Yakhauj Mus Nrog Lanpas Nyob

1 Yakhauj txawm taug kev mus txog cov tibneeg sab hnub tuaj lub tebchaws.

2 Thaum nws tsa muag saib mas pom ib lub qhov dej nyob hauv ib daim teb, muaj peb pab yaj pw ib ncig ntawm lub qhov dej ntawd, vim yog tej pab yaj txeev haus dej ntawm lub qhov ntawd. Txhib zeb uas npog lub qhov dej ntawd kuj loj.

3 Thaum pab yaj los txhij lawm, cov tibneeg yug yaj li muab txhib zeb ntawd dov ntawm lub qhov dej thiab ntaus dej rau cov yaj haus tag li muab txhib zeb npog lub qhov dej li qub cia.

4 Yakhauj hais rau lawv tias, cov kwvtij, nej tuaj qhovtwg tuaj? Lawv teb tias, peb tuaj lub moos Halas tuaj.

5 Yakhauj thiaj nug lawv tias, pej paub Lanpas uas yog Nahaus tus tub los tsis paub? Lawv teb tias, paub thiab.

6 Yakhauj hais rau lawv tias, Lanpas nyob zoo lov? Lawv teb tias, nws nyob zoo thiab mas. Ntawm ne, nws tus ntxhais Lachees tabtom raws pab yaj los.

7 Yakhauj thiaj hais tias, sijhawm no tseem ntxov tsis tau txog caij uas coj tej yaj los ua ke. Cia li ntaus dej rau cov yaj haus thiab coj mus noj zaub.

8 Tiamsis lawv teb tias, tsis tau, peb yuav tos txog thaum txhua pab yaj los txhij tso li muab txhib zeb uas npog lub qhov dej dov tawm es peb li ntaus dej rau cov yaj haus.

9 Thaum Yakhauj tseem nrog lawv hais lus ntawd, Lachees kuj raws nws txiv pab yaj los txog, vim yog nws yug pab yaj ntawd.

10 Thaum Yakhauj pom dheev Lachees uas yog nws niam tus nus Lanpas tus ntxhais thiab pom nws niam tus nus Lanpas cov yaj, nws txawm mus muab txhib zeb uas npog lub qhov dej dov tawm thiab ntaus dej rau nws niam tus nus Lanpas pab yaj haus.

11 Yakhauj thiaj nwj Lachees thiab quaj quaj.

12 Thiab Yakhauj hais rau Lachees tias, nws yog Lachees txiv tus txheeb ze, nws yog Lenpekhas tus tub. Ces Lachees txawm khiav mus hais rau nws txiv paub.

13 Thaum Lanpas hnov txog nws tus muam tus tub Yakhauj, nws txawm khiav mus puag nwj thiab coj Yakhauj los rau hauv nws lub tsev. Yakhauj piav txhua yam huvsi rau Lanpas mloog.

14 Mas Lanpas hais rau nws tias, koj yeej yog kuv caj ces tiag tiag li. Yakhauj thiaj nrog nws nyob tau ib lub hlis.

15 Lanpas hais rau Yakhauj tias, koj txheeb ze kuv tiag tiag li, tsis tsim nyog cia koj ua kuv li haujlwm dawb dawb xwb. Cia li hais rau kuv paub saib koj yuav nqe zog li cas?

16 Lanpas muaj ob tug ntxhais, tus hlob hu ua Le‑as, tus yau hu ua Lachees.

17 Le‑as lub qhov muag tsis cus pes tsawg, tiamsis Lachees mas lub cev ntaj ntsug zoo nkauj heev.

18 Yakhauj nyiam Lachees, nws thiaj hais rau Lanpas tias, kuv yuav ua koj zog xya xyoo es yuav Lachees uas yog koj tus ntxhais yau ua pojniam.

19 Lanpas hais tias, cia kuv muab kuv tus ntxhais qua rau koj zoo dua li muab qua rau lwm tus. Koj cia li nrog kuv nyob lauj.

20 Yakhauj thiaj ua xya xyoo zog kom tau Lachees, nws saib mas zoo li nyuam qhuav yog ob peb hnub xwb, vim nws nyiam Lachees heev.

21 Yakhauj thiaj hais rau Lanpas tias, thov muab pojniam rau kuv, kuv thiaj tau nrog nws pw ua ke, vim kuv twb ua haujlwm puv rau koj lawm.

22 Lanpas thiaj hu kwvtij zej zog tuaj noj tshoob.

23 Thaum tsaus ntuj, Lanpas muab nws tus ntxhais Le‑as coj los rau Yakhauj, Yakhauj kuj nrog nws pw.

24 Lanpas muab nws tus nkauj qhe Xilapas pub ua nws tus ntxhais Le‑as tus nkauj qhe.

25 Thaum kaj ntug Yakhauj pom ua ciav yog Le‑as, nws thiaj hais rau Lanpas tias, koj ua abtsi li no rau kuv? Kuv ua koj zog yuav Lachees los tsis yog? Ua cas koj dag kuv li no?

26 Lanpas teb tias, hauv peb lub teb­chaws no, tsis muaj kevcai uas yuav muab tus niam hluas qua ua tus niam laus ntej.

27 Cia koj yuav tus no puv xya hnub tso peb li muab tus ntawd qua rau koj, es koj rov ua zog rau kuv xya xyoo ntxiv thiab.

28 Yakhauj ua li ntawd thiab nws nrog Le‑as nyob kom puv xya hnub. Ces Lanpas li muab nws tus ntxhais Lachees qua rau Yakhauj yuav.

29 Lanpas muab nws tus nkauj qhe Npihas pub ua nws tus ntxhais Lachees tus nkauj qhe.

30 Yakhauj thiaj mus nrog Lachees pw. Nws nyiam Lachees heev dua Le‑as, thiab nws ua xya xyoo zog ntxiv rau Lanpas.

​

Yakhauj Cov Menyuam

31 Thaum (יחוח)Yahweh pom tias Yakhauj ntxub Le‑as, (יחוח)Yahweh thiaj li qheb Le‑as lub plab me­nyuam. Tiamsis Lachees xeeb tsis taus menyuam.  

32 Le‑as xeeb tub thiab yug tau ib tug tub, nws tis npe hu ua Lunpees, rau qhov nws hais tias, vim yog (יחוח)Yahweh tsa muag saib kuv txojkev txom nyem nyuaj siab. Nimno kuv tus txiv yeej yuav nyiam kuv tiag tiag li.

33 Le‑as rov xeeb tub thiab yug tau dua ib tug tub, thiab hais tias, vim yog (יחוח)Yahweh hnov tias kuv raug ntxub, nws thiaj muab tus tub no rau kuv thiab. Vim li no, nws thiaj tis npe hu ua Xime‑oos.

34 Nws rov xeeb tub thiab yug tau dua ib tug tub thiab hais tias, zaum no kuv tus txiv yuav npuab kiag kuv, vim kuv yug peb tug tub rau nws lawm. Vim li no, thiaj muab hu ua Levis.

35 Nws rov qab xeeb tub thiab yug tau dua ib tug tub thiab hais tias, zaum no kuv yuav qhuas (יחוח)Yahweh. Vim li no, nws thiaj tis npe hu ua Yahdah. Ces nws txawm tseg tsis muaj menyuam lawm.