Anplaham Thiab Khethulas Caj Ces

(1 Vaj Keeb Kwm 1:32-33)

1Anplaham yuav dua ib tug pojniam npe hu ua Khethulas.

2 Nws yug tau cov tub no rau Anplaham, yog Xislas, Yaujsas, Medas, Midees, Isanpas thiab Sawsas.

3 Yaujsas yog Senpas thiab Dedas txiv. Dedas cov tub yog Asulis, Lethusis thiab Le‑umis.

4 Midees cov tub yog Efas, Efaws, Hanaus, Anpidas thiab Eeda‑as. Cov no huvsi yog Khethulas cov tub ki xeeb ntxwv.

5 Anplaham muab kiag nws lub cuab txhiaj cuab tam huvsi rau Ixaj.

6 Anplaham kuj muab qhov txhia chaw rau nws niam yau cov tub thiab. Thaum nws tseem ua neej nyob, nws kom lawv ncaim nws tus tub Ixaj mus rau sab hnub tuaj mus nyob rau hauv lub tebchaws uas nyob sab hnub tuaj.

​

Anplaham Tuag Thiab Muab Faus

7 Anplaham li hnub nyoog huvsi muaj ib puas xya caum tsib xyoos.

8 Anplaham tu siav rau thaum nws laus heev, hnub nyoog ntau heev lawm, mas nws mus nrog nws tej poj koob yawm txwv nyob.

9 Ixaj thiab Yisama‑ees uas yog nws 2 tus tub kuj muab nws faus rau hauv lub qhov tsua Mapelas uas nyob hauv Xauhas tus tub Efoos uas yog tibneeg Hithais daim teb ntawm Males sab hnub tuaj,

10 yog daim teb uas Anplaham yuav ntawm cov Hithais los.  Lawv muab Anplaham faus rau qhov ntawd nrog nws tus pojniam Xalas ua ke.

11 Thaum Anplaham tuag lawm, (יחוח)Yahweh foom koob hmoov rau nws tus tub Ixaj. Ixaj nyob ntawm Npe‑aws Lahailais.

​

Yisama‑ees Caj Ces

(1 Vaj Keeb Kwm 1:28-31)

12 Ntawm no mus yog Yisama‑ees caj ces, nws yog Anplaham tus tub uas Xalas tus nkauj qhe Hakas uas yog tibneeg Iziv yug rau Anplaham.

13 No yog Yisama‑ees cov tub tej npe, raws tus hlob rau cov yau zuj zus mus. Yisama‑ees tus tub hlob yog Nenpayaus, cov yau yog Khedas, Anpe‑ees, Mixas,

14 Misamas, Dumas, Maxas,

15 Hadas, Themas, Yethus, Nafis thiab Khedemas.

16 Cov no yog Yisama‑ees cov tub thiab no yog lawv tej npe uas hu rau lawv tej zej zog thiab hu rau lawv tej chaw nyob, yog kaum ob tug thawj rau hauv lawv txhua xeem.

17 Yisama‑ees li hnub nyoog huvsi muaj ib puas peb caug xya xyoo. Nws tu siav mus nrog nws tej poj koob yawm txwv nyob.

18 Lawv cov ntawd nyob txij ntua lub moos Havilas mus txog lub moos Saws uas nyob ntawm Iziv ib sab mus rau Axilias tebchaws. Lawv nrog lawv cum nyob ua yeeb ncuab rau lawv cov kwvtij.

​

Yug Exaus Thiab Yakhauj

19 Ntawm no mus yog Ixaj uas yog Anplaham tus tub caj ces. Anplaham yog Ixaj txiv.

20 Ixaj hnub nyoog muaj plaub caug xyoo nws li yuav tau Lenpekhas ua pojniam, yog Npethu‑ees tus ntxhais uas yog tibneeg Alas nyob tebchaws Padas Alas, thiab yog Lanpas uas yog tibneeg Alas tus muam.

21 Ixaj thov (יחוח)Yahweh rau nws tus pojniam, vim yog nws tsis xeeb tub (יחוח)Yahweh pub raws li nws thov, nws tus pojniam Lenpekhas thiaj xeeb tub.

22 Menyuam kuj sib txiv hauv nws lub plab nws thiaj hais tias, yog zoo li no, kuv yuav muaj txojsia nyob ua abtsi? Lenpekhas thiaj mus ua nug rau (יחוח)Yahweh.

23 (יחוח)Yahweh hais rau nws tias, muaj ob lub tebchaws nyob hauv koj lub plab, ob haiv neeg uas koj yug ntawd yuav sib ncaim, ib tug yuav muaj zog heev dua ib tug, tus tij yuav ua tus kwv qhev.

24 Thaum txog caij uas Lenpekhas yug menyuam lawm, ua ciav muaj ib nkawg menyuam ntxaib hauv nws lub plab. 

25 Yug thawj tug los yog ib tug menyuam liab tawv tuaj plaub thoob plaws ib ce yam nkaus li lub tsho plaub. Lawv thiaj tis lub npe hu ua Exaus.

26 Dhau ntawd yug tus kwv los, nws txhais tes tuav rawv Exaus luj taws. Lawv thiaj tis npe hu ua Yakhauj. Thaum Lenpekhas yug khub menyuam ntxaib ntawd, Ixaj hnub nyoog muaj rau caum xyoo.

​

Exaus Muab Nws Feem Uas Ua Tij Muag

27 Thaum ob tug metub hlob lawm, Exaus yog ib tug txawj tua nqaij thiab yog ib tug nyob nruab nrag xwb, tiamsis Yakhauj mas yog tus uas nyob hauv tsev ntau ua siab tus yees.

28 Ixaj nyiam Exaus, vim nws pheej tau noj tej nqaij qus uas Exaus tua tau los. Tiamsis Lenpekhas nyiam Yakhauj.

29 Muaj ib hnub thaum Yakhauj tabtom hau zaub, Exaus rov tom hav zoov los tshaib plab heev.

30 Exaus hais rau Yakhauj tias, thov cia kuv noj cov taum liab ntawd ib txhia rau qhov kuv tshaib plab heev. (Vim li ntawd thiaj muab nws hu ua Edoos.)

31 Yakhauj hais tias, muab koj feem uas ua tij muag rau kuv ua ntej tso.

32 Exaus txawm hais tias, kuv twb yuav tuag, feem uas ua tij yuav muaj qabhau abtsi rau kuv?

33 Yakhauj txawm hais tias, cog lus twv cia tso. Exaus txawm cog lus twv cia thiab muab nws feem uas ua tij muag rau Yakhauj.

34 Yakhauj thiaj muab ncuav thiab cov taum liab uas hau tau lawm rau Exaus noj. Thaum Exaus noj thiab haus tag ces nws sawv taug kev lawm. Ua li no yog Exaus saib tsis taus nws feem uas ua tij.