Axas Ua Vajntxwv Kav Yahdah

(1 Vajntxwv 5:11-12)

1 Anpiyah txawm tuag mus nrog nws tej poj koob yawm txwv nyob, lawv muab nws faus rau hauv Daviv lub nroog.  Nws tus tub Axas sawv nws chaw ua vajntxwv kav.  Thaum Axas ua vajntxwv, lub tebchaws so tsis ua rog tau kaum xyoo.

2 Axas ua tej uas (יחוח)Yahweh uas yog nws Tus Tswv pom tias zoo thiab raug cai.

3 Nws rhuav tshem tej thaj teev lwm haiv neeg tej dab thiab tej chaw siab, thiab tsoo tej ncej teev dab thiab ntov tej ncej dab Aselas pov tseg,

4 thiab hais kom cov Yahdah nrhiav (יחוח)Yahweh uas yog lawv tej poj koob yawm txwv Tus Tswv, thiab tuav rawv nws txoj kevcai thiab nws tej lus cob qhia.  

5 Thiab nws rhuav tshem tej chaw siab teev dab thiab tej thaj hlawv hmoov xyab hauv Yahdah txhua lub moos pov tseg. Mas nws thiaj kav lub tebchaws nyob tus yees.

6 Nws tsim ntsa loog rau tej moos hauv Yahdah tebchaws, rau qhov lub tebchaws nyob tus yees.  Nws tsis tau ua rog rau ncua sijhawm ntawd, vim yog (יחוח)Yahweh pub nws tau so tsis ua rog.

7 Nws hais rau cov Yahdah tias, cia peb tsim kho tej moos no, xov ntsa loog thiab ua chaw tsom faj thiab ua rooj loog thiab las rooj. Lub tebchaws tseem yog peb li, vim yog peb tau nrhiav (יחוח)Yahweh uas yog peb Tus Tswv. Peb tau nrhiav nws, nws thiaj pub peb tau so tus yees rau txhua fab. Lawv thiaj li tsim tej ntawd thiab vam meej tuaj.

8 Axas muaj tub rog hauv Yahdah tebchaws 300,000 leej tuav rawv daim phiaj hlau loj thiab hmuv, thiab muaj tub rog hauv Npeeyamees tebchaws 280,000 leej tuav rawv phiaj hlau thiab txawj tua hneev, puavleej yog tub rog siab loj siab tuab.

9 Xelag uas yog tibneeg Ithi-aupiam kuj tuaj ua rog rau lawv, nws muaj tub rog 1,000,000 leej thiab tsheb nees ua rog peb puas lub tuaj rau ntawm lub moos Malesas.

10 Axas txawm mus ua rog rau nws mas lawv ob tog npaj chaw ua rog rau hauv lub hav Xefathas ntawm lub moos Melesas.  

11 Mas Axas thov hu (יחוח)Yahweh uas yog nws Tus Tswv tias, Au (יחוח)Yahweh, tsis muaj leejtwg pab tau yam li koj, hauv txojkev ua rog uas ib tog muaj zog, ib tog tsis muaj zog. Au (יחוח)Yahweh uas yog peb Tus Tswv, thov koj pab peb, rau qhov peb vam khom koj thiab peb tuaj tawm tsam haiv neeg coob heev no hauv koj lub npe. Au (יחוח)Yahweh, koj yog peb Tus Tswv, thov tsis txhob cia tibneeg kov yeej koj.

12 (יחוח)Yahweh thiaj ua rau cov tibneeg Ithi-aupiam swb Axas thiab cov Yahdah, cov tibneeg Ithi-aupiam thiaj khiav mus lawm.

13 Axas thiab nws cov tub rog raws caum lawv mus txog lub moos Kelas, mas cov tibneeg Ithi-aupiam raug tua tuag tag tsis tshuav ib tug ciaj li, lawv raug tsoo tawg tag thiab swb kiag (יחוח)Yahweh thiab nws pab tub rog. Cov Yahdah txeeb tau lawv tej qhov txhia chaw ntau kawg li coj mus.

14 Lawv kuj ntaus txhua lub moos uas nyob ib ncig ntawm Kelas, rau qhov (יחוח)Yahweh ua rau luag ntshai kawg li. Lawv lwg txhua lub moos ntawd, rau qhov muaj ntau yam uas txeeb tau hauv tej moos ntawd.

15 Lawv ntaus tej tib neeg yug tsiaj tej tsev ntaub thiab coj tej yaj tej ntxhuav coob kawg li mus. Ces lawv txawm rov los rau hauv Yeluxalees lawm.