuv muab kuv nqa kiag rau saum nruab nrab lub ntiajteb thiab lub ntuj, thiab coj kuv los txog Yeluxalees hauv zaj yog toog uas pom (יחוח)Yahweh ntawd, coj kuv los txog lub qhov rooj sab ped uas nkag rau hauv lub tshav puam sab hauv lub tuam tsev pe hawm (יחוח)Yahweh, yog lub chaw uas txawb tus dab mlom uas khib xeeb, uas ua rau (יחוח)Yahweh khib xeeb heev. 4 Ua ciav, Ixayees Tus Tswv lub hwjchim uas ci ntsa iab nyob qhov ntawd, yam nkaus li zaj yog toog uas kuv txeev pom nram tiaj. 5 Mas (יחוח)Yahweh hais rau kuv tias, tibneeg tus tub es, cia li tsa muag saib rau sab ped. Kuv thiaj tsa muag saib rau sab ped ua ciav muaj tus dab mlom uas khib xeeb nyob ntawm lub qhov rooj thiab lub thaj xyeem sab ped.

6 Thiab nws hais rau kuv tias, tibneeg tus tub, koj pom lawv ua abtsi los tsis pom? Twb yog qhov uas cov Ixayees ua qias vuab tsuab loj kawg li rau ntawm no, thiaj ua rau kuv khiav deb ntawm qhov chaw uas pe hawm kuv. Tiamsis koj tseem yuav pom tej kev qias vuab tsuab loj dua li no thiab.

7 Nws coj kuv los txog ntawm lub qhov rooj uas nkag rau hauv lub tshav puam, mas thaum kuv tsa muag saib ua ciav muaj ib kem ntawm phab ntsa rau hauv.

8 Mas nws hais rau kuv tias, tibneeg tus tub, cia li tho phab ntsa rau hauv. Thaum kuv tho phab ntsa rau hauv ua ciav muaj ib lub qhov rooj. 9 Mas nws hais rau kuv tias, cia li nkag mus maj, mus saib tej kev phem kev qias vuab tsuab uas lawv ua rau ntawm no. 10 Kuv thiaj li nkag mus rau hauv thiab saib ua ciav muaj tej duab thoob plaws ntawm phab ntsa, muaj txhua yam tsiaj txhu uas nkag hauv av thiab tej tsiaj uas ntxim ntxub kawg thiab cov Ixayees tej dab mlom huvsi.

11 Thiab muaj cov Ixayees tej kev txwj laug xya caum leej sawv ntsug ntawm tej dab mlom ntawd xubntiag, thiab pom Safas tus tub Ya‑axaniyas nrog lawv sawv ua ke ntawd. Txhua tus nyias tuav rawv nyias lub tais hlawv hmoov tshuaj tsw qab xyeem, ua pa ncho qas lug nce rau saud. 12 Mas nws hais rau kuv tias, tibneeg tus tub, koj pom tej uas cov Ixayees tej kev txwj laug ua hauv qhov tsaus ntuj, txhua tus nyias nyob hauv nyias chav uas muaj tej duab ntawd los tsis pom? Rau qhov lawv hais tias, (יחוח)Yahweh tsis pom peb li. (יחוח)Yahweh tso tebchaws no tseg lawm. 13 Nws hais dua rau kuv tias, koj tseem yuav pom tej uas lawv ua qias vuab tsuab loj dua li no thiab.

14 Nws txawm coj kuv los txog lub qhov rooj sab ped uas nkag rau hauv (יחוח)Yahweh lub tuam tsev, ua ciav muaj ib pab pojniam zaum quaj tus dab Thamub. 15 Mas nws hais rau kuv tias, tibneeg tus tub es, koj pom lawm lov? Koj tseem yuav pom tej kev ua qias vuab tsuab loj dua li no thiab.

16 Mas nws coj kuv nkag los rau hauv lub tshav puam sab hauv (יחוח)Yahweh lub tuam tsev. Ua ciav, ntawm lub qhov rooj nkag rau hauv (יחוח)Yahweh lub tuam tsev ntawm zaj qab khav thiab lub thaj xyeem ntu nruab nrab, muaj kwvlam nees nkaum tsib tug txivneej, tig nrob qaum rau (יחוח)Yahweh lub tuam tsev, tig xubntiag rau sab hnub tuaj tabtom pe hawm lub hnub rau sab hnub tuaj ntawd.

17 Mas nws hais rau kuv tias, tibneeg tus tub es, koj pom lawm lov? Qhov uas cov tibneeg Yahdah ua tej kev qias vuab tsuab uas lawv ua ntawm no yog ib qho me me xwb lov? Lawv tseem ua nruj ua tsiv puv nkaus lub tebchaws thiab ua rau kuv yimhuab chim. Saib maj, lawv tseem muab ceg ntoo los tib rau ntawm lawv qhov ntswg. 18 Vim li no kuv yuav ua npau taws heev rau lawv. Kuv lub qhov muag yuav tsis hlub li, kuv yuav tsis khuvleej kiag li. Txawm yog lawv hu nrov npaum li cas rau kuv lub qhov ntsej los kuv yuav tsis mloog lawv.