Tus Txom Nyem Tau Chaw Vam Khom

1 Kuv yog tus uas raug kev txom nyem nyuaj siab vim yog (יחוח)Yahweh txojkev npau taws rab nplawm. 2 Nws ntiab kuv mus thiab coj kuv mus rau hauv txojkev tsaus ntuj, uas tsis muaj qhov kaj kiag li. 3 Nws yeej tsa nws txhais tes nplawm kuv nplawm tag rov nplawm thiab tas hnub mus li. 4 Nws ua rau kuv cev nqaij daim tawv sem tag, thiab muab kuv tej pob txha lov. 5 Nws muab kuv xov kaw cia, thiab muab kev lwj siab kev txom nyem xov kuv cia. 6 Nws muab kuv yuam nyob qhov tsaus ntuj, ib yam li tus uas tuag ntev los lawm. 7 Nws xov laj kab vij kuv cia kuv thiaj dim tsis tau, nws muab saw hlau hnyav khi kuv cia. 8 Thaum kuv tsa suab taij hu thov nws pab, los nws tsis quav ntsej kuv tej lus thov. 9 Nws muab tej txhib zeb uas txhwm los thaiv kuv txhua txoj hauv kev, nws ua rau kuv txojkev nkhaus mus nkhaus los.  10 Nws zoo yam nkaus li tus dais uas zov tos kuv, thiab zoo yam nkaus li tus tsov ntxhuav uas zov kev tos.  11 Nws chua kuv tawm ntawm kuv txojkev thiab muab kuv dua ua tej dwb daim, nws ua rau kuv raug muab tso tseg nyob do cuas.  12 Nws nta nws rab hneev, thiab muab kuv ua daim phiaj rau nws rab xub.  13 Nws muab cov xub hauv nws lub raj tua chob rau hauv kuv lub siab.  14 Kuv thiaj ua lub chaw uas kuv haiv neeg sawvdaws luag, thiab ua zaj nkauj uas lawv hu thuam luag tas hnub tas hmo.  15 Nws ua rau kuv lwj siab kawg nkaus, thiab muab zaub iab zaub daw rau kuv noj dhuav tag.  

16 Nws muab tsig zeb rau kuv cov hniav zom thiab muab kuv nias rau hauv cub tshau.  17 Txojkev kaj siab lug raug muab rho ntawm kuv tus ntsuj plig lawm, kuv tsis nco qab tias kev zoo siab xyiv fab yog zoo li cas lawm.  18 Kuv thiaj hais tias, Kuv lub koob meej ploj tag lawm, thiab kuv txojkev vam rau (יחוח)Yahweh kuj ploj tag lawm.  19 Thov nco txog kuv tej kev txom nyem lwj siab thiab qhov uas raug khiav rau tom ub tom no, uas iab cuag li tej zaub iab zaub daw thiab tsib dais.  20 Kuv tus ntsuj plig pheej nco txog tej ntawd, thiab poob siab nthav.  21 Kuv rov nco txog li no, kuv thiaj muaj lub siab vam tuaj hais tias, 22 (יחוח)Yahweh txojkev hlub uas ruaj khov yuav tsis tu ncua, thiab nws tej kev khuvleej tsis muaj chaw kawg, 23 niaj tagkis rov muaj dua tshiab.  Koj txojkev ua ncaj uas tso siab tau yeej loj kawg.  

24 Kuv tus ntsuj plig hais tias, (יחוח)Yahweh yog kuv tug, vim li no kuv thiaj li vam ntsoov nws.  25 (יחוח)Yahweh yeej ua zoo rau cov uas tos rawv nws, thiab ua zoo rau tus ntsuj plig uas nrhiav nws.  26 Qhov uas zoo yog qhov uas ua siab ntev tos (יחוח)Yahweh txojkev cawm dim.  27 Qhov uas zoo yog qhov uas tibneeg kwv tus quab txij thaum yau los.  

28 Cia lawv nyob ib leeg ntsiag to rau thaum (יחוח)Yahweh muab tus quab rau lawv.  29 Cia lawv muab lub qhov ncauj twb nkaus rau hauv av, tej zaum tseem yuav muaj vam.  30 Cia lawv tig plhu rau tus uas ntaus lawv, cia lawv yeem raug luag thuam kawg nkaus.  

31 Vim tias (יחוח)Yahweh yuav tsis muab lawv pov tseg mus ib txhis.  32 Txawm yog nws ua rau raug kev lwj siab, los nws yuav khuvleej, raws li nws txojkev hlub ruaj khov uas muaj nplua mias.  33 Vim yog nws tsis muaj pluaj siab ua rau leejtwg raug kev txom nyem, lossis ua rau tibneeg raug kev ntxhov siab.  

