Anplaham Muab Ixaj Xyeem Rau Saum Thaj

1 Dhau ntawd los (יחוח)Yahweh sim Anplaham lub siab, mas hais rau nws tias, Anplaham, Anplaham teb tias, kuv nyob no os.  

2 (יחוח)Yahweh hais tias, cia li coj koj tus tub Ixaj, yog koj tib tug tub uas koj hlub, mus rau Mauliyas teb­chaws thiab muab nws hlawv xyeem rau saum ib lub roob uas kuv yuav qhia koj.

3 Anplaham txawm sawv ntxov tsees nog eeb rau saum nees luav, thiab coj nws ob tug tub qhe uas tseem hluas, thiab nws tus tub Ixaj nrog nws mus. Nws txiav taws siv hlawv xyeem, thiab taug kev mus rau lub chaw uas (יחוח)Yahweh hais rau nws.

4 Thaum mus tau peb hnub lawm, Anplaham tsa muag saib pom lub chaw nyob deb deb.

5 Anplaham thiaj hais rau ob tug tub qhe tias, neb nrog nees luav nyob ntawm no, kuv thiab kuv tus tub yuav mus rau tim ub, mus pe hawm (יחוח)Yahweh tag, wb mam li rov los rau ntawm neb no.

6 Anplaham muab cov taws uas yuav siv hlawv xyeem ntawd, rau nws tus tub Ixaj kwv, thiab nws coj hluavtaws, thiab riam hauv nws txhais tes. Ces nkawv thiaj ua ke mus.

7 Ixaj hais rau nws txiv Anplaham tias, txiv, Anplaham teb tias, metub, koj hais abtsi? Ixaj thiaj hais tias, muaj hluavtaws thiab muaj taws rauv tiamsis tus menyuam yaj uas yuav  muab hlawv xyeem nyob qhovtwg?

8 Anplaham hais tias, metub, (יחוח)Yahweh nws yuav npaj thiab pub tus menyuam yaj uas siv hlawv xyeem ntawd. Mas nkawv thiaj ua ke taug kev mus.

9 Thaum nkawv mus txog qhov chaw uas (יחוח)Yahweh tau hais rau nws lawm, Anplaham txawm ua ib lub thaj rau qhov ntawd thiab muab cov taws tib tib zoo rau saud. Nws muab nws tus tub Ixaj khi los tso rau saum cov taws saum lub thaj.

10 Ces Anplaham txawm cev tes muab riam los yuav tua nws tus tub.

11 Tiamsis (יחוח)Yahweh tus tubtxib saum ntuj hu saum ntuj tuaj rau nws thiab hais tias, Anplaham, Anplaham, Anplaham teb tias, kuv nyob no os.

12 Tus tubtxib saum ntuj hais tias, tsis txhob kov tus menyuam tub thiab tsis txhob ua li cas rau nws kiag li, rau qhov nimno kuv paub tseeb lawm, tias koj hwm thiab paub ntshai (יחוח)Yahweh, vim qhov uas koj sev nyog muab koj tus tub, uas yog koj tib tug tub pub rau kuv.

13 Anplaham tsa muag saib ua ciav pom muaj ib tug txiv yaj nyob tom nws qab, uas txwm kub khaub zig rau ib xyuv ntoo ntom ntom. Anplaham thiaj mus muab tus txiv yaj ntawd, los xyeem ua kevcai hlawv xyeem theej nws tus tub chaw.

14 Anplaham thiaj hu qhov chaw ntawd tias (יחוח)Yahweh yuav npaj thiab pub, yam li uas hais lus txog niaj hnub nimno tias Yuav npaj thiab pub rau saum (יחוח)Yahweh lub roob.

15 (יחוח)Yahweh tus tubtxib saum ntuj hu saum ntuj tuaj rau Anplaham zaum ob,

16 thiab hais tias, (יחוח)Yahweh hais tias, kuv tuav kuv lub npe cog lus ruaj tias, vim qhov uas koj ua li no, thiab koj tsis khuvxim koj tus tub, uas yog koj tib tug tub xwb,

17 mas kuv yeej yuav foom koob hmoov rau koj tiag tiag li, kuv yuav ua rau koj caj ces huaj vam coob heev, yam li tej hnub qub saum ntuj thiab yam li tej xuab zeb ntawm ntug hiavtxwv. Koj caj ces yuav tau yeeb ncuab tej rooj loog ua lawv tug.

18 Ib tsoom tebchaws hauv lub ntiajteb yuav tau koob hmoov ntawm koj caj ces, vim koj mloog kuv tej lus.

19 Anplaham thiaj rov qab mus ntsib nws ob tug tub qhe hluas, thiab lawv ua ke mus rau Npe‑awsenpas. Anplaham kuj nyob ntawm Npe‑awsenpas.

​

Nahaus Caj Ces

20 Dhau ntawd los, muaj tibneeg hais rau Anplaham tias, Meekhas yug tau menyuam rau koj tus kwv Nahaus.

21 Us yog tus hlob, Npub yog tus kwv, thiab muaj Khemu‑ees uas yog Alas txiv, 22 thiab Khexes, Haxos, Pidas, Yilas thiab Npethu‑ees.

23 Npethu‑ees yog Lenpekhas txiv. Meekhas yug tau yim leej tub no rau Nahaus uas yog Anplaham tus kwv.

24 Tsis tag li ntawd Nahaus tus niam yau, uas npe hu ua Le‑umas yug tau Thenpas, Kahas, Thahas thiab Ma‑akhas.