1 Thaum Lachees pom tias nws tsis muaj menyuam yug rau Yakhauj, nws kuj khib nws tus niam laus. Nws thiaj hais rau Yakhauj tias, koj cia li muab menyuam rau kuv, yog tsis tau kuv yuav tuag.  

2 Yakhauj chim rau Lachees thiaj hais tias, kuv nyob (יחוח)Yahweh chaw lov? (יחוח)Yahweh yog tus uas tsis pub koj xeeb tub.

3 Lachees thiaj hais tias, kuv tus nkauj qhe Npihas nyob no. Koj cia li mus nrog nws pw, nws thiaj yug tau me­nyuam rau hauv kuv lub xubntiag, kuv thiaj li tau menyuam ntawm nws los.

4 Lachees thiaj muab nws tus nkauj qhe Npihas rau Yakhauj yuav ua pojniam, thiab Yakhauj mus nrog nws pw.

5 Npihas txawm xeeb tub thiab yug tau ib tug tub rau Yakhauj.

6 Mas Lachees hais tias, (יחוח)Yahweh tsa kuv cai thiab hnov kuv lub suab thov, thiab pub ib tug tub rau kuv. Vim li no, nws thiaj tis npe hu ua Daj.

7 Npihas uas yog Lachees tus nkauj qhe rov xeeb tub thiab yug dua tau ib tug tub rau Yakhauj.

8 Lachees thiaj hais tias, kuv nrog tus niam laus sib ntsuas zog heev, thiab kuv kov yeej lawm. Vim li no, nws thiaj tis npe hu ua Nathalis.

9 Thaum Le‑as pom tias nws tseg tsis muaj menyuam lawm, nws txawm muab nws tus nkauj qhe Xilapas rau Yakhauj yuav ua pojniam.

10 Xilapas uas yog Le‑as tus nkauj qhe yug tau ib tug tub rau Yakhauj.

11 Le‑as thiaj hais tias, kuv tau hmoov zoo. Vim li no, nws thiaj tis npe hu ua Kas.

12 Xilapas uas yog Le‑as tus nkauj qhe rov yug dua ib tug tub rau Yakhauj.

13 Le‑as kuj hais tias, kuv zoo siab lawm lauj. Rau qhov tej pojniam yuav hu kuv tias, tus uas zoo siab. Nws thiaj tis npe hu ua Asaws.

14 Thaum lub caij hlais mog, Lunpees mus tom teb, thiaj de tau cov lws los thiab muab rau nws niam Le‑as. Lachees txawm hais rau Le-as tias, thov muab koj tus tub cov lws ib txhia rau kuv thiab.

15 Le-as teb tias, koj twb txeeb kuv tus txiv mus lawm, yog ib qho me me xwb lov? Koj tseem yuav xav tau kuv tus tub cov lws thiab lov? Lachees teb tias, hmo no kuv yuav cia kuv tus txiv nrog koj pw pauj koj tus tub cov lws.

16 Thaum tsaus ntuj Yakhauj rov tom teb los, Le-as txawm mus tos nws thiab hais tias, koj yuav tsum nrog kuv pw, rau qhov kuv twb muab kuv tus tub cov lws ntiav koj hmo no lawm. Hmo ntawd Yakhauj thiaj nrog nws pw. 17(יחוח)Yahweh hnov Le-as tej lus, nws thiaj xeeb tub thiab yug tau tus tub uas tsib rau Yakhauj.

18 Le-as hais tias, (יחוח)Yahweh pub cov nqe ntiav ntawd rau kuv. Vim kuv twb muab kuv tus nkauj qhe rau kuv tus txiv lawm. Nws thiaj tis tus tub ntawd lub npe hu ua Ixakhas.

19 Le-as rov xeeb dua tub thiab yug tau tus tub uas rau rau Yakhauj.

20 Mas Le-as hais tias,  (יחוח)Yahweh twb pub yam uas zoo rau kuv lawm. Nimno kuv tus txiv yuav saib taus kuv, vim kuv yug tau rau tus tub rau nws lawm. Nws thiaj tis npe hu ua Xenpuloos.

21 Dhau ntawd Le-as yug tau ib tug ntxhais muab tis npe hu ua Dinas. 22(יחוח)Yahweh nco txog Lachees thiab hnov nws tej lus thov, thiab qheb nws lub plab menyuam.

23 Nws thiaj xeeb tub thiab yug tau ib tug tub thiab hais tias (יחוח)Yahweh twb daws kuv txojkev txaj muag lawm.

24 Nws thiaj tis tus tub ntawd lub npe hu ua Yauxej, nws hais tias, thov (יחוח)Yahweh tsav dua ib tug tub rau kuv thiab.

​

Yakhauj Pab Yaj Huaj Vam Coob

25 Thaum Lachees yug Yauxej lawm, Yakhauj txawm hais rau Lanpas tias, thov tso kuv mus, kuv thiaj rov mus txog kuv qub teb qub chaw.

