Yuav Pojniam Rau Ixaj 

1 Nimno Anplaham laus heev lawm, hnub nyoog nchav lawm. Thiab (יחוח)Yahweh tau foom koob hmoov rau Anplaham txhua yam.

2 Anplaham hais rau nws tus tub qhe uas hnub nyoog laus dua tej hauv nws tsev, yog tus uas saib xyuas txhua yam uas Anplaham muaj, hais tias, muab koj txhais tes los tso rau hauv kuv txhais ncej qab.

3 Mas kuv yuav kom koj tuav (יחוח)Yahweh uas yog tus kav saum ntuj thiab hauv lub ntiajteb lub npe cog lus twv tias, koj yuav tsis yuav cov tibneeg Khana‑as uas kuv nrog nyob no, tej ntxhais rau kuv tus tub ua pojniam.

4 Tiamsis koj yuav mus rau kuv lub qub tebchaws thiab rau kuv cov kwvtij, thiab yuav ib tug pojniam rau kuv tus tub Ixaj.

5 Tus tub qhe hais rau nws tias, yog tus ntxhais tsis kam nrog kuv los rau lub tebchaws no, ces kuv yuav coj koj tus tub mus rau hauv lub tebchaws uas koj tsiv tawm los ntawd lov?

6 Anplaham hais rau nws tias, ceev faj tsis txhob coj kuv tus tub rov qab mus rau qhov ntawd.

7(יחוח)Yahweh uas yog Tus Tswv saum ntuj, yog tus uas coj kuv tawm hauv kuv txiv tsev los thiab tawm hauv lub tebchaws uas yug kuv, thiab cog lus tseg ruaj rau kuv hais tias, kuv yuav pub lub teb­chaws no rau koj caj ces, mas (יחוח)Yahweh yuav tso nws tus tubtxib saum ntuj mus ua koj ntej, mas koj thiaj yuav yuav ib tug pojniam hauv lub tebchaws ntawd rau kuv tus tub.

8 Yog tus pojniam tsis kam nrog koj los, koj yuav dim tej lus uas cog twv rau kuv no. Tsuav yog koj tsis txhob coj kuv tus tub rov qab mus rau lub tebchaws ntawd xwb.

9 Tus tub qhe thiaj muab nws txhais tes tso rau hauv qab nws tus lospav Anplaham txhais ncej qab, thiab cog lus twv tias yuav ua raws li ntawd.

10 Tus tub qhe txawm coj nws tus lospav kaum tus ntxhuav tawm mus, thiab coj ntau yam qhov txhia chaw tsim txiaj ntawm nws tus lospav mus. Nws taug kev mus rau Alas Nahalais tebchaws, mus txog Nahaus lub moos.

11 Nws ua kom cov ntxhuav txhos caug rau ntawm ntug qhov dej nraum lub moos yog lub sijhawm yuav tsaus ntuj uas cov pojniam tawm tuaj ntaus dej.

12 Nws hais tias, Au (יחוח)Yahweh, uas yog kuv Tus Tswv Anplaham Tus Tswv, thov koj coj kuv txoj hauv kev kom tiav rau hnub no, thiab qhia txojkev hlub uas ruaj khov rau kuv Tus Tswv Anplaham. 13 Kuv tabtom sawv ntsug ntawm ntug qhov dej txhawv, thiab cov tibneeg hauv lub moos tej ntxhais tabtom tawm tuaj ntaus dej.

14 Tus ntxhais uas kuv hais rau nws tias, thov txo koj lub taub dej rau kuv haus, ces nws hais tias, haus maj, thiab kuv yuav ntaus dej rau koj cov ntxhuav haus huvsi, mas thov cia tus ntawd yog tus uas koj tau teem cia ua koj tus tub qhe Ixaj tus pojniam. Yog li no, kuv thiaj paub tseeb tias koj qhia koj txojkev hlub uas ruaj khov rau kuv Tus Tswv Anplaham.

