Yahweh Cog Lus Rau Nau‑as

1 (יחוח)Yahweh foom koob hmoov rau Nau-as thiab nws cov tub, thiab hais rau lawv tias, cia li muaj tub ki huaj vam coob puv ntiajteb. 

2 Txhua yam tsiaj hauv ntiajteb thiab txhua yam noog saum nruab ntug, thiab txhua yam tsiaj uas nkag hauv av, thiab txhua yam ntses hauv hiavtxwv yuav ntshai nej heev.  Kuv muab tej tsiaj ntawd huvsi cob rau hauv nej txhais tes. 

3 Txhua yam ciaj sia uas nkag thiab ya yuav ua nej zaub noj. Kuv pub txhua yam rau nej noj ib yam li kuv pub zaub ntsuab rau nej noj lawd. 

4 Tiamsis tsis txhob noj cov nqaij nrog cov ntshav uas yog nws txojsia.

5 Cov ntshav uas yog nej txojsia, kuv yuav tsob. Kuv yuav tsob ntawm txhua tus tsiaj thiab yuav tsob ntawm tej tibneeg. Kuv yuav tsob tibneeg txojsia ntawm nws txhua tus kwvtij. 

6 Leejtwg tua tibneeg los ntshav, tus ntawd yuav raug tibneeg tua kom los ntshav ib yam nkaus, rau qhov (יחוח)Yahweh tsim tibneeg zoo li nws tus yam ntxwv. 

7 Nej cia li muaj menyuam huaj vam coob, cia li muaj tub ki coob coob hauv lub ntiajteb thiab huaj vam coob. 

8 (יחוח)Yahweh hais rau Nau-as thiab nws cov tub tias,

9 ntawm no, kuv cog lus ruaj rau nej thiab nej caj ces uas tshwm los rau yav tom qab,

10 thiab rau txhua yam ciaj sia uas nrog koj nyob hauv lub nkoj es tawm los rau hauv ntiajteb, tsis hais nas noog, tsiaj nyeg, tsiaj qus huvsi. 

11 Kuv cog lus ruaj rau nej tias, kuv yuav tsis tso dej los nyab ua kom txhua yam uas ciaj sia puam tsuaj tag dua li lawm, thiab dej yuav tsis los nyab rhuav tshem lub ntiajteb dua li lawm. 

12 Thiab (יחוח)Yahweh hais tias, no yog tus cim uas kuv cog lus rau nej thiab kuv, thiab txhua yam ciaj sia uas nrog nej nyob, mus rau txhua tiam. 

13 Kuv tsa kuv tus zaj sawv rau saum cov huab, mas nws yuav ua tus cim uas kuv cog lus rau lub ntiajteb thiab kuv. 

14 Thaum kuv ua huab sawv rau saum lub ntiajteb thiab muaj tus zaj sawv hauv cov huab ntawd. 

15 Kuv yuav nco txog tej lus cog tseg uas cog rau nej thiab kuv, thiab txhua yam uas ciaj sia, mas dej yuav tsis los nyab ua kom txhua yam uas ciaj sia puam tsuaj dua li lawm. 

16 Thaum tus zaj sawv saum cov huab, kuv yuav saib ntsoov nws thiab nco txog tej lus cog tseg uas nyob ib txhis rau (יחוח)Yahweh, thiab txhua yam ciaj sia uas nyob hauv lub ntiajteb.

17 (יחוח)Yahweh hais rau Nau-as tias, no lauj yog tus cim uas kuv cog lus cia rau kuv thiab txhua yam ciaj sia uas nyob hauv lub ntiajteb.

​

Nau-as Thiab Nws Cov Tub

18 Nau-as cov tub uas tawm hauv lub nkoj los yog Xeeb thiab Has thiab Yafes. Has yog Khana‑as leej txiv. 

19 Peb tug no yog Nau-as cov tub. Tibneeg thiaj tshwm ntawm peb leeg no mus puv lub ntiajteb. 

20 Nau-as yog tibneeg ua teb thiab nws yog thawj tug uas xub cog vaj txiv hmab. 

21 Nws haus cawv txiv hmab qaug mas mus pw liab qab hauv nws lub tsev ntaub. 

22 Mas Has uas yog Khana‑as txiv pom nws txiv liab qab tsuas txawm hais rau ob tug kwvtij uas nyob sab nraud. 

23 Ces Xeeb thiab Yafes thiaj muab ib daim pam tab, khuam saum nkawv xub pwg, thaub qab mus npog leej txiv lub cev uas liab qab tsuas. Nkawv tsis tig xubntiag saib thiaj tsis pom leej txiv lub cev uas liab qab ntawd. 

24 Thaum Nau-as zoo cawv tsim los thiab paub tias tus tub ntxawg ua li cas rau nws lawm.

25 Nws txawm hais tias, Khana‑as raug foom tsis zoo, nws yuav ua nws cov kwvtij tus tub qhe uas qes kawg.

26 Nau-as kuj hais tias, thov (יחוח)Yahweh uas yog kuv Tus Tswv foom koob hmoov rau Xeeb Thiab cia Khana‑as ua Xeeb tus tub qhe lauj. 

27 Thov (יחוח)Yahweh nthuav Yafes lub tebchaws kom dav thiab cia nws nyob hauv Xeeb tej tsev ntaub. Thiab cia Khana‑as ua Yafes qhev. 

28 Txij thaum dej nyab ntiajteb los Nau-as tseem nyob tau peb puas tsib caug xyoo. 

29 Nau-as li hnub nyoog huvsi muaj cuaj pua tsib caug xyoo nws li tuag.