Yug Ixaj

1 (יחוח)Yahweh foom koob hmoov rau Xalas raws li nws twb hais tseg lawm, thiab (יחוח)Yahweh ua rau Xalas raws li nws cog lus cia.

2 Xalas thiaj xeeb tub thiab yug tau ib tug tub rau Anplaham rau thaum Anplaham laus heev, thiab yog lub sijhawm uas (יחוח)Yahweh tau hais rau nws lawm.

3 Anplaham tis npe rau tus tub uas Xalas yug rau nws hu ua Ixaj.

4 Thiab Anplaham muab nws tus tub Ixaj ua kevcai txiav rau thaum uas nws muaj yim hnub lawm, raws li (יחוח)Yahweh tau kom nws ua.

5 Anplaham muaj ib puas xyoo rau thaum yug Ixaj.

6 Mas Xalas hais tias, (יחוח)Yahweh ua rau kuv luag zoo siab. Txhua tus uas tau hnov yuav nrog kuv luag thiab.

7 Thiab Xalas hais tias, leejtwg yuav hais tau rau Anplaham tias Xalas yuav pub mis rau menyuam noj? Tiamsis kuv yug tau ib tug tub rau nws rau thaum nws laus heev lawm.

​

Muab Hakas Thiab Yisama‑ees Ntiab Khiav

8 Tus metub ntawd kuj hlob thiab tseg tsis noj mis lawm. Anplaham npaj ib rooj noj loj rau hnub uas Ixaj tseg tsis noj mis.

9 Tiamsis Xalas pom Hakas uas yog tibneeg Iziv tus tub uas yug rau Anplaham luag luag nws tus tub.

10 Xalas thiaj hais rau Anplaham tias, cia li muab tus nkauj qhe no thiab nws tus tub ntiab khiav mus, rau qhov tsis kheev tus nkauj qhe no tus tub nrog kuv tus tub Ixaj txais qub txeeg qub teg.

11 Qhov no ua rau Anplaham nyuaj siab, vim yog saib rau nws tus tub Yisama‑ees.

12 Tiamsis (יחוח)Yahweh hais rau Anplaham tias tsis txhob nyuaj siab rau tus menyuam thiab koj tus nkauj qhe. Xalas hais li cas rau koj, cia li ua li ntawd, rau qhov koj caj ces yuav yog tshwm ntawm Ixaj mus.

13Tus nkauj qhe tus tub ntawd, kuv yuav pub ua tau ib haiv neeg thiab vim nws yog koj cov noob.

14 Anplaham thiaj sawv ntxov tsees muab ncuav thiab ib hnab dej tsaws rau Hakas ris saum xub pwg, thiab xa nws nrog tus me­nyuam ua ke tawm mus. Nws thiaj tawm mus thiab mus mus los los hauv tebchaws moj sab qhua Npe‑awsenpas.

15 Thaum hnab dej ntawd tag lawm, Hakas txawm muab tus menyuam tso rau hauv qab ib tsob ntoo.

16 Ces nws txawm mus zaum rau ib cag kwvlam deb li tua ib hnee, vim nws hais tias, kuv tsis xav pom kuv tus menyuam tu siav. Thaum nws tseem zaum qhov ntawd, nws tsa suab quaj.

17 (יחוח)Yahweh hnov tus metub ntawd lub suab, mas (יחוח)Yahweh tus tubtxib saum ntuj, hu saum ntuj tuaj rau Hakas tias, koj ua li cas lawm? Koj tsis txhob ntshai, rau qhov (יחוח)Yahweh twb hnov tus metub lub suab ntawm qhov chaw uas nws nyob lawm.

18 Cia li sawv tsees mus tsa tus metub tuav rawv nws txhais tes, rau qhov kuv yuav pub kom nws ua ib haiv neeg loj.

19 Mas (יחוח)Yahweh qheb Hakas lub qhov muag, nws txawm pom ib lub qhov dej. Nws thiaj mus ntim dej puv nkaus lub hnab thiab muab rau tus metub haus.

20 (יחוח)Yahweh nrog nraim tus metub, nws thiaj kheev hlob. Nws nyob rau hauv tebchaws moj sab qhua thiab ua tus uas txawj tua hneev.

21 Nws nyob hauv tebchaws moj sab qhua Palas.  Nws niam yuav ib tug pojniam hauv Iziv tebchaws los rau nws.

​

Anplaham Thiab Anpimelej Sib Cog Lus

22 Thaum ntawd vajntxwv Anpimelej thiab Fikhaus uas yog Anpimelej tus thawj tub rog, hais rau Anplaham tias, (יחוח)Yahweh nrog nraim koj rau txhua yam uas koj ua.

23 Vim li no, mas nimno cia li tuav (יחוח)Yahweh lub npe cog lus twv rau kuv ntawm no, tias koj yuav tsis ntxeev ntxias kuv, thiab kuv tej tub ki, thiab kuv caj ces, thiab kuv tau ua zoo li cas rau koj lawm, koj yuav ua ib yam li ntawd rau kuv, thiab rau lub tebchaws uas koj txeev ua qhua nyob no.

24 Anplaham thiaj hais tias, kuv cog lus twv li ntawd.

25 Thaum Anplaham yws rau Anpimelej hais txog lub qhov dej uas Anpimelej cov tub qhe muab txeeb lawm,

26 Anpimelej hais tias, kuv tsis paub tias leejtwg ua li no.  Koj tsis tau hais rau kuv, kuv yeej tsis tau hnov los txog rau hnub no.

27 Anplaham thiaj coj yaj, thiab nyuj tuaj pub rau Anpimelej, mas nkawv thiaj sib cog lus.

28 Anplaham thiaj cais xya tus xyuas yaj tawm ntawm pab yaj.

29 Anpimelej hais rau Anplaham tias, xya tus xyuas yaj uas koj muab cais rau ib cag ntawd yog abtsi?

30 Anplaham hais tias, xya tus xyuas yaj ntawd, thov koj cia li txais ntawm kuv txhais tes, xwv koj thiaj ua tau timkhawv rau kuv tias, kuv tau khawb lub qhov dej no.

31 Vim li no, thiaj hu lub chaw ntawd tias Npe‑awsenpas, rau qhov nkawv tau cog lus twv tseg qhov chaw ntawd.  

32 Nkawv thiaj cog lus tseg li ntawd, rau ntawm Npe‑awsenpas. Mas Anpimelej thiab Fikhaus uas yog tus thawj rog kuj rov qab mus rau hauv cov Filixatees lub tebchaws lawm.

33 Anplaham cog ib tsob nyuag ntoo tamalis rau ntawm Npe‑awsenpas, thiab tuav (יחוח)Yahweh uas yog Tus Tswv muaj txojsia nyob ib txhis lub npe thov qhov ntawd.

34 Mas Anplaham ua qhua nyob hauv cov Filixatees lub tebchaws tau ntau hnub.