Ixaj Thiab Anpimelej

1 Tom qab no tebchaws Khana‑as rov raug kev tshaib plab, ib yam li tiam uas thaum Anplaham tseem ua neej nyob, mas Ixaj thiaj tsiv mus cuag cov Filixatees tus vajntxwv Anpimelej nram lub moos Kelas. 

2 (יחוח)Yahweh thiaj tshwm los rau Ixaj pom thiab hais tias, tsis txhob mus nyob nram Iziv tebchaws, cia li nyob hauv lub tebchaws uas kuv qhia rau koj xwb.

3 Nyob hauv lub tebchaws no ib ntus xwb, kuv thiaj li nrog koj nyob thiab foom koob hmoov rau koj. Kuv yuav muab tej tebchaws no huvsi pub rau koj thiab koj caj ces. Kuv yuav ua kom tej lus uas kuv twb cog tseg ruaj rau koj txiv Anplaham lawd tiav huvsi.  

4 Kuv yuav ua rau koj caj ces huaj vam coob yam li cov hnub qub saum nruab ntug thiab yuav muab tej tebchaws no huvsi pub rau lawv. Ib tsoom tebchaws hauv lub ntiajteb yuav tau koob hmoov ntawm koj caj ces los.  

5 Vim yog Anplaham mloog kuv lus thiab ua raws li kuv hais, thiab tuav rawv kuv tej lus cob qhia, thiab kuv tej kab ke, thiab kuv tej kevcai huvsi.  

6 Ixaj thiaj nyob ntawm Kelas.  

7 Thaum cov txivneej hauv lub moos ntawd nug txog nws tus pojniam, nws txawm teb lawv tias, yog kuv tus muam xwb, rau qhov nws ntshai, nws tsis kam lees tias yog kuv pojniam. Nws xav tias tsam cov txivneej ntawd ho muab nws tua, vim yog lawv xav yuav Lenpekhas, rau qhov nws zoo nkauj kawg li.

8 Thaum Ixaj nyob qhov ntawd tau ntev loo, mas cov Filixatees tus vajntxwv Anpimelej xauj qhov rais pom Ixaj tawb tawb Lenpekhas uas yog nws pojniam.

9 Ces Anpimelej txawm hu Ixaj tuaj cuag nws thiab hais tias, Lenpekhas twb yog koj tus pojniam nev, ua cas koj dag hais tias, yog koj tus muam no? Ixaj teb vajntxwv hais tias, rau qhov kuv xav tias tsam luag ho muab kuv tua, vim xav yuav nws.  

10 Anpimelej txawm hais tias, koj ua abtsi li no rau peb os? Tsam muaj ib tug twg ho nkag kiag mus nrog koj pojniam pw, ces kuj yog koj coj txim los rau peb.

11 Anpimelej thiaj hais tawv rau cov pejxeem sawvdaws tias, yog leejtwg ua li cas rau tus yawg no thiab nws tus pojniam, mas yuav raug muab tua pov tseg xwb.  

12 Ixaj cog qoob cog loo hauv tebchaws ntawd, mas xyoo ntawd nws sau tej qoob tau ib puas npaug los, vim yog (יחוח)Yahweh foom koob foom hmoov rau nws.

13 Ixaj nplua nuj vam meej zuj zus ciaj tuam lospav nplua nuj heev.  

14 Nws muaj tej niag pab tshis, tej pab yaj, tej pab nyuj, thiab muaj tub mab tub qhe coob, mas cov Filixatees khib siab heev rau nws.

15 Cov Filixatees twb muab av txhub txhua lub qhov dej uas thaum ub nws txiv Anplaham tseem ua neej nyob es Anplaham tej tub qhe khawb cia lawd huvsi.

16 Anpimelej txawm hais rau Ixaj tias, koj cia li khiav ntawm peb mus, vim koj muaj zog dua peb lawm.

17 Ixaj thiaj tawm qhov ntawd khiav mus tsuam chaw nyob rau ntawm lub hav Kelas, ces nws txawm nyob ntawd.  

18 Ixaj thiaj muab tej qub qhov dej uas thaum ub nws txiv Anplaham tseem ua neej nyob es khawb cia lawd, khawb dua, vim yog thaum Anplaham tuag lawd, cov Filixatees muab tej qhov dej ntawd txhub tag lawm. Mas Ixaj thiaj tis npe rau tej qhov dej ntawd raws li uas thaum nws txiv twb tis cia lawd.  

