Anplaham Thiab Anpimelej

1 Anplaham tsiv qhov ntawd mus rau nram Nekes tebchaws, mas nws mus tsuam chaw nyob ntawm lub moos Khades thiab lub moos Saws ntu nruab nrab. Nws mus nyob hauv lub moos Kelas ib ntus. 

2 Anplaham hais txog nws tus pojniam Xalas hais tias, yog kuv tus muam. Anpimelej uas ua vajntxwv kav lub moos Kelas thiaj li txib tibneeg mus coj Xalas los. 

3 Ces hmo ntuj (יחוח)Yahweh txawm tshwm rau Anpimelej ua yog toog pom mas nws hais tias, koj yuav tuag tiag tiag li, vim tus pojniam uas koj coj los no twb yeej muaj txiv lawm. 

4 Tiamsis Anpimelej tsis tau mus ze Xalas li mas nws thiaj hais tias, Au Tus Tswv, koj txawm yuav muab haiv neeg uas tsis txhaum tua pov tseg thiab lov?

5 Vim Anplaham ciav hais tias, nws yog kuv tus muam, thiab tus pojniam no kuj hais tias, Anplaham yog kuv tus nus, qhov uas kuv ua no kuv lub siab yeej ua ncaj ua ncees thiab kuv txhais tes yeej tsis tau ua txhaum li.  

6 Mas (יחוח)Yahweh thiaj hais rau nws hauv txoj yog toog hais tias, kuv yeej paub tias qhov uas koj ua li ntawd, koj kuj ua ncaj tiag, mas kuv thiaj tav tsis kheev koj ua txhaum rau kuv. Vim li no, kuv thiaj tsis kheev koj kov tus pojniam no. 

7 Cia li muab tus pojniam no thim rov qab rau nws tus txiv, vim tus txivneej ntawd yog ib tug uas cev (יחוח)Yahweh lus, mas nws yuav thov ()Yahweh pab koj kom koj thiaj ciaj sia nyob. Tiamsis yog koj tsis thim tus pojniam no rau nws, koj cia li paub tseeb tias koj thiab koj cov tibneeg sawvdaws yuav tuag. 

8 Anpimelej sawv ntxov ntxov los hu nws cov nom tswv sawvdaws tuaj cuag nws, mas nws qhia txhua yam no rau lawv mloog, mas lawv ntshai kawg li.

9 Anpimelej txawm hu Anplaham tuaj cuag nws, mas hais rau Anplaham tias, koj ua ab­tsi li no rau peb? Kuv tau ua txhaum li cas rau koj es koj yuav coj lub niag tuam txim loj li no los rau kuv thiab kuv lub teb­chaws. Tej uas koj ua rau kuv no twb tsis tsim nyog ua kiag li. 

10 Anpimelej hais rau Anplaham tias, koj xav li cas es koj ua li no. 

11 Anplaham teb hais tias, kuv xav tias, hauv lub tebchaws no, tsis muaj leej twg paub ntshai (יחוח)Yahweh kiag li, ces tsam luag muab kuv tua, vim yog xav yuav kuv pojniam. 

12 Qhov tseeb, nws yog kuv tus muam tiag, rau qhov nws nrog kuv koom txiv tsis koom niam xwb mas nws thiaj tau los ua kuv pojniam. 

13 Thaum (יחוח)Yahweh kom kuv tawm hauv kuv niam kuv txiv lub tsev tsiv mus rau lwm lub tebchaws, kuv thiaj hais rau kuv pojniam tias, wb txawm mus txog qhovtwg los xij, koj yuav tau hais rau luag tias, kuv yog koj tus nus, mas thiaj yog koj hlub kuv.

14 Ces Anpimelej txawm muab yaj, muab nyuj, muab tub qhe, nkauj qhe, pub rau Anplaham thiab muab Anplaham tus pojniam Xalas thim rov qab rau Anplaham.

15 Thiab Anpimelej hais tias, saib maj, kuv lub teb chaws nyob ntawm koj xubntiag no, mas yog koj xav mus nyob rau thaj twg los kuj mus nyob tau raws li koj lub siab nyiam.

16 Thiab nws hais rau Xalas tias, kuv muab ib txhiab sekhees nyiaj rau koj tus nus ntxuav koj tab meeg cov tibneeg uas nrog koj nyob sawv daws, mas koj kuj dawb huv fim taus ib tsoom lawm.

17 Ces Anplaham txawm thov (יחוח)Yahweh mas (יחוח)Yahweh thiaj kho Anpimelej thiab Anpimelej pojniam, thiab tej nkauj qhe sawvdaws zoo, lawv thiaj muaj taus menyuam. 

18 Vim yog Anpimelej coj Anplaham tus pojniam Xalas los li ntawd mas (יחוח)Yahweh thiaj kaw cov pojniam uas nyob hauv vajntxwv tsev tej plab tsis pub xeeb tub.