26 Thov muab kuv cov pojniam menyuam rau kuv, kuv twb ua zog them rau koj lawm, thov tso kuv mus, rau qhov koj twb paub tej haujlwm uas kuv tau ua rau koj lawm.

27 Tiamsis Lanpas hais rau nws tias, thov cia kuv hais ib lo lus rau koj li no. Kuv saib yaig, saib sij, mas paub tias (יחוח)Yahweh foom koob hmoov rau kuv, vim yog muaj koj.

28 Koj cia li xam nqe zog es kuv yuav muab rau koj.

29 Yakhauj hais rau nws tias, kuv ua haujlwm rau koj li cas thiab, kuv saib koj tej tsiaj zoo li cas, koj yeej paub lawm.

30 Thaum kuv tsis tau los, koj muaj tsawg, tiamsis nimno twb huaj vam coob kawg li. Kuv mus rau txojkev twg los (יחוח)Yahweh yeej foom koob hmoov rau koj. Tiamsis nimno yuav thaum twg kuv li yug tau kuv tsev neeg?

31 Lanpas thiaj nug tias, kuv yuav muab abtsi rau koj? Yakhauj teb tias, koj tsis txhob muab abtsi rau kuv. Yog koj yeem ua li no rau kuv, kuv yuav yug thiab tsom kwm koj pab yaj, pab tshis ntxiv mus.

32 Hnub no cia kuv mus thoob plaws koj pab yaj, pab tshis, es rho txhua tus yaj uas txheeb thiab txaij tej teev, thiab txhua tus menyuam yaj uas dub, thiab tej tshis uas txheeb thiab txaij, tej teev tawm rau ib qho. Ces muab tej tsiaj no ua nqe zog rau kuv.

33 Kuv txojkev ncaj yuav tshwm los rau yav tom qab rau hnub uas koj tuaj tshuaj tej uas muab ua nqe zog rau kuv. Yog koj ntsib tej tshis tus twg uas tsis txheeb, thiab tsis txaij tej teev, thiab tej menyuam yaj tus twg uas tsis dub hauv kuv pab, mas koj yuav suav tias yog kuv nyiag lawm.

34 Lanpas thiaj hais tias, zoo lauj, yuav li uas koj hais kod.

35 Tiamsis hnub ntawd, Lanpas kuj muab tej txiv tshis uas txaij tej kab, thiab txaij tej teev, thiab txhua tus maum tshis uas txaij tej teev, thiab txheeb, yog tej tshis uas muaj tej teev dawb, thiab txhua tus me­nyuam yaj uas dub rho tawm cob rau nws cov tub yug.

36 Nws txawm coj cov tsiaj ntawd mus nrug deb ntawm Yakhauj peb hnub ke. Mas Yakhauj yug Lanpas tej pab yaj pab tshis uas tseem tshuav.

37 Yakhauj txawm muab tej kav ntoo nyoos uas yog ntoo cev, thiab ntoo txiv duaj deg, thiab ntoo seb, los laws tawv ua txaij tej kwb kab pom dawb paug.

38 Nws muab tej kav ntoo uas nws muab laws ntawd tso rau hauv tej dab dej ntawm tej tsiaj xubntiag, yog lub chaw uas cov tsiaj los haus dej, vim tej tsiaj pheej tshov rau thaum los haus dej.

39 Ces cov yaj cov tshis txawm tshov rau ntawm tej kav ntoo txaij ntawd, ces txawm yug tau tej me­nyuam uas txaij tej kab thiab tej teev thiab txheeb.

40 Yakhauj thiaj muab tej menyuam yaj ntawd, cais tso rau ib qho, thiab muab tej yaj, tej tshis, saib ntsoov rau Lanpas tej yaj, tej tshis, uas txaij tej kab, thiab dub. Nws muab nws cov tsiaj tso rau ib qho, tsis xyaw Lanpas cov tsiaj.

41 Thaum cov tsiaj uas zoo thiab khov kho tshov Yakhauj kuj muab cov kav ntoo txaij tso rau hauv cov dab dej rau cov tsiaj pom kom thiaj li tshov ntawm cov kav ntoo txaij ntawd.

42 Tiamsis nws tsis muab cov kav ntoo txaij ntawd tso rau tej tsiaj uas tsis zoo, tsis khov pom. Ua li no mas tej tsiaj tsis zoo, tsis khov thiaj poob ua Lanpas li lawm, tiamsis tej tsiaj uas zoo thiab khov, yog Yakhauj li.

43 Ua li no, Yakhauj thiaj li nplua nuj tuaj, muaj tej niag pab yaj, pab tshis coob coob, thiab muaj tub qhe nkauj qhe, muaj ntxhuav muaj nees luav.