19 Thaum Ixaj cov tub qhe khawb ntawm hav Kelas, mas khawb tau ib lub qhov dej txhawv zoo heev.  

20 Tiamsis cov tibneeg Kelas uas yug tsiaj, txawm nrog Ixaj cov tub qhe yug tsiaj sib cav hais tias, lub qhov dej yog peb li hos. Ixaj thiaj tis npe rau lub qhov dej ntawd hu ua Exes, vim lawv nrog nws sib cav. 

21 Lawv rov khawb dua ib lub qhov dej mas cov Kelas kuj nrog lawv sib cav txog lub qhov dej ntawd thiab.  Ixaj thiaj tis npe rau lub qhov dej ntawd hu ua Xinas.

22 Nws kuj tsiv tawm qhov ntawd mus khawb dua ib lub qhov dej mas tsis muaj tibneeg sib cav txog lub qhov dej ntawd, nws thiaj tis npe rau lub qhov dej ntawd hu ua Lehaunpaus, mas nws hais tias, nimno (יחוח)Yahweh pub chaw rau peb nyob lawm mas peb yuav vam meej rau hauv lub tebchaws no lauj.

23 Ixaj kuj tawm qhov ntawd mus rau pem Npe‑awsenpas.  

24 Hmo ntawd (יחוח)Yahweh tshwm los rau Ixaj pom thiab hais rau nws tias, kuv yog koj txiv Anplaham Tus Tswv, koj tsis txhob ntshai, rau qhov kuv yeej nrog nraim koj nyob, thiab kuv yuav foom koob hmoov rau koj, thiab kuv yuav ua rau koj caj ces huaj vam coob, vim yog kuv saib rau kuv tus tub qhe Anplaham. 

25 Ixaj txawm tib ib lub thaj rau qhov ntawd thiab nws tuav (יחוח)Yahweh lub npe thov (יחוח)Yahweh. Nws tsa tsev ntaub nyob qhov ntawd, thiab nws cov tub qhe kuj khawb dua ib lub qhov dej rau ntawd thiab.

​

Ixaj Thiab Anpimelej Cog Lus Sib Raug Zoo

26 Anpimelej thiab nws tus tub tuavxam Ahuxas thiab nws tus thawj rog Fikhaus txawm tawm hauv Kelas tuaj cuag Ixaj.  

27 Ixaj nug lawv hais tias, ua cas nej ho yuav tuaj cuag kuv? Nej twb ntxub ntxub kuv es muab kuv ntiab khiav tawm mus nev?  

28 Lawv teb hais tias, peb pom tseeb tias, (יחוח)Yahweh nrog nraim koj nyob, peb thiaj hais tias, cia peb thiab koj sib cog lus twv tseg, thiab nrog koj cog lus sib raug zoo hais tias,

29 koj yuav tsis ua phem li cas rau peb yam li uas peb twb tsis ua ib nyuag qhov phem rau koj li, peb tsuas yog ua zoo rau koj xwb, thiab peb xa koj mus zoo tso siab lug. Nimno (יחוח)Yahweh twb foom koob hmoov rau koj lawm.  

30 Ces Ixaj txawm npaj ib rooj mov los rau lawv, mas lawv thiaj noj thiaj haus.

31 Tagkis tom qab lawv sawv ntxov ntxov los sib cog lus twv tseg tag, Ixaj li xa lawv mus, lawv thiaj mus ua tso siab lug.  

32 Tib hnub ntawd, Ixaj cov tub qhe los hais rau nws txog lub qhov dej uas lawv khawb tau lawm hais tias, peb ntsib dej lawm.   

33 Ixaj muab lub qhov dej ntawd tis npe hu ua Sinpas, mas thiaj hu lub moos ntawd ua Npe‑awsenpas txog niaj hnub nimno.  

34 Thaum Exaus hnub nyoog muaj plaub caug xyoo, nws yuav Npe‑awlias uas yog tibneeg Hithais tus ntxhais Yudis ua pojniam, thiab nws yuav Eloos uas yog tib­neeg Hithais tus ntxhais Npaxemas ua pojniam.  

35 Cov nyab no ua rau Ixaj thiab Lenpekhas nkawv lub neej nyuaj siab kawg li.