Thov (יחוח)Yahweh Khuvleej

1 Au (יחוח)Yahweh, thov nco txog tej xwm txheej uas raug peb lawm, thov tsa muag ntsia peb txojkev txaj muag.

2 Peb tej qub txeeg qub teg raug poob rau luag lawm, peb tej vaj tse ua lwm haiv neeg li lawm.

3 Peb yog menyuam ntsuag tsis muaj txiv, peb niam zoo yam nkaus li tej poj ntsuam.

4 Peb yuav tsum yuav dej haus thiab yuav tsum yuav taws rauv.

5 Peb kwv tus quab ntawm caj qwb raug luag raws, peb thiaj qaug zog, thiab luag tsis kheev peb so kiag li.

6 Peb tsa tes thov cov Iziv thiab cov Axilias xwv peb thiaj tau mov noj txaus.

7 Peb tej poj koob yawm txwv tau ua txhaum, thiab dua tag lawm, peb thiaj tau ris lawv tej kev txhaum txim.

8 Tej qhev sawv los kav peb, tsis muaj leejtwg pab peb dim lawv txhais tes.

9 Peb sev nyog txojsia tiv thiaj tau mov noj, vim yog tej hniav ntaj hauv tebchaws moj sab qhua.  

10 Peb lub cev kub npaum nkaus li cub hluavtaws, vim kev tshaib kev nqhis ua rau peb mob kub lug.  

11 Tej pojniam raug luag yuam pw hauv Xi‑oo, tej ntxhais hluas uas dawb huv raug luag yuam pw hauv Yahdah tej moos.

12 Cov thawj raug muab khi tes dai, luag tsis hwm tej kev txwj laug.  

13 Tej tub hluas raug quab yuam zom zeb, tej menyuam tub kwv taws qaug qas nuag.  

14 Cov kev txwj laug ploj tag ntawm tej rooj loog lawm, cov tub hluas tseg tsis ntaus nkauj nog ncas lawm.  

15 Txojkev zoo siab ploj tag hauv peb lub siab lawm, peb tej kev seev cev ntxeev ua kev quaj ntsuag lawm.  

16 Lub mom kub hle saum peb taubhau lawm, peb raug txom nyem lauj, vim yog peb tau ua txhaum.  

17 Tim li no peb lub siab thiaj mob heev, vim yog tej no peb lub qhov muag thiaj plooj tag, 18 yog tim lub roob Xi‑oo uas nyob do cuas cia, tej hma mus mus los los rau saud.  

19 Au (יחוח)Yahweh, koj yog tus uas kav mus ib txhis, koj lub zwm txwv nyob ruaj rau txhua tiam.  

20 Ua cas koj tsis nco qab peb mus ib txhis li? Ua cas koj tso peb tseg ntev li no?

21 Au (יחוח)Yahweh,  thov coj peb rov los cuag koj, peb thiaj los cuag koj, Thov koj tsa peb lub neej kom rov zoo li yav thaud.  

22 Ntshai tsuas yog koj muab peb tso pov tseg kiag li lawm thiab koj npau taws rau peb kawg nkaus li lawm.