Sisab Ua Rog Rau Yahdah

(1 Vajntxwv 14:21,25-31)

1 Thaum Lehaunpau‑as ua vajntxwv kav lub tebchaws ruaj khov thiab muaj zog lawm, nws txawm tso (יחוח)Yahweh txoj kevcai tseg, thiab cov Ixayees sawv daws kuj muab tso tseg ib yam nkaus.

2 Xyoo tsib uas Lehaunpau‑as ua vajntxwv kav mas Sisab uas ua vajntxwv hauv Iziv teb chaws txawm tuaj ua rog rau lub nroog Yeluxalees, vim yog lawv tso (יחוח)Yahweh tseg,

3 muaj tsheb nees ua rog ib txhiab ob puas lub thiab tub rog caij nees rau caum txhiab leej. Thiab cov tub rog uas nrog nws tuaj nram Iziv tuaj suav tsis txheeb, yog cov Linpias, cov Xukhi‑is thiab cov tibneeg Khuj.

4 Nws txeeb tau Yahdah tej moos uas muaj ntsa loog tag thiab tuaj rau ntawm Yeluxalees. 

5 mas Semayah uas yog xibhwb cev (יחוח)Yahweh lus tuaj cuag Lehaunpau‑as thiab Yahdah cov thawj uas tuaj txoos ua ke rau hauv Yeluxalees vim yog ntshai Sisab thiab hais rau lawv tias, (יחוח)Yahweh hais li no tias, nej tau tso kuv tseg, kuv thiaj tso nej tseg rau hauv Sisab txhais tes.

6 Ces Ixayees cov thawj thiab vajntxwv thiaj li txo hwjchim thiab hais tias, (יחוח)Yahweh ua ncaj ncees.

7 Thaum (יחוח)Yahweh pom tias lawv txo hwjchim, (יחוח)Yahweh hais lus tuaj rau Semayah tias, lawv txo hwjchim lawm, kuv yuav tsis ua kom lawv puam tsuaj, tiamsis kuv yuav pab lawv dim ib qho xwb, mas kuv tsis siv Sisab txhais tes nchuav kuv txojkev npau taws rau saum Yeluxalees.

8 Txawm li cas los lawv tseem yuav ua Sisab li qhev kom lawv thiaj li paub tias qhov uas tu kuv thiab tu tej vajntxwv hauv ib tsoom teb chaws txawv li cas.

9 Iziv tus vajntxwv Sisab txawm nce tuaj ua rog rau Yeluxalees. Nws muab tej nyiaj kub qhov txhia chaw hauv (יחוח)Yahweh lub tuam tsev thiab hauv vajntxwv lub tsev lwg huvsi coj mus. Nws kuj coj tej daim phiaj kub thaiv uas Xalaumoos ua huvsi mus.

10 Mas vajntxwv Lehaunpau‑as ho muab tooj liab ua tej daim phiaj los siv hloov chaw thiab muab cov daim phiaj ntawd cob rau cov thawj rog uas zov vajntxwv lub qhov rooj.

11 Txhua zaus uas vajntxwv mus rau hauv (יחוח)Yahweh lub tuam tsev, cov tub rog kuj tuav cov daim phiaj ntawd tawm tuaj thiab coj rov qab mus khaws cia rau hauv chav tsev uas ceev tej khoom ntawd.

12 Thaum Lehaunpau‑as txo hwjchim lawm, (יחוח)Yahweh txojkev npau taws kuj thim rov qab tsis ua kom puam tsuaj tag huvsi, thiab Yahdah tseem nyob zoo.

13 Vajntxwv Lehaunpau‑as thiaj nyob ruaj rau hauv Yeluxalees thiab tseem kav tebchaws mus. Thaum Lehaunpau‑as sawv ua vajntxwv kav, nws hnub nyoog muaj plaub caug ib xyoos. Nws nyob hauv Yeluxalees kav tau kaum xya xyoo, yog lub nroog uas (יחוח)Yahweh xaiv hauv txhua xeem Ixayees cia ua lub chaw rau nws lub npe nyob. Nws niam npe hu ua Na‑amas uas yog tibneeg Asmoos.

14 Nws tau ua tej uas phem, rau qhov nws tsis muab siab rau nrhiav (יחוח)Yahweh.

15 Lehaunpau‑as tej haujlwm txij thaum pib mus txog thaum kawg mas twb muab sau cia rau hauv Semayah uas yog xibhwb cev (יחוח)Yahweh lus thiab Idaus uas hais pom tom hauv ntej phau ntawv keeb kwm lawm. Lehaunpau‑as thiab Yelau-npau‑as pheej sib ua rog tsis tu li.  

16 Lehaunpau‑as tuag mus nrog nws tej poj koob yawm txwv nyob.  Lawv muab nws faus rau hauv Daviv lub nroog.  Mas nws tus tub Anpiyah sawv nws chaw ua vajntxwv kav.