Xalas Tuag

1 Xalas hnub nyoog nyob tau ib puas nees nkaum xya xyoo.

2 Xalas tuag hauv lub moos Khiliyas Anpas (uas yog Henploos) hauv Khana‑as tebchaws. Anplaham pam Xalas thiab quaj quaj nco nco Xalas.

3 Anplaham ho sawv ntawm Xalas lub cev tuag mus hais rau cov tibneeg Hithais hais tias,

4 Kuv yog tibneeg lwm tebchaws los ua qhua nrog nej nyob. Thov nrog nej yuav ib thaj av rau kuv siv ua toj ntxas, kom kuv thiaj tau chaw muab tus tuag mus faus kom ploj ntawm lub qhov muag mus.

5 Cov Hithais teb Anplaham tias,

6 Yawg hlob, thov koj mloog peb hais. Koj yog ib tug ua hlob hauv peb cov ntag. Cia koj coj koj tus tuag mus faus rau hauv peb tej qhov ntxa lub uas zoo kawg nkaus. Tsis muaj leejtwg yuav tav tsis kheev koj muab koj tus tuag faus rau hauv nws lub qhov ntxa ntawd.

7 Anplaham txawm sawv tsees los nyo hau pe cov Hithais uas nyob lub teb­chaws ntawd,

8 thiab nws hais rau lawv hais tias, yog nej kheev kuv faus kuv tus tuag tiag, thov nej mloog kuv hais thiab pab nrog kuv thov Xauhas tus tub Efoos

9 muab nws lub qhov tsua Mapelas uas nyob ntawm nws ntug teb rau kuv. Thov kom nws muab muag rau kuv tab meeg nej sawvdaws xubntiag, kom txaus nkaus tus nqe, kuv thiaj muaj ib thaj av siv ua toj ntxas ua kuv tug.

10 Efoos kuj nrog cov Hithais zaum ua ke ntawd, mas Efoos uas yog tibneeg Hithais thiaj teb Anplaham tab meeg cov Hithais sawvdaws uas tuaj nyob ua ke ntawm rooj loog hais tias,

11 Tsis txhob ua li, yawg hlob. Thov koj mloog kuv hais. Kuv yuav pub daim teb thiab lub qhov tsua uas nyob ntawm daim teb ntawd rau koj.  Kuv pub rau koj tab meeg kuv cov tibneeg sawvdaws. Cia li coj koj tus tuag mus faus rau hauv. 

12 Anplaham rov nyo hau pe cov tibneeg tebchaws ntawd,

13 mas nws hais rau Efoos tab meeg cov tibneeg hauv lub tebchaws ntawd hnov tias, yog koj kheev, thov koj mloog kuv hais thiab. Kuv yuav them cov nqe teb ntawd rau koj, koj cia li txais ntawm kuv kom kuv thiaj tau chaw faus tus tuag rau ntawd.

14 Efoos teb Anplaham tias,

15 Yawg hlob, thov koj mloog kuv hais. Daim teb mas tus nqe yog plaub puas sekhees nyiaj, tiamsis koj thiab kuv mas tsis txhob xav li cas. Cia li coj koj tus tuag mus faus rau hauv xwb.

16 Anplaham thiaj li nrog Efoos hais haum thiab Anplaham luj cov nyiaj txwm nkaus li tus nqe uas Efoos hais rau nws tab meeg cov Hithais hnov lawd, yog plaub puas Sekhees txwm nkaus li uas tej tub lag tub luam luj rau ncua sijhawm ntawd.

17 Efoos daim teb hauv Mapelas uas nyob ntawm Males sab hnub tuaj, mas nws muag tag nrho thaj teb thiab lub qhov tsua, thiab tej xyoob ntoo uas nyob hauv thaj teb ntawd huvsi

18 rau Anplaham yuav ua Anplaham tug tab meeg cov Hithais sawvdaws uas tuaj ua ke ntawm rooj loog xubntiag.

19 Ces Anplaham txawm muab nws tus pojniam Xalas faus rau hauv lub qhov tsua ntawm thaj teb Mapelas uas nyob ntawm Males sab hnub tuaj, uas yog Henploos, hauv Khana‑as tebchaws.

20 Daim teb thiab lub qhov tsua ntawm daim teb ntawd, mas cov Hithais muab muag kiag rau Anplaham yuav ua Anplaham tug, mas Anplaham thiaj tau chaw faus tuag.