Tsim Lub Ntiajteb Thiab Tibneeg

1 Chiv keeb thaum ub (יחוח)Yahweh tsim lub ntuj thiab lub ntiajteb.

2 Lub ntiajteb tseem tsis tau muaj tus yam ntxwv zoo li cas, thiab nyob do cuas thiab tsaus ntuj nti thoob plaws saum tej dej, thiab (יחוח)Yahweh tus Ntsuj Plig yuj roos tag nrho saum tej dej ntawd.  

3 Mas (יחוח)Yahweh hais tias, cia li muaj qhov kaj, ces txawm muaj qhov kaj.

4 (יחוח)Yahweh pom tias qhov kaj ntawd zoo, txawm muab qhov kaj cais tawm hauv qhov tsaus ntuj.  

5 (יחוח)Yahweh hu qhov kaj tias, Nruab Hnub, thiab hu qhov tsaus ntuj tias, Hmo Ntuj. Ces txawm muaj tsaus ntuj thiab muaj kaj ntug, yog thawj hnub.

6 (יחוח)Yahweh hais tias, cia li muaj lub ntuj los nyob nruab nrab tej dej thiab cia lub ntuj cais dej cais nag nyias nyob nyias.

7 (יחוח)Yahweh thiaj tsim lub ntuj thiab muab tej dej uas nyob hauv qab lub ntuj cais ntawm tej dej uas nyob saum lub ntuj. Ces txawm muaj li ntawd.  

8 (יחוח)Yahweh thiaj hu lub ntuj ntawd ua Ntuj. Ces txawm muaj tsaus ntuj thiab muaj kaj ntug, yog hnub ob.

9 (יחוח)Yahweh hais tias, cia tej dej uas nyob hauv qab ntuj sau zog mus nyob rau ib qho, thiab nruab nqhuab tshwm tuaj. Ces txawm muaj li ntawd. 

10 (יחוח)Yahweh thiaj hu nruab nqhuab tias Ntiaj teb, thiab hu tej dej uas sau zog ua ke tias Hiavtxwv. Mas (יחוח)Yahweh pom tias zoo.  

11 Thiab (יחוח)Yahweh hais tias, cia lub ntiajteb tuaj qoob loo nroj tsuag uas muaj noob, thiab tuaj xyoob ntoo uas muaj txiv, thiab muaj noob, nyias muaj raws li nyias yam rau saum lub ntiajteb. Ces txawm muaj li ntawd.  

12 Lub ntiajteb txawm tuaj tej qoob loo, nroj tsuag uas muaj noob, nyias muaj raws li nyias yam, thiab tuaj tej ntoo uas txi txiv, thiab muaj noob nyias muaj raws li nyias yam.  Mas (יחוח)Yahweh pom tias zoo.

13 Ces txawm muaj tsaus ntuj thiab muaj kaj ntug, yog hnub peb.  

14 (יחוח)Yahweh hais tias, cia li muaj tej lub ci ci rau saum nruab ntug cais nruab hnub thiab hmo ntuj, thiab cia tej lub ci ci ntawd qhia kom paub quas caij quas nyoog quas hnub quas hli quas niaj quas xyoo.

15 Thiab cia tej lub ntawd ci rau saum nruab ntug pom kev rau hauv ntiajteb. Ces txawm muaj li ntawd.  

16 (יחוח)Yahweh tsim ob lub ci ci uas loj, lub loj kav nruab hnub, lub yau kav hmo ntuj. Thiab nws kuj tsim tej hnub qub.

17 (יחוח)Yahweh txawb tej uas ci no rau saum nruab ntug pom kev rau lub ntiajteb,

18 Thiab kav nruab hnub thiab hmo ntuj, thiab cais qhov kaj tawm hauv qhov tsaus ntuj. Mas (יחוח)Yahweh pom tias zoo.

19 Ces txawm muaj tsaus ntuj thiab muaj kaj ntug, yog hnub plaub.  

20 (יחוח)Yahweh hais tias, cia nruab deg tshwm tej tsiaj ciaj sia coob kawg, thiab cia nas noog ya saum lub ntiajteb rau saum nruab ntug.

21 (יחוח)Yahweh thiaj tsim tej tsiaj loj loj hauv hiavtxwv, thiab tsim txhua yam tsiaj ciaj sia coob coob uas ya laim txias hauv nruab deg, nyias muaj raws li nyias yam, thiab tsim txhua yam nas noog muaj tis nyias muaj raws li nyias yam. Mas (יחוח)Yahweh pom tias zoo.  

22 Thiab (יחוח)Yahweh foom hmoov zoo rau tej tsiaj ntawd hais tias, cia li muaj me­nyuam thiab huaj vam coob puv nkaus nruab hiavtxwv, thiab cia nas noog huaj vam coob rau saum lub ntiaj teb.

23 Ces txawm muaj tsaus ntuj thiab muaj kaj ntug, yog hnub tsib.

24 (יחוח)Yahweh hais tias, cia lub ntiajteb tshwm tej tsiaj ciaj sia nyias muaj raws li nyias yam, yog tej tsiaj nyeg, tej tsiaj nkag hauv av, thiab tej tsiaj qus, nyias muaj raws li nyias yam. Ces txawm muaj li ntawd.

25 (יחוח)Yahweh thiaj tsim tej tsiaj qus rau hauv ntiajteb nyias muaj raws li nyias yam, thiab tsim tej tsiaj nyeg nyias muaj raws li nyias yam, thiab tsim txhua yam tsiaj nkag hauv av nyias muaj raws li nyias yam. Mas (יחוח)Yahweh pom tias zoo.

26 Thiab (יחוח)Yahweh hais tias, cia peb tsim tibneeg raws li peb tus yam ntxwv thiab zoo li peb. Cia lawv muaj hwjchim tswjhwm tej ntses hauv hiav txwv, thiab tej nas noog saum nruab ntug, thiab tej tsiaj txhu, thiab lub ntiajteb huvsi, thiab txhua yam tsiaj uas nkag hauv lub ntiaj teb.

27 (יחוח)Yahweh thiaj tsim tib neeg raws li (יחוח)Yahweh tus yam ntxwv, raws li (יחוח)Yahweh tus yam ntxwv ntawd, nws tsim tibneeg, nws tsim tibneeg kom muaj txiv neej thiab poj niam.

28 (יחוח)Yahweh foom koob hmoov rau lawv, thiab hais rau lawv tias, cia li muaj tub ki huaj vam coob puv nkaus ntiajteb, thiab kav lub ntiajteb rau hauv nej xib teg, thiab muaj hwjchim tswjhwm tej ntses hauv hiavtxwv, thiab tej nas noog saum nruab ntug, thiab txhua yam tsiaj ciaj sia uas nkag hauv lub ntiajteb.  

29 Thiab (יחוח)Yahweh hais tias, kuv pub txhua yam qoob loo uas muaj noob uas nyob thoob plaws hauv lub ntiajteb thiab txhua yam ntoo uas txi txiv muaj noob rau nej. Nej yuav muab tej no los ua zaub mov noj.

30 Thiab txhua yam tsiaj hauv ntiajteb thiab txhua yam nas noog saum nruab ntug thiab txhua yam uas nkag hauv ntiajteb, yog txhua yam ciaj sia uas ua pa nyob, kuv pub tej zaub mos ntsuab ntsuab huvsi rau lawv noj. Ces txawm muaj li ntawd.  

31 (יחוח)Yahweh saib txhua yam uas nws tau tsim ntawd mas pom tias zoo heev. Ces txawm muaj tsaus ntuj thiab muaj kaj ntug, yog hnub rau.