Ixaj Foom Koob Hmoov Rau Yakhauj

1Thaum Ixaj laus lawm, qhov muag plooj tsis pom kev lawm, nws thiaj hu nws tus tub hlob Exaus hais tias, tub es, Exaus teb tias, kuv nyob no os.   

2 Ixaj hais tias, nimno kuv laus heev li lawm. Kuv tsis paub hnub uas kuv yuav tuag.

3 Koj cia li coj koj tej cuab yeej mus, coj koj raj xub thiab rab hneev tawm mus yos hav zoov tua nqaij los rau kuv.

4 Cia li npaj ib pluag qab qab los rau kuv, yam li kuv nyiam thiab coj los rau kuv noj, kuv thiaj foom koob hmoov rau koj ua ntej uas kuv tsis tau tuag.  

5 Thaum Ixaj hais tej lus ntawd rau nws tus tub Exaus, Lenpekhas kuj mloog twjywm thiab. Thaum Exaus tawm mus tua nqaij tom hav zoov lawm,

6 Lenpekhas txawm hais rau nws tus tub Yakhauj tias, kuv hnov koj txiv hais rau koj tus tijlaug Exaus tias,

7 cia li coj nqaij qus los rau kuv thiab npaj ib pluag qab qab rau kuv noj, kuv thiaj foom koob hmoov rau koj tab meeg (יחוח)Yahweh lub xubntiag ua ntej uas kuv tsis tau tuag.  

8 Vim li no, kuv tub es, koj cia li ua raws nraim li uas kuv hais rau koj.

9 Cia li mus tom pab tshis, ntes ob tug menyuam tshis zoo zoo los rau kuv, kuv thiaj npaj tau tej zaub mov qab yam li koj txiv nyiam rau nws.  

10 Ces koj nqa mus rau koj txiv noj, nws thiaj foom koob hmoov rau koj ua ntej uas nws tsis tau tuag.  

11 Yakhauj thiaj hais rau nws niam Lenpekhas tias, koj sim saib maj, kuv tus tijlaug Exaus tuaj plaub thoob plaws ib ce, tiamsis kuv mas ib ce du lug xwb.

12 Tsam ces kuv txiv cev tes xuas kuv, mas yuav zoo li kuv dag ntxias nws, ces nws yuav foom tsis zoo rau kuv, tsis yog foom zoo.

13 Nws niam hais rau nws tias, tub es, cia qhov uas raug foom tsis zoo poob rau kuv ris. Tsuav yog koj ua raws li kuv hais thiab mus ntes menyuam tshis los rau kuv xwb.

14 Yakhauj txawm mus ntes coj los rau nws niam, nws niam thiaj npaj tej zaub mov qab yam li nws txiv nyiam.

15 Ces Lenpekhas txawm muab nws tus tub hlob Exaus tej tsoos tsho uas zoo kawg hauv tsev pub rau nws tus tub yau Yakhauj hnav.  

16 Nws muab ob tug menyuam tshis ntawd cov tawv los qhwv Yakhauj tes thiab lub caj pas uas du lug.

17 Ces nws txawm muab tej zaub mov qab qab thiab ncuav uas nws npaj ntawd rau hauv nws tus tub Yakhauj txhais tes.

18 Yakhauj thiaj nkag mus rau hauv leej txiv thiab hais tias, kuv txiv. Nws hais tias, tub es, kuv nyob ntawm no, koj yog leejtwg?

19 Yakhauj hais rau leej txiv tias, kuv yog koj tus tub hlob Exaus. Kuv twb ua raws li uas koj hais rau kuv lawm. Cia li sawv los noj tej nqaij uas kuv mus tua tau los es koj foom koob hmoov rau kuv.

20 Ixaj hais rau nws tus tub tias, tub es, ua cas koj nrhiav tau sai ua luaj? Nws teb tias, vim yog (יחוח)Yahweh uas yog koj Tus Tswv pub kuv tua tau. 

21 Mas Ixaj hais rau Yakhauj tias, tub es, txav los ze ze mas kuv yuav xuas koj, xwv thiaj paub tias koj yog kuv tus tub Exaus tiag los tsis yog.  

22 Yakhauj txawm txav mus ze nws txiv Ixaj. Ixaj thiaj xuas nws lub cev thiab hais tias, lub suab yog Yakhauj tiamsis txhais tes yog Exaus li.  

23 Nws tsis paub Yakhauj lawm, vim ob txhais tes muaj plaub yam nkaus li nws tus tijlaug Exaus txhais tes. Nws thiaj foom koob hmoov rau Yakhauj.  

24 Nws nug tias, koj yog kuv tus tub Exaus tiag lov? Nws teb tias, yog kawg.

25 Leej txiv thiaj hais tias, koj coj zaub mov los rau kuv, kuv yuav noj tej nqaij uas kuv tus tub tua tau los thiab foom koob hmoov rau koj. Yakhauj thiaj coj los rau nws, nws thiaj noj. Yakhauj coj cawv txiv hmab rau nws, nws kuj haus.

26 Mas nws txiv Ixaj thiaj hais rau nws tias, tub es, txav los ze thiab nwj kuv.

27 Nws thiaj txav los ze thiab nwj leej txiv. Leej txiv hnia tus ntxhiab ntawm nws lub tsho thiab foom koob hmoov rau nws, thiab hais tias, saib maj, kuv tub tus ntxhiab yog tej ntxhiab nruab liaj nruab teb uas (יחוח)Yahweh foom koob hmoov rau.