15 Thaum nws hais lus tsis tau xaus, ua ciav Lenpekhas uas yog Npethu‑ees tus ntxhais kwv nws lub taub dej saum xub pwg tawm tuaj. Npethu‑ees niam yog Meekhas, txiv yog Nahaus uas yog Anplaham tus kwv.

16 Tus hluas nkauj ntawd zoo nkauj heev, yog ib tug ntxhais dawb huv tsis tau muaj ib tug deev li.  Nws nqes mus rau ntawm lub qhov dej txhawv ntaus dej puv lub taub thiab nce rov los.  

17 Anplaham tus tub qhe khiav loo mus tos thiab hais tias, thov koj hliv mentsis dej hauv koj lub taub rau kuv haus.

18 Nws teb tias, Yawg hlob, haus maj, ces nws txawm txo plhuav nws lub taub dej cev rau haus.

19 Thaum cev rau haus tag lawm, nws txawm hais tias, kuv yuav ntaus dej rau koj cov ntxhuav haus kom tsau huvsi.

20 Nws maj nroos hliv dej hauv nws lub taub rau hauv lub tais thiab khiav rov mus ntaus dej ntawm lub qhov dua, thiab nws ntaus dej rau cov ntxhuav haus huvsi.

21 Anplaham tus tub qhe saib twjywm tus hluas nkauj ntawd, xav paub tias (יחוח)Yahweh coj nws txojkev uas tuaj tiav lawm los tsis tau.

22 Thaum cov ntxhuav haus dej tag lawm, tus yawg ntawd txawm muab ib lub khawb kub ntawm qhov ntswg hnyav ib nrab sekhees, thiab ib nkawg tooj npab kub hnyav kaum sekhees, rau Lenpekhas coj ntawm txhais tes,

23 thiab hais tias, thov qhia kuv saib koj yog leejtwg tus ntxhais.  Hauv koj txiv tsev muaj chaw rau peb so los tsis muaj?

24 Nws teb tias, kuv yog Npethu‑ees tus ntxhais, kuv yawg yog Nahaus, kuv pog yog Meekhas.

25 Thiab nws hais ntxiv tias, peb muaj quav nyab thiab mov noj txaus thiab muaj chaw so.

26 Tus yawg ntawd txawm nyo hau thiab pe (יחוח)Yahweh, 

27 thiab nws hais tias, Qhuas (יחוח)Yahweh uas yog kuv Tus Tswv Anplaham Tus Tswv. Nws tsis tso nws txojkev hlub ruaj khov tseg thiab nws yeej ua raws li nws cog lus tseg rau kuv Tus Tswv. Kuv mas (יחוח)Yahweh tau coj kuv taug kev tuaj txog kuv Tus Tswv tsev kwvtij.

28 Mas tus hluas nkauj thiaj khiav mus hais rau nws niam tsev neeg paub txog tej no.

29 Lenpekhas muaj ib tug nus hu ua Lanpas. Lanpas thiaj khiav loo mus saib tus yawg ntawd tom qhov dej txhawv.

30 Thaum nws pom lub khawb ntswg thiab tej tooj npab ntawm nws tus muam txhais tes thiab hnov tej lus uas nws tus muam Lenpekhas hais tias, tus yawg ntawd tau hais rau nws, Lanpas txawm mus saib tus yawg ntawd mas pom nws sawv ntsug ua ke nrog cov ntxhuav ntawm qhov dej.

31 Nws hais tias, koj yog tus uas tau (יחוח)Yahweh li hmoov zoo, cia li los tsev. Koj nyob nraum no ua abtsi? Kuv twb npaj vaj tse thiab npaj chaw rau koj cov ntxhuav lawm.

32 Tus yawg ntawd thiaj los rau hauv tsev, mas Lanpas daws tej ntxhuav thiab muab quav nyab thiab zaub rau cov ntxhuav noj, thiab muab dej rau nws thiab cov uas nrog nws tuaj ntxuav kotaw,

33 thiab rau zaub mov rau tus yawg ntawd noj. Tiamsis nws hais tias, kuv yuav tsis noj mus txog thaum kuv hais tej lus uas kuv yuav hais tag tso. Lanpas kuj hais tias, cia li hais.

34 Nws thiaj hais tias, kuv yog Anplaham tus tub qhe.

35 (יחוח)Yahweh tau foom koob hmoov rau kuv Tus Tswv ntau heev, thiab nws kuj vam meej. (יחוח)Yahweh pub tej niag pab yaj, tiaj niag pab tshis, tej pab nyuj, nyiaj thiab kub, tub qhe nkauj qhe, tej ntxhuav thiab nees luav rau nws.

36 Xalas uas yog kuv Tus Tswv tus pojniam yug tau ib tug tub rau nws thaum nws laus lawm, mas kuv Tus Tswv muab kiag txhua yam uas nws muaj rau nws tus tub.

37 Kuv Tus Tswv kom kuv cog lus twv thiab hais tias, koj tsis txhob yuav cov tibneeg Khana‑as uas kuv nrog nyob no tej ntxhais ua kuv tus tub pojniam.

38 Tiamsis koj yuav rov qab mus rau kuv txiv tsev neeg thiab rau kuv cov kwvtij, thiab yuav ib tug pojniam rau kuv tus tub.

39 Kuv hais rau kuv Tus Tswv tias, tsam tus pojniam ntawd tsis kam nrog kuv los.

40 Tiamsis nws hais rau kuv tias, (יחוח)Yahweh uas kuv nrog nraim yuav tso nws tus tubtxib saum ntuj nrog koj mus thiab ua rau txojkev uas koj mus tiav. Koj yuav yuav tau pojniam ntawm kuv cov kwvtij thiab hauv kuv txiv lub tsev rau kuv tus tub.

41 Thaum koj mus txog kuv cov kwvtij, koj thiaj dim tej lus uas koj cog twv rau kuv lawm. Yog lawv tsis yeem pub tus ntxhais ntawd rau koj, koj kuj yuav dim tej lus uas koj cog twv rau kuv.

42 Hnub no kuv tuaj txog ntawm lub qhov dej txhawv thiab hais tias, Au (יחוח)Yahweh, uas yog kuv Tus Tswv Anplaham Tus Tswv, thov koj coj kuv txoj hauv kev kom tiav nimno.

43 Kuv tabtom sawv ntsug ntawm ntug qhov dej no, mas tus ntxhais uas tuaj ntaus dej uas kuv hais rau nws tias, thov muab mentsis dej ntawm koj lub taub rau kuv haus,

44 ces nws hais tias, haus maj thiab kuv yuav ntaus dej rau koj cov ntxhuav haus, mas thov cia tus ntawd yog tus uas (יחוח)Yahweh tau teem cia ua kuv Tus Tswv tus tub pojniam.

45 Thaum kuv hais hauv lub siab tsis tau tag, ua ciav Lenpekhas kwv nws lub taub dej saum xub pwg tawm tuaj thiab nqes mus ntaus dej ntawm lub qhov dej txhawv. Kuv hais rau nws tias, thov mentsis dej rau kuv haus.

46 Nws txawm maj nroos txo lub taub dej saum xub pwg los thiab hais tias, haus maj. Kuv tseem yuav muab dej rau koj cov ntxhuav haus thiab. Ces kuv txawm haus, thiab nws kuj ntaus dej rau cov ntxhuav haus thiab.

47 Mas kuv thiaj nug nws tias, koj yog leejtwg tus ntxhais? Nws teb tias, kuv yog Npethu‑ees tus ntxhais, kuv yawg yog Nahaus, kuv pog yog Meekhas. Kuv thiaj muab lub khawb khawm rau nws qhov ntswg thiab muab tooj npab rau nws coj ntawm txhais tes.

48 Thiab kuv nyo hau pe (יחוח)Yahweh thiab qhuas (יחוח)Yahweh uas yog kuv Tus Tswv Anplaham Tus Tswv, yog tus uas coj kuv taug txojkev uas raug lawm, thiaj tau kuv Tus Tswv cov txheeb ze tus ntxhais rau nws tus tub.

49 Nimno yog nej kam ua zoo ua ncaj rau kuv Tus Tswv, los thov hais rau kuv paub. Txawm tsis ua li ntawd los hais rau kuv paub, xwv kuv thiaj txawj mus rau sab xis lossis sab laug.

50 Lanpas thiab Npethu‑ees txawm teb tias, tej no yog los ntawm (יחוח)Yahweh los. Peb yuav hais siab hais qes rau koj tsis tau.

51 Lenpekhas twb nyob ntawm koj xub­ntiag no, cia li coj nws es mus, cia nws ua koj Tus Tswv tus tub cov pojniam raws li (יחוח)Yahweh hais lawm.

52 Thaum Anplaham tus tub qhe tau hnov lawv tej lus lawm, nws txawm khoov ntshis hauv pem teb pe (יחוח)Yahweh.

53 Nws rho tej saw nyiaj saw kub thiab tsoos tsho los muab rau Lenpekhas. Nws tseem muab tej qhov txhia chaw tseem ceeb tsim txiaj rau tus nus thiab leej niam.

54 Nws thiab cov tibneeg uas nrog nws tuaj thiaj noj, thiaj haus, thiab pw ib hmos ntawd. Thaum lawv sawv ntxov tsees, Anplaham tus tub qhe hais tias, thov tso kuv rov qab mus kom txog kuv Tus Tswv.

55 Tus nus thiab leej niam hais tias, cia peb tus ntxhais nrog peb nyob ib ntus, yam tsawg yog kaum hnub, nws li mus tau.

56 Tiamsis Anplaham tus tub qhe hais rau nkawv tias, tsis txhob cheem kuv, rau qhov (יחוח)Yahweh twb coj kuv txojkev tuaj tiav lawm. Thov cia kuv mus kuv thiaj tau rov mus txog kuv Tus Tswv.

57 Nkawv hais tias, cia wb hu tus ntxhais los nug saib.

58 Nkawv thiaj hu Lenpekhas los, thiab hais rau nws tias, koj yuav nrog tus yawg no mus los tsis mus? Nws teb tias, kuv mus thiab.

59 Lawv thiaj xa tus muam Lenpekhas thiab tus nkauj qhe uas tu nws nrog Anplaham tus tub qhe thiab nws cov tibneeg mus.

60 Lawv txawm foom koob hmoov rau Lenpekhas hais tias, leej muam, thov koj tau ua qas txhiab qas vam tibneeg leej niam. Thov kom koj caj ces tau yeeb ncuab lub rooj loog ua lawv tug.

61 Mas Lenpekhas thiab nws cov nkauj qhe kuj sawv kev caij ntxhuav nrog Anplaham tus tub qhe mus.  Tus tub qhe thiaj coj Lenpekhas taug kev mus.

62 Ixaj twb tawm ntawm Npe‑aws Lahailais mus nyob nram Nekes lawm.

63 Thaum yuav tsaus ntuj Ixaj tawm mus ncig ua si tom teb, nws tsa muag saib ua ciav pom ib pab ntxhuav taug kev los.

64 Lenpekhas tsa muag saib, mas thaum nws pom Ixaj nws txawm nqis saum ntxhuav los,

65 thiab hais rau Anplaham tus tub qhe tias, tus yawg tid uas tabtom taug kev tuaj ntsib peb yog leejtwg? Tus tub qhe tias, yog kuv Tus Tswv. Lenpekhas thiaj muab txoj phuam los npog nws ntsej muag.

66 Anplaham tus tub qhe piav txhua yam uas nws ua lawm rau Ixaj paub.

67 Ixaj txawm coj Lenpekhas nkag rau hauv nws niam Xalas lub tsev ntaub, thiab yuav Lenpekhas ua nws pojniam, nws kuj nyiam Lenpekhas. Nws niam txawm tuag lawm los Ixaj thiaj rov zoo siab.