Axas Tsim Kho Kev Ntseeg

1 (יחוח)Yahweh Tus Ntsuj Plig Dawb Huv los nyob hauv Axaliyah uas yog Audes tus tub,

2 nws txawm tawm mus ntsib Axas thiab hais rau nws tias, Axas thiab cov Yahdah thiab cov Npeeyamees sawv daws, cia li mloog kuv hais. (יחוח)Yahweh nrog nraim nej rau thaum nej nrog nraim nws. Yog nej nrhiav nws, nej yuav ntsib nws, tiamsis yog nej tso nws tseg, nws yuav tso nej tseg.

3 Ntev los lawm, cov Ixayees tsis yuav Tus Tswv uas tseeb thiab tsis muaj ib tug pov thawj uas txawj qhia thiab tsis muaj txoj kevcai.

4 Tiamsis thaum lawv raug kev txom nyem nyuaj siab, lawv tig los rau ntawm
(יחוח)Yahweh uas yog cov Ixayees Tus Tswv, lawv nrhiav nws thiab ntsib nws.

5 Lub sijhawm ntawd cov uas tawm mus thiab cov uas nkag los yeej tsis tau txojkev kaj siab li, rau qhov muaj kev kub ntxhov ntau heev rau cov tibneeg sawvdaws uas nyob hauv tej tebchaws.

6 Lawv tawg ua sab ua sua, ib lub tebchaws tawm tsam ib lub tebchaws, ib lub moos tawm tsam ib lub moos, vim yog (יחוח)Yahweh tso txhua yam kev txom nyem nyuaj siab los raug lawv.

7 Tiamsis nej mas cia li ua siab tuab.  Tsis txhob cia nej txhais tes tsaug leeg, rau qhov tej haujlwm uas nej ua, nej yuav tau nqi zog.

8 Thaum Axas hnov tej lus uas Audes tus tub Axaliyah cev rau nws lawd, nws txawm muaj siab loj siab tuab thiab muab tej dab mlom uas qias vuab tsuab thoob plaws Yahdah tebchaws thiab Npeeyamees tebchaws thiab hauv tej moos uas nws txeeb tau pem toj siab Efa‑is tebchaws rhuav pov tseg huvsi, thiab nws kho (יחוח)Yahweh lub thaj uas nyob ntawm qab khav uas mus rau hauv (יחוח)Yahweh lub tuam tsev.   

9 Thiab nws sau kiag cov Yahdah thiab cov Npeeyamees sawvdaws thiab cov Efa‑is, cov Manaxes thiab cov Xime‑oos uas tuaj nrog lawv nyob, vim yog muaj tibneeg coob coob tsiv hauv Ixayees tebchaws tuaj rau ntawm nws, rau thaum lawv pom tias (יחוח)Yahweh uas yog nws Tus Tswv nrog nraim nws.

10 Lawv tuaj txoos ua ke rau hauv Yeluxalees rau lub peb hlis, xyoo kaum tsib uas Axas ua vajntxwv kav.

11 Hnub ntawd lawv muab tej tsiaj uas txeeb tau los rho ib txhia los xyeem rau (יