2 VAJ KEEB KWM 13

Anpiyah Ua Vajntxwv Kav Yahdah

(1 Vajntxwv 15:1-8)

1 Xyoo kaum yim uas Yelaunpau‑as ua vajntxwv kav mas Anpiyah pib ua vajntxwv kav Yahdah tebchaws.

2 Nws nyob hauv Yeluxalees kav tau peb xyoos. Nws niam npe hu ua Ma-akhayah uas yog Uli‑ees uas nyob hauv Kinpe‑as tus ntxhais. Anpiyah thiab Yelaunpau‑as pheej sib ua rog.

3 Anpiyah coj ib pab tub rog siab loj siab tuab, muaj 400,000 leej uas txawj tshaj plaws tawm mus ua rog.  Yelaunpau‑as npaj nws cov tub rog mus ua rog rau Anpiyah, muaj 800,000 leej tub rog uas muaj zog thiab txawj tshaj plaws.

4 Anpiyah txawm sawv ntsug saum lub roob Xemala‑is uas nyob pem toj siab Efa‑is teb chaws thiab hais tias, Yelaunpau‑as thiab cov Ixayees sawvdaws es, cia li tig ntsej mloog kuv hais.

5 Nej tseem tsis paub tias (יחוח)Yahweh uas yog Ixayees Tus Tswv tau cog lus ruaj khov tias yuav pub Daviv thiab nws caj ces ua vajntxwv kav Ixayees tebchaws mus ib txhis lov?

6 Txawm li ntawd los Nenpas tus tub Yelaunpau‑as uas yog Daviv tus tub Xalau-moos ib tug tub teg tub taws tseem ntxeev siab sawv twv nws Tus Tswv.  

7 Muaj tibneeg loj leeb tsis tsheej haj tuaj koom nrog Yelaunpau‑as ntxeev siab rau Xalaumoos tus tub Lehaunpau‑as rau thaum Lehaunpau‑as tseem hluas, lub siab ywj fab ywj fwj thiaj tiv tsis tau lawv.

8 Nimno nej xav tias yuav tawm tsam (יחוח)Yahweh lub teb chaws uas nyob hauv Daviv caj ces txhais tes, rau qhov nej yog pab uas coob kawg thiab muaj tej dab mlom thav nyuj kub uas Yelaunpau‑as nchuav rau nej.  

9 Nej tsis tau ntiab (יחוח)Yahweh cov pov thawj uas yog Aloos caj ces thiab cov Levis khiav lov, thiab tsa pov thawj rau nej ib yam li tibneeg lwm lub tebchaws lov? Leejtwg coj ib tug thav txiv nyuj thiab xya tus txiv yaj tuaj ua kevcai tu kom nws tus kheej dawb huv thiaj tau ua pov thawj ua haujlwm rau tej uas tsis yog (יחוח)Yahweh.

10 Tiamsis peb cov mas, (יחוח)Yahweh yog peb Tus Tswv thiab peb tsis tau tso nws tseg.  Peb muaj pov thawj uas yog Aloos caj ces ua koom tu (יחוח)Yahweh thiab muaj cov Levis pab lawv ua haujlwm.

11 Lawv niaj tagkis thiab niaj hmo muab tsiaj ua kevcai hlawv xyeem thiab hlawv hmoov tshuaj tsw qab thiab muab cov ncuav txawb rau saum lub rooj dawb huv ntawm (יחוח)Yahweh xubntiag thiab tu lub teeb kub kom tej teeb cig rau txhua hmo. Peb tuav rawv (יחוח)Yahweh uas yog peb Tus Tswv tej lus cob qhia, tiamsis nej twb tso nws tseg lawm.

12 Saib maj, (יחוח)Yahweh nrog nraim peb, coj peb lub hauv ntej, thiab nws cov pov thawj muaj raj xyu tshuab txhib ua rog rau nej. Ixayees caj ces es, tsis txhob tawm tsam (יחוח)Yahweh uas yog nej tej poj koob yawm txwv Tus Tswv, rau qhov nej yuav kov tsis yeej.

13 Yelaunpau‑as tau tso ib txhia tub rog lug mus zov cov Yahdah qub qab. Yog li no nws cov tub rog thiaj nyob ntawm cov Yahdah hauv ntej thiab zov tom lawv qub qab.

14 Thaum cov Yahdah tsa muag saib ua ciav kev ua rog nyob ntawm lawv hauv ntej thiab nyob tom lawv qub qab.  Lawv txawm hu thov (יחוח)Yahweh thiab cov pov thawj tshuab raj xyu.

15 Cov Yahdah txawm qw lub suab ua rog nrov. Thaum cov Yahdah qw nrov, (יחוח)Yahweh ua rau Yelaunpau‑as thiab cov Ixayees sawvdaws swb kiag Anpiyah thiab cov Yahdah.

16 Cov Ixayees thiaj khiav cov Yahdah thiab (יחוח)Yahweh muab lawv cob rau hauv cov Yahdah txhais tes.

17 Anpiyah thiab nws cov tub rog kuj tua cov Ixayees tuag coob kawg, cov Ixayees tuag 500,000 leej tub rog uas txawj tshaj plaws.

18 Yog li no cov Ixayees thiaj swb kiag zaum ntawd thiab cov Yahdah kov yeej, rau qhov lawv vam khom (יחוח)Yahweh uas yog lawv tej poj koob yawm txwv Tus Tswv.  

19 Thiab Anpiyah raws caum Yelaunpau‑as thiab txeeb tau tej moos no ntawm nws, yog lub moos Npe‑ees, lub moos Yesanas, lub moos Efoos, thiab tej zej zog uas nyob ib ncig tej moos ntawd.

20 Yelaunpau‑as tsis rov muaj hwjchim li qub tag Anpiyah sim neej.  Thiab

()Yahweh ntaus Yelaunpau‑as, nws thiaj tuag lawm.

21

Tiamsis Anpiyah muaj hwjchim loj zuj zus. Nws yuav kaum plaub tug pojniam thiab muaj nees nkaum ob tug tub, muaj kaum rau tus ntxhais.

22

Lwm yam haujlwm uas Anpiyah ua, tej uas nws ua thiab tej uas nws hais twb muab sau cia rau hauv Idaus uas yog xibhwb cev (יחוח)Yahweh lus phau ntawv lawm.