34 Qhov uas muab cov tibneeg uas raug ntes thoob ntiajteb tsuj yuam rau hauv xib taws kuj yog, 35 qhov uas ntxeev tibneeg txojcai tab meeg ((יחוח)Yahweh tus uas loj dua ntais kuj yog, 36 qhov uas tu plaub tsis ncaj kuj yog, tej no (יחוח)Yahweh tsis pom lov?

37 Leejtwg yog tus uas hais thiab ua kom tiav, tsuas yog (יחוח)Yahweh tso ncauj thiaj ua tau xwb? 38 Qhov zoo thiab tej xwm txheej phem tsis yog tawm hauv (יחוח)Yahweh uas loj dua ntais lub qhov ncauj los lov? 39 Ua cas cov tibneeg uas tseem ciaj yuav yws txog qhov uas nws raug teem txim vim nws kev txhaum? 40 Cia peb tshuaj ntsuas saib peb lub neej thiab tig kiag rov los cuag (יחוח)Yahweh.  41 Cia peb muab peb lub siab thiab peb txhais tes tsa rau (יחוח)Yahweh uas nyob saum ntuj.  42 Peb tau fav xeeb thiab tawv nyom koj thiab koj tsis tau zam peb lub txim.  43 Koj muab koj txojkev chim los qhwv koj thiab caum peb, thiab muab tua tsis khuvleej li.  44 Koj muab huab los qhwv koj, kom peb tej lus thov thiaj txeem tsis tau mus txog koj.  45 Koj ua rau peb zoo yam nkaus li tej tshwj xuam thiab tej uas qias rau hauv nruab nrab ib tsoom tibneeg.  46 Peb tej yeeb ncuab sawvdaws qheb ncauj cem peb.  47 Txojkev txhawj kev ntshai thiab qhov ntuj los txog peb, thiab kev liamsim thiab kev puam tsuaj los raug peb.  48 Kuv lub qhov muag muaj kua muag ntws los ua ib tug niag dej, vim kuv haiv neeg tus ntxhais raug kev puam tsuaj.  49 Kuv tej kua muag ntws tsis tu, thiab ntws tsis so li, 50 mus txog thaum (יחוח)Yahweh tsa qhov muag saib saum ntuj tuaj.  51 Kuv lub qhov muag ua rau kuv lwj siab txog tej xwm txheej uas raug kuv lub nroog tej ntxhais sawvdaws.  52 Cov uas cia li ua yeeb ncuab rau kuv do do xwb, lawv caum kuv ib yam li caum noog.  53 Thaum kuv tseem ciaj sia lawv muab kuv laim rau hauv lub qhov taub thiab lawv pov pob zeb los tsuam kuv.  54 Dej nyab kiag kuv taubhau, kuv hais tias, kuv ploj tiag tiag li lauj! 55 Au (יחוח)Yahweh, kuv hu koj lub npe rau thaum kuv nyob hauv lub qhov tob tob.  56 Koj mloog kuv tej lus uas thov hais tias, thov tsis txhob ntsaws koj qhov ntsej rau tej lus uas kuv quaj thov koj pab.  57 Koj tuaj ze rau thaum uas kuv hu thov koj.  Koj hais tias, tsis txhob ntshai.  58 Au (יחוח)Yahweh, koj hais kuv tshaj plaub lawm, koj txhiv kuv txojsia.  59 Au (יחוח)Yahweh, koj pom qhov uas lawv ua txhaum rau kuv lawm, thov tu kuv tshaj plaub lauj! 60 Koj pom txhua yam uas lawv ua limhiam rau kuv lawm, thiab tej uas lawv ntaus tswvyim ua phem rau kuv huvsi.  61 Au (יחוח)Yahweh, koj hnov tej lus uas lawv thuam luag kuv, thiab tej uas lawv ntaus tswvyim ua phem rau kuv huvsi.  62 Tej uas kuv cov yeeb ncuab lub qhov ncauj hais thiab tej uas lawv ntaus tswvyim mas tawm tsam kuv tag hnub li.  63 Saib maj, tsis hais lawv zaum lossis sawv ntsug, lawv muab kuv ua zaj nkauj hu thuam luag.  64 Au (יחוח)Yahweh, koj cia li ua pauj rau lawv raws li lawv txhais tes tau ua lawm.  65 Cia li ua rau lawv lub siab tsaus ntuj nti, cia koj tej lus foom tsis zoo poob rau saum lawv.  66 Cia li caum cuag lawv ua chim kawg, thiab muab lawv ua kom puam tsuaj tag rau hauv (יחוח)Yahweh lub qab ntuj.