28 Thov (יחוח)Yahweh pub dej lwg saum ntuj los rau koj, thiab pub lub ntiajteb zoo qoob nplua mias, thiab pub qoob loo cawv txiv hmab ntau kawg rau koj.  

29 Thov kom ib tsoom tibneeg tu koj, thiab ib tsoom teb­chaws pe koj. Cia koj ua tus kav koj cov kwvtij, cia koj niam tej tub pe koj. Thov kom txhua tus uas foom tsis zoo rau koj, raug foom tsis zoo, thiab cia txhua tus uas foom koob hmoov rau koj, tau hmoov zoo.  

30 Thaum Ixaj foom koob hmoov rau Yakhauj tag lawm, thiab Yakhauj nyuam qhuav tawm plaws ntawm nws txiv xubntiag mus lawm, nws tus tijlaug Exaus kuj tua tau nqaij rov los txog.  

31 Nws kuj npaj zaub mov qab qab coj los rau nws txiv, thiab nws hais rau leej txiv tias, thov txiv sawv los noj tej nqaij uas koj tus tub mus tua tau los, es foom koob hmoov rau kuv.

32 Nws txiv Ixaj hais rau nws tias, koj yog leejtwg? Nws teb tias, kuv yog koj tus tub, yog koj tus tub hlob Exaus.  

33 Mas Ixaj ib ce tshee hnyo hais tias, es leejtwg mus tua nqaij coj los rau kuv no? Kuv nyuam qhuav noj tag nrho es koj los txog no, thiab kuv twb foom koob hmoov rau nws lawm lauj. Nws yuav tau koob hmoov tiag tiag li.  

34 Thaum Exaus hnov nws txiv tej lus ntawd, nws cia li quaj nrov nrov tu siab kawg, thiab hais rau leej txiv tias, txiv es, thov foom koob hmoov rau kuv, thov foom koob hmoov rau kuv thiab.  

35 Tiamsis leej txiv hais tias, koj tus kwv uas lub siab dag tuaj thiab nws twb coj koj tej koob hmoov mus tag lawm.

36 Exaus hais tias, nws lub npe Yakhauj twb hu raug lawm los tsis yog? Rau qhov nws twb dag kuv ob zaug lawm. Nws twb muab kuv li feem ua tij txeeb mus lawm, mas zaum no nws tseem txeeb txhav kuv li koob hmoov lawm thiab. Thiab nws hais tias, koj tsis tseg ib txhia koob hmoov rau kuv li lov?  

37 Ixaj teb Exaus tias, kuv tsa nws ua tus uas kav koj thiab muab nws cov kwvtij sawvdaws tu nws, thiab muab tej qoob loo thiab tej cawv txiv hmab yug nws lawm. Tub es, kuv yuav ua li cas rau koj lawm?  

38 Exaus hais rau leej txiv tias, txiv, koj muaj tib yam koob hmoov no xwb lov? Txiv es, thov foom koob hmoov rau kuv, thov foom koob hmoov rau kuv thiab. Ces Exaus txawm tsa suab hlo quaj.  

39 Nws txiv Ixaj thiaj teb nws tias, koj yuav nyob deb ntawm tej qoob loo uas zoo nplua mias hauv lub ntiajteb thiab deb ntawm tej dej lwg saum ntuj.  

40 Koj yuav tuav rawv ntaj ua neej nyob, thiab koj yuav tu koj tus kwv, tiamsis thaum koj nti dim tau, koj yuav muab nws tus quab ntawm koj caj qwb lov tseg.

​

Ixaj Tso Yakhauj Mus Rau Halas

41 Exaus ntxub Yakhauj, vim yog leej txiv foom koob hmoov rau Yakhauj, mas Exaus hais tuj taws hauv lub siab tias, twb yuav txog hnub uas kuv txiv tag sim neej, mas hnub ntawd kuv yuav muab kuv tus kwv Yakhauj tua pov tseg.

42 Tiamsis tus tub hlob Exaus tej lus ntawd nrov mus txog Lenpekhas qhov ntsej, nws thiaj txib tibneeg mus hu nws tus tub yau Yakhauj los, mas hais rau Yakhauj tias, koj sim xav saib, koj tus tijlaug Exaus npaj siab yuav muab koj tua pov tseg thiaj zoo nws lub siab.  

43 Vim li no, tub es, cia li mloog kuv hais. Cia li khiav mus cuag kuv tus nus Lanpas hauv lub moos Halas,

44 thiab nrog nws nyob ib ntus mus txog thaum koj tus tijlaug lub siab npau nqeg tso,

45 mus txog thaum koj tus tijlaug txojkev chim nqeg thiab nws tsis nco qab tej uas koj tau ua rau nws tso, ces kuv li tso tibneeg tuaj coj koj rov qab qhov ntawd los. Ua cas kuv yuav cia neb ob leeg ploj ua ib hnub ntawm kuv?

46 Lenpekhas thiaj hais rau Ixaj tias, kuv dhuav cov pojniam Hithais, tsis xav ua neej nyob lawm. Yog Yakhauj tseem yuav cov ntxhais Hithais zoo li cov pojniam hauv lub teb­chaws no ua pojniam, ces kuv txojsia yuav muaj qabhau abtsi rau kuv?