1 Ixaj txawm hu Yakhauj los foom koob hmoov thiab nkaw lus rau nws tias, koj tsis txhob yuav cov ntxhais Khana‑as ua pojniam.

2 Cia li sawv kev mus rau tebchaws Padas Alas, mus rau Npethu‑ees lub tsev, uas yog koj niam leej txiv, thiab yuav koj niam tus nus Lanpas ib tug ntxhais qhov ntawd ua pojniam.

3 Thov(יחוח)Yahweh uas muaj hwjchim loj kawg nkaus foom koob hmoov thiab pub kom koj muaj tub ki, thiab huaj vam coob ua tau ib haiv neeg coob heev.

4 Thov (יחוח)Yahweh pub tej koob hmoov uas foom rau Anplaham lawm rau koj thiab koj tej tub ki xeeb ntxwv kom koj thiaj tau lub teb­chaws uas koj ua qhua nyob no, ua koj tug, yog lub tebchaws uas (יחוח)Yahweh pub rau Anplaham.

5 Ixaj kom Yakhauj mus li no, nws thiaj mus rau Padas Alas mus cuag nws tus dab laug Lanpas uas yog Npethu‑ees tus tub, yog Yakhauj thiab Exaus nkawv niam Lenpekhas tus nus uas yog tibneeg Alas.

​

Exaus Yuav Dua Ib Tug Pojniam

6 Exaus pom tias Ixaj foom koob hmoov rau Yakhauj thiab kom Yakhauj mus nrhiav pojniam rau Padas Alas tebchaws, thiab thaum Ixaj foom koob hmoov rau Yakhauj ntawd, nws nkaw lus hais tias, Tsis txhob yuav cov ntxhais Khana‑as ua pojniam,

7 thiab Yakhauj mloog nws niam nws txiv lus thiab mus rau Pada Alas tebchaws lawm.

8 Thaum Exaus pom tias nws txiv Ixaj tsis txaus siab rau cov pojniam Khana‑as,

9 ces nws txawm mus cuag Yisama‑ees uas yog Anplaham tus tub, thiab yuav Yisama‑ees tus ntxhais Mahalas uas yog Nenpayaus tus muam ua niam yau.

​

Yakhauj Ua Npau Suav Ntawm Npe-ees

10 Yakhauj tawm ntawm Npe‑awsenpas yuav mus rau lub moos Halas.

11 Nws mus txog ib qho chaw ces txawm so qhov ntawd ib hmos, vim hnub poob qho lawm. Nws muab ib lub pob zeb qhov ntawd los rau ncoo pw qhov chaw ntawd.

12 Mas nws ua npau suav pom ib tug ntaiv tuam hauv ntiajteb, lub hau ntaiv nto plaws saum ntuj. Ua ciav (יחוח)Yahweh cov tubtxib saum ntuj tabtom nce nce nqes nqes tus ntaiv ntawd.

13 (יחוח)Yahweh sawv ntsug dhau saum tus hau ntaiv thiab hais tias, kuv yog (יחוח)Yahweh uas yog koj yawg Anplaham Tus Tswv thiab yog Ixaj Tus Tswv. Thaj chaw uas koj pw no, kuv yuav muab rau koj thiab koj caj ces.

14 Koj caj ces yuav coob yam li tej hmoov av saum lub ntiajteb, thiab koj yuav nthuav dav rau sab hnub poob, sab hnub tuaj, sab ped, sab nrad, ib tsoom tibneeg hauv ntiajteb yuav tau koob hmoov ntawm koj thiab koj caj ces los.

15 Kuv yuav nrog nraim koj thiab kuv yuav tsom kwm koj rau txhua txojkev uas koj mus, thiab yuav coj koj rov qab los rau lub tebchaws no, vim kuv yuav tsis tso koj tseg mus txog thaum kuv tau ua tej uas kuv hais cia rau koj no lawm.

16 Yakhauj tsim los mas hais tias, (יחוח)Yahweh yeej nyob ntawm no tiag tiag li, yog kuv tsis paub xwb.

17 Nws ntshai thiab hais tias, lub chaw no txaus ntshai heev kawg li lauj! Lub chaw no yeej yog (יחוח)Yahweh lub tsev thiab yog lub rooj ntug saum ntuj.

18 Yakhauj thiaj sawv ntxov tsees muab lub pob zeb uas nws rau ncoo txhos ua ib tug ncej thiab hliv roj aulib rau saum lub hau ncej zeb ntawd.

19 Nws hu qhov chaw ntawd ua Npe‑ees. Yav tom ntej lub moos ntawd hu ua Laj.

20 Yakhauj yeem lus tseg tias, yog (יחוח)Yahweh nrog nraim kuv, thiab yuav tsom kwm kuv rau txojkev uas kuv mus no, thiab pub zaub mov rau kuv noj, thiab pub ris tsho rau kuv hnav,

21 xwv kuv thiaj rov los txog kuv txiv lub tsev kaj siab lug, mas (יחוח)Yahweh yuav yog kuv Tus Tswv.

22 Thiab lub pob zeb uas kuv muab txhos ua ib tug ncej cia no, yuav ua (יחוח)Yahweh lub tsev. Thiab txhua yam uas koj pub rau kuv, kuv yuav muab ib feem hauv kaum pub rov rau koj.