1 Thaum Lehaunpau‑as mus rau hauv Yeluxalees lawd, nws txawm sau cov Yahdah thiab xeem Npeeyamees sawvdaws tuaj ua ke, huvsi muaj 180,000 leej tub rog uas txawj tshaj plaws es yuav mus ua rog rau Ixayees thiab muab tebchaws rov los rau Lehaunpau‑as kav.

2 Tiamsis (יחוח)Yahweh hais lus tuaj rau Semayah uas yog (יחוח)Yahweh tus tibneeg tias,

3 cia li hais rau Xalaumoos tus tub Lehaunpau‑as uas ua vajntxwv kav Yahdah thiab hais rau cov Ixayees huvsi hauv Yahdah thiab Npeeyamees tebchaws tias,

4 (יחוח)Yahweh hais li no tias, nej tsis txhob nce mus ua rog rau nej cov kwvtij. Sawvdaws cia li rov mus nyias vaj nyias tsev, rau qhov tej xwm txheej no yog los ntawm kuv los. Yog li no lawv thiaj mloog (יחוח)Yahweh tej lus thiab rov mus, tsis tau mus ua rog rau Yelaunpau‑as.

​

Kev Vam Meej Thaum Lehaunpau‑as Ua Vajntxwv Kav Yahdah 

5 Lehaunpau‑as nyob hauv Yeluxalees thiab nws ua tej moos rau hauv Yahdah tebchaws tiv thaiv yeeb ncuab.

6 Nws kho tej moos no yog Npelehees, Edas, Thekhau‑as,

7 Npexuv, Xaukhaus, Adulas,

8 Kas, Malesas, Xis,

9 Adaula‑is, Lakhis, Axekhas,

10 Xaulas, Aiyaloos thiab Henploos, yog tej moos uas muaj ntsa loog nyob hauv Yahdah thiab Npeeyamees tebchaws.

11 Nws ua rau tej moos uas muaj ntsa loog ntawd khov kho thiab tsa kom muaj cov thawj tub rog nyob hauv, thiab muab zaub mov, roj thiab cawv txiv hmab khaws cia rau hauv.

12 Nws khaws tej daim phiaj hlau thaiv thiab tej hmuv cia rau hauv tej moos ntawd huvsi, thiab ua rau tej moos ntawd ruaj khov. Mas nws thiaj kav tau Yahdah thiab Npeeyamees cia.

13 Cov pov thawj thiab cov Levis uas nyob lawv tej chaw txhua qhov hauv Ixayees teb chaws tuaj Lehaunpau‑as tog.

14 Cov Levis tso lawv tej tshav zaub thiab lawv tej vaj tse tseg thiab cia li mus nram Yahdah tebchaws thiab Yeluxalees, vim yog Yelaunpau‑as thiab nws cov tub ntiab lawv tawm qhov uas ua (יחוח)Yahweh li pov thawj,

15 thiab tsa dua ib co pov thawj teev dab ntawm tej chaw siab thiab teev dab tshis thiab teev tej dab mlom thav nyuj uas nws ua.

16 Ces cov uas muab siab rau nrhiav (יחוח)Yahweh uas yog cov Ixayees Tus Tswv, kuj raws cov Levis qab tawm hauv Ixayees txhua xeem mus rau nram Yeluxalees xwv thiaj tau tua tsiaj xyeem rau (יחוח)Yahweh uas yog lawv tej poj koob yawm txwv Tus Tswv.

17 Lawv tau ua rau Yahdah teb chaws muaj zog thiab lawv txhawb Xalau-moos tus tub Lehaunpau‑as nyob ruaj khov tau peb xyoos, rau qhov lawv ua lub neej raws nraim li Daviv thiab Xalaumoos tau peb xyoos.

18 Lehaunpau‑as yuav Mahalas uas yog Daviv tus tub Yelimaus tus ntxhais ua poj niam. Mahalas niam yog Anpiha‑is uas yog Yisais tus tub Elias tus ntxhais.

19 Nws yug tau cov tub no rau Lehaunpau‑as, yog Ye‑us, Semaliyah thiab Xahas.

20 Los rau tom qab Lehaunpau‑as yuav Axaloos tus ntxhais Ma‑akhas ua pojniam mas yug tau Anpiyah, Athais, Xixas thiab Selaumis.

21 Lehaunpau‑as nyiam Axaloos tus ntxhais Ma‑akhas heev dua nws cov pojniam thiab cov hluas nkauj uas nws kav huvsi. Nws yuav kaum yim tus pojniam thiab kav rau caum tus hluas nkauj, muaj nees nkaum yim tus tub, muaj rau caum tus ntxhais.

22 Lehaunpau‑as tsa Anpiyah uas yog Ma‑akhas tus tub ua thawj hauv nws cov kwvtij, rau qhov nws npaj siab yuav tsa tus tub ntawd ua vajntxwv.

23 Nws muaj tswvyim tu txhua yam thiab muab nws cov tub faib mus nyob thoob plaws Yahdah tebchaws thiab Npeeyamees tebchaws, nyob rau hauv txhua lub moos uas muaj ntsa loog. Nws pub zaub mov nplua mias rau lawv thiab yuav ntau tus pojniam rau lawv.