Hakas Thiab Yisama‑ees

1 Xalais uas yog Anplas tus pojniam tsis muaj menyuam rau Anplas. Xalais muaj ib tug nkauj qhe uas yog tibneeg Iziv hu ua Hakas.

2 Xalais thiaj hais rau Anplas tias, saib maj, (יחוח)Yahweh tsis pub kuv muaj menyuam. Koj cia li mus nrog kuv tus nkauj qhe pw, tej zaum nws yuav yug tau me­nyuam rau kuv. Anplas kuj mloog Xalais lus.

3 Thaum Anplas nyob hauv Khana‑as tebchaws tau kaum xyoo lawm, Anplas tus pojniam Xalais txawm muab nws tus nkauj qhe Hakas uas yog tibneeg Iziv rau nws tus txiv Anplas yuav ua pojniam. 

4 Anplas nrog Hakas pw, nws txawm xeeb tub. Thaum nws paub tias nws xeeb tub lawm, nws txawm saib tsis taus Xalais.

5 Xalais txawm hais rau Anplas tias, cia koj ris qhov uas kuv raug saib tsis taus no. Kuv muab kuv tus nkauj qhe rau hauv koj lub xubntiag, tiamsis thaum nws paub tias nws xeeb tub lawm, nws txawm saib tsis taus kuv. Thov (יחוח)Yahweh txiav txim saib yog tim kuv los tim koj. 

6 Anplas thiaj hais rau Xalais tias, koj tus nkauj qhe nyob hauv koj kev tswjhwm. Cia li ua rau nws raws li koj pom zoo. Xalais thiaj tsim txom Hakas, Hakas thiaj khiav lawm. 

7 (יחוח)Yahweh tus tubtxib saum ntuj ntsib Hakas hauv tebchaws moj sab qhua, ntawm lub qhov dej uas nyob ntawm txojkev mus rau lub moos Saws.

8 Nws thiaj nug Hakas tias, Hakas, Xalais tus nkauj qhe, koj tuaj qhovtwg tuaj thiab koj yuav mus qhovtwg? Hakas teb tias, kuv khiav kuv tus poj lospav Xalais. 

9 (יחוח)Yahweh tus tubtxib saum ntuj hais rau nws tias, cia li rov qab mus cuag koj tus poj lospav thiab ua raws li nws tswjhwm.

10 (יחוח)Yahweh tus tubtxib kuj hais rau nws tias, kuv yuav pub koj caj ces huaj vam coob coob suav tsis txheeb.

11 (יחוח)Yahweh tus tubtxib hais rau Hakas tias, koj twb xeeb menyuam lawm, koj yuav yug tau ib tug tub, thiab koj yuav hu tus tub ntawd lub npe tias Yisama‑ees, rau qhov (יחוח)Yahweh twb hnov txog koj txojkev txom nyem lawm. 

12 Nws yuav zoo ib yam li tus nees luav qus, nws txhais tes yuav tawm tsam sawvdaws, thiab ib tsoom sawvdaws txhais tes yuav tawm tsam nws. Nws yuav nyob ua yeeb ncuab rau nws cov kwvtij sawvdaws.

13 Hakas thiaj tis npe rau (יחוח)Yahweh uas hais lus rau nws tias, koj yog tus (יחוח)Yahweh uas pom, rau qhov nws hais tias, kuv twb pom (יחוח)Yahweh tiag tiag li, mas tseem muaj txojsia nyob thiab lov?  

14 Vim li no, thiaj hu lub qhov dej ntawd tias Npe‑awlahailais, nyob ntawm lub moos Khades thiab lub moos Npeles ntu nruab nrab.

15 Hakas yug ib tug tub rau Anplas. Mas Anplas tis nws tus tub uas Hakas yug hu ua Yisama‑ees. 

16 Thaum Hakas yug Yisama‑ees rau Anplas ntawd, Anplas hnub nyoog muaj yim caum rau xyoo.