(יחוח)Yahweh Cog Lus Qhov Uas Yug Ixaj

1 (יחוח)Yahweh los tshwm rau Anplaham ntawm cov ntoo xeeb hauv Males, rau thaum Anplaham tseem zaum ntawm qhov rooj tsev ntaub, thaum tshav ntuj kub heev. 

2 Nws tsa muag saib pom peb tug txivneej sawv tom nws hauv ntej. Thaum nws pom dheev lawv, nws khiav loo ntawm qhov rooj mus tos lawv, thiab pe rau hauv av. 

3 Thiab hais tias, kuv Tus Tswv, yog koj txaus siab rau kuv, koj tsis txhob hla kiag ntawm koj tus tub qhe mus. 

4 Cia kuv coj me ntsis dej tuaj rau nej ntxuav kotaw, thiab so hauv qab tus ntoo no. 

5 Vim nej twb tuaj txog nej tus tub qhe lawm, kuv yuav nqa me ntsis zaub mov rau nej noj kom nej thiaj tau so los siav mam li mus. Lawv teb hais tias, mus ua raws li koj hais. 

6 Anplaham maj nroos nkag mus rau hauv tsev ntaub hais rau Xalas tias, kavtsij mus muab peb xe‑as hmoov zoo zoo los zuaj ua ncuav. 

7 Thiab Anplaham khiav loo mus rau hauv pab tsiaj, muab kiag ib tug thav nyuj mos zoo zoo cob rau tus tub qhe maj nroos ua zaub. 

8 Anplaham muab tej kua mis nyeem thiab nyuj mis, thiab tej nqaij nyuj uas ua siav lawm, los rau rau ntawm lawv xubntiag. Thaum lawv noj nws sawv ntsug ntawm lawv ib sab hauv tsob qab ntoo.  

9 Lawv nug nws tias, koj tus pojniam Xalas nyob qhovtwg? Nws teb tias, nyob hauv tsev ntaub. 

10 (יחוח)Yahweh hais tias, lwm xyoo kuv yuav rov tuaj saib koj tiag tiag li, mas koj tus pojniam Xalas yuav muaj ib tug tub. Xalas nyob ntawm lub qhov rooj tsev ntaub ncaj ntawm tus ntawd nrob qaum mloog thiab.

11 Anplaham thiab Xalas hnub nyoog nchav thiab laus heev lawm, Xalas twb tseg tsis ua pojniam lawm.

12 Xalas thiaj luag twjywm hauv lub siab thiab hais tias, kuv laus lawm, kuv tus txiv kuj laus heev lawm, kuv tseem yuav zoo siab thiab lov?  

13 (יחוח)Yahweh hais rau Anplaham tias, ua cas Xalas luag thiab hais tias, kuv twb laus lawm, tseem yuav yug tau me­nyuam tiag tiag li lov?

14 Muaj ib yam abtsi uas (יחוח)Yahweh ua tsis tau lov? Txog sijhawm uas teem cia lawm, kuv yuav rov tuaj cuag koj lwm xyoo, mas Xalas yuav tau ib tug tub.

15 Tiamsis Xalas tsis lees, nws hais tias, kuv tsis luag, vim nws ntshai. (יחוח)Yahweh hais tias, tsis txhob dag, koj twb luag tiag tiag li.

​

Anplaham Thov Pab Lub Moos Xaudoos

16 Peb tug txivneej ntawd txawm tawm qhov ntawd mus, lawv mus saib lub moos Xaudoos. Anplaham nrog lawv mus xa lawv.

17 (יחוח)Yahweh hais tias, kuv yuav npog tej uas kuv yuav ua tsis qhia rau Anplaham paub lov? 

18 Rau qhov Anplaham yuav ua ib haiv neeg uas loj thiab muaj zog heev, thiab ib tsoom tebchaws hauv ntiajteb yuav tau koob hmoov ntawm nws los. 

19 Kuv twb xaiv nws lawm, kom nws thiaj qhuab qhia nws tej tub ki thiab nws caj ces uas tshwm los tom qab kom ua raws li (יחוח)Yahweh txojkev uas yog ua raug cai thiab ua ncaj ncees kom (יחוח)Yahweh thiaj li pub tej uas nws cog lus cia lawm rau Anplaham. 

20 (יחוח)Yahweh hais tias, lub suab uas kom lub moos Xaudoos thiab lub moos Kaumaulas nrov heev thiab lawv lub txim kuj loj heev,

21 mas kuv yuav nqis mus saib lawv, saib lawv puas tau ua txhua yam txhaum raws li lub suab uas kom tuaj txog kuv ntawd. Yog tsis muaj kuv thiaj paub.

22 Cov txivneej ntawd txawm tawm qhov ntawd ncaj nraim mus rau lub moos Xaudoos, tiamsis Anplaham tseem sawv ntsug ntawm (יחוח)Yahweh lub xub ntiag.

23 Anplaham txawm txav los ze (יחוח)Yahweh thiab hais tias, koj yuav ua rau cov uas ncaj ncees nrog cov tibneeg phem puam tsuaj ua ke tiag li lov?  

24 Piv tias yog muaj tsib caug leej ncaj ncees nyob hauv lub moos ntawd, koj yuav ua rau lub moos ntawd puam tsuaj kiag lov? Koj yuav tsis tseg lub moos ntawd nyob, vim yog saib rau tsib caug leej ncaj ncees uas nyob hauv li lov?

25 Thov tsis txhob ua li ntawd kiag li lauj! Tsis txhob tua cov tibneeg ncaj ncees nrog cov tibneeg phem ua ke, tsis txhob ua rau cov ncaj ncees ib yam li ua rau cov tib­neeg phem. Tsis txhob ua li ntawd lauj! Tus uas txiav txim tag nrho hauv lub ntiajteb yuav tsis ua ncaj lov?

26 (יחוח)Yahweh hais tias, yog kuv pom muaj tsib caug leej ncaj ncees nyob hauv lub moos Xaudoos, kuv yuav tseg lub moos ntawd huvsi nyob, vim yog saib rau tsib caug leej ntawd. 

27 Anplaham teb tias, txawm yog kuv tsuas yog hmoov av thiab hmoov tshauv xwb, los kuv tseem muaj ntsej muag nrog Tus Tswv txuas lus.

28 Piv tias yog tsib caug leej ntawd poob tsib leeg lawm, koj tseem yuav ua rau lub moos huvsi puam tsuaj vim yog tu ncua tsib leeg ntawd lov? (יחוח)Yahweh hais tias, yog kuv ntsib plaub caug tsib leeg uas ncaj ncees nyob hauv, kuv yuav tsis ua kom puam tsuaj.

29 Nws rov hais dua rau (יחוח)Yahweh tias, yog tias ntsib plaub caug leej nyob hauv nev? (יחוח)Yahweh teb tias, vim yog saib rau plaub caug leej, kuv yuav tsis ua kom puam tsuaj.

30 Anplaham thiaj hais tias, thov Tus Tswv tsis txhob chim, kuv yuav hais ntxiv. Yog tias ntsib peb caug leej nyob hauv nev? (יחוח)Yahweh teb tias, yog kuv ntsib peb caug leej nyob hauv, kuv yuav tsis ua kom puam tsuaj. 

31 Anplaham hais tias, kuv tseem muaj ntsej muag nrog Tus Tswv txuas lus. Yog tias ntsib nees nkaum leej nyob hauv nev? (יחוח)Yahweh teb tias, vim yog saib rau nees nkaum leej, kuv yuav tsis ua kom lub moos ntawd puam tsuaj.

32 Mas Anplaham hais tias, thov Tus Tswv tsis txhob chim, kuv yuav hais dua ib zaug xwb. Yog tias ntsib kaum leej nyob hauv nev? (יחוח)Yahweh teb tias, vim yog saib rau kaum leej, kuv yuav tsis ua kom lub moos puam tsuaj. 

33 Thaum (יחוח)Yahweh nrog Anplaham sib txuas lus tag lawm, (יחוח)Yahweh kuj mus lawm, mas Anplaham thiaj rov qab mus rau nws lub chaw nyob lawm.