1 Lub ntuj, lub teb, thiab ib puas tsav yam hauv qab ntuj tsim tiav tag li no.

2 Hnub xya (יחוח)Yahweh tej haujlwm twb tiav tag lawm, mas hnub xya ntawd nws so txhua yam hauj lwm uas nws tau ua.

3 (יחוח)Yahweh foom koob hmoov rau hnub xya thiab muab tsa ua hnub uas dawb huv, rau qhov hnub ntawd (יחוח)Yahweh so txhua yam haujlwm uas tau tsim ntuj, tsim teb.

​

Lub Vaj Edees

4 Ntawm no mus yog hais txog qhov uas tsim lub ntuj thiab tsim lub ntiajteb. Hnub uas (יחוח)Yahweh tsim lub ntiajteb thiab lub ntuj,   

5 tej xyoob ntoo tsis tau muaj rau hauv ntiajteb, thiab tej qoob loo tsis tau tuaj li, vim yog (יחוח)Yahweh tsis tau tso nag los rau saum lub ntiajteb, thiab tsis muaj tibneeg ua liaj ua teb.

6 Tiamsis muaj dej txheem hauv ntiajteb tuaj ua rau av noo zaw thoob plaws.

7 Thaum ntawd, (יחוח)Yahweh muab hmoov av los puab tsim ua tibneeg, thiab tshuab pa ciaj sia rau hauv nws lub qhov ntswg, mas tibneeg thiaj li ciaj sia.

8 (יחוח)Yahweh cog ib lub vaj rau ntawm Edees uas nyob sab hnub tuaj, mas nws muab tus tibneeg uas nws tau tsim tso nyob qhov ntawd.

9 Thiab (יחוח)Yahweh ua kom txhua yam ntoo uas zoo saib, zoo noj tawm hauv av tuaj. Hauv lub plawv vaj muaj ib tsob ntoo uas pub txojsia, thiab ib tsob ntoo uas pub kom paub qhov zoo, qhov phem.  

10 Muaj ib tug dej ntws ntawm Edees los ntxooj lub vaj, dhau ntawd lawm txawm faib ntws ua plaub tug.  

11 Tus ib npe hu ua Pisoos, yog tus dej uas ntws puag ncig Havilas tebchaws, qhov ntawd muaj qhov kub.

12 Cov kub ntawm lub tebchaws ntawd yog cov tseem kub. Thiab muaj cov roj ntoo tsw qab thiab tej qe zeb iav txho ci lam lug qhov ntawd.  

13 Tus dej ob hu ua Kihoos, yog tus dej uas ntws puag ncig Khuj tebchaws.

14 Tus dej peb hu ua Thaikis, uas ntws mus rau Axilias tebchaws sab hnub tuaj. Tus dej plaub yog tus dej Yufetis.

15 (יחוח)Yahweh muab tus tibneeg ntawd, tso nyob hauv lub vaj Edees kom tu thiab saib lub vaj ntawd.  

16 Mas (יחוח)Yahweh nkaw lus rau tus tibneeg tias, txhua yam txiv ntoo hauv lub vaj no koj noj tau huvsi,

17 tiamsis tsob ntoo uas pub kom paub qhov zoo qhov phem, koj tsis txhob noj cov txiv kiag li, yog hnub twg koj noj koj yuav tuag.

18 (יחוח)Yahweh hais tias, tsis tsim nyog cia tus tibneeg no nyob tib leeg. Kuv yuav tsim ib tug pab uas phim nws.

19 (יחוח)Yahweh thiaj li muab av los puab tsim txhua yam tsiaj hauv ntiajteb, thiab txhua yam nas noog saum nruab ntug, coj los rau tus tibneeg ntawd, saib nws yuav tis npe hu li cas. Tus tibneeg, tis npe rau tej tsiaj uas ciaj sia li cas, ces tej tsiaj ntawd kuj muaj npe li ntawd.

20 Tus tibneeg ntawd, tis npe rau tej tsiaj nyeg, tsiaj qus huvsi, thiab tej

nas noog saum nruab ntug huvsi. Tiamsis tsis muaj ib tug pab uas phim tus tibneeg ntawd.

21 Mas (יחוח)Yahweh thiaj ua rau tus tib­neeg tsaug zog heev, thiab thaum nws tsaug zog lawm (יחוח)Yahweh thiaj rho nws ib tug tav tawm los, thiab ua rau lub qhov txhab nqawm zoo li qub.

22 Tus tav uas (יחוח)Yahweh rho tawm hauv tus tibneeg ntawd los, (יחוח)Yahweh muab tsim ua ib tug pojniam, thiab coj los rau tus txivneej ntawd.  

23 Tus txivneej thiaj hais tias, no lauj, tej txha no tawm hauv kuv txha los, tej nqaij no tawm hauv kuv nqaij los. Yuav hu ua Pojniam, vim rho nws tawm hauv Txivneej los.

24 Vim li no, tus txivneej thiaj ncaim ntawm nws niam nws txiv, thiab nrog nws tus pojniam tsheej xeeb ua ke, mas nkawv koom ua ib lub cev.

25 Tus txivneej thiab nws tus pojniam nyob liab qab tsis txaj muag.