Kevcai Txiav Ua Lub Hom Thawj

1 Thaum Anplas hnub nyoog muaj cuaj caum cuaj xyoos, (יחוח)Yahweh los tshwm rau Anplas thiab hais rau nws tias, kuv yog (יחוח)Yahweh uas muaj hwjchim loj kawg nkaus. Cia li nrog nraim kuv thiab xyaum zoo kawg nkaus. 

2 Kuv yuav nrog koj sib cog lus, thiab kuv yuav ua rau koj caj ces huaj vam coob kawg nkaus. 

3 Anplas txawm khwb nkaus rau hauv av, mas (יחוח)Yahweh hais rau nws tias,

4 no yog kuv tej lus uas kuv cog rau koj, koj yuav ua ntau haiv neeg leej txiv. 

5 Koj lub npe yuav tsis hu ua Anplas li lawm, yuav hu ua Anplaham, vim kuv ua rau koj ua ntau haiv neeg leej txiv. 

6 Kuv yuav ua rau koj muaj tub ki, xeeb ntxwv coob, thiab kuv yuav ua rau koj ua ntau haiv neeg, thiab yuav muaj tej vajntxwv tshwm hauv koj los. 

7 Kuv yuav cog lus tseg ruaj rau kuv thiab koj, thiab rau koj caj ces uas tshwm los txhua tiam tom qab, ua lo lus cog tseg uas nyob mus ib txhis, hais tias kuv yuav ua koj Tus Tswv thiab ua koj caj ces uas tshwm los tom qab Tus Tswv.

8 Kuv yuav muab lub tebchaws Khana‑as uas koj ua qhua nyob no huvsi pub rau koj thiab pub rau koj caj ces uas tshwm los tom qab, ua lawv tug mus ib txhis li. Thiab kuv yuav ua lawv Tus Tswv. 

9 (יחוח)Yahweh hais rau Anplaham tias, hais txog koj, mas koj thiab koj caj ces uas tshwm los txhua tiam tom qab, yuav tau ua raws li kuv tej lus cog tseg. 

10 No yog kuv tej lus cog tseg rau kuv thiab koj, thiab koj caj ces uas tshwm los tom qab, mas nej yuav tau ua raws li. Txhua tus txivneej hauv nej yuav tau ua kevcai txiav.

11 Nej yuav tau ua kevcai txiav daim tawv chaw xis, ua lub hom thawj rau tej lus cog tseg rau kuv thiab nej.

12 Nej cov tub uas hnub nyoog muaj yim hnub, yuav tau muab ua kevcai txiav. Nej yuav ua li no rau cov txivneej txhua tus hauv nej haiv neeg, txhua tiam mus li, tsis hais cov uas yug hauv nej tsev, thiab cov uas nej muab nyiaj yuav lwm haiv neeg los, uas tsis yog nej cov menyuam. 

13 Cov uas yug hauv nej tsev thiab cov uas muab nyiaj yuav los yuav tau ua kevcai txiav. Ua li no mas kuv tej lus cog tseg thiaj nyob hauv nej tej nqaij ua lo lus cog tseg mus ib txhis. 

14 Tus txivneej twg uas tsis tau ua kevcai txiav daim tawv chaw xis mas yuav raug muab rho tawm hauv nws haiv neeg, vim yog nws tau rhuav kuv tej lus cog tseg.

15 Thiab (יחוח)Yahweh hais rau Anplaham tias, koj tus pojniam Xalais, koj tsis txhob hu nws ua Xalais, yuav hu ua Xalas.

16 Kuv yuav foom koob hmoov rau nws thiab tsis tag li ntawd xwb, kuv yuav pub nws yug ib tug tub rau koj. Kuv yuav foom koob hmoov rau nws, nws yuav ua tej haiv neeg leej niam thiab tej vajntxwv yuav tshwm hauv nws los. 

17 Anplaham txawm khwb nkaus rau hauv av luag, thiab hais twjywm hauv lub siab tias, tus txivneej ib puas xyoo tseem muaj taus me­nyuam thiab lov? Xalas muaj cuaj caum xyoo lawm tseem yug tau menyuam thiab lov?

18 Thiab Anplaham hais rau (יחוח)Yahweh tias, Au thov cia Yisama‑ees yog tus uas koj pom zoo. 

19 (יחוח)Yahweh hais tias, tsis yog li ntawd, koj tus pojniam Xalas yuav yug ib tug tub rau koj thiab koj yuav tis npe hu ua Ixaj. Kuv yuav cog lus tseg rau nws ua lo lus cog tseg mus ib txhis rau nws caj ces uas tshwm los tom qab. 

20 Hais txog Yisama‑ees, mas kuv twb hnov koj hais lawm. Kuv yuav foom koob hmoov rau nws thiab ua rau nws muaj tub ki thiab huaj vam coob. Nws yuav ua kaum ob tug thawj leej txiv thiab kuv yuav ua rau nws ua ib haiv neeg loj.  

21 Kuv yuav muab kuv tej lus cog tseg rau Ixaj uas lwm xyoo lub caij no Xalas yuav yug rau koj. 

22 Thaum (יחוח)Yahweh hais rau Anplaham tag lawm, (יחוח)Yahweh txawm rov qab ntawm nws mus lawm. 

23 Anplaham thiaj muab nws tus tub Yisama‑ees thiab txhua tus tub qhe uas yug hauv nws tsev, thiab tej uas muab nyiaj yuav los, yog txhua tus txivneej hauv nws tsev ua kevcai txiav daim tawv chaw xis rau hnub ntawd raws li (יחוח)Yahweh hais rau nws.

24 Anplaham hnub nyoog muaj cuaj caum cuaj xyoos rau thaum uas nws ua kevcai txiav daim tawv chaw xis. 

25 Nws tus tub Yisama‑ ees hnub nyoog muaj kaum peb xyoos rau thaum nws ua kevcai txiav daim tawv chaw xis. 

26 Anplaham thiab nws tus tub Yisama‑ees ua kevcai txiav rau hnub ntawd ntag.

27 Txhua tus txivneej hauv nws lub tsev, tsis hais cov uas yug hauv tsev, thiab cov uas muab nyiaj yuav lwm haiv neeg los, kuj nrog nws ib txhij ua kevcai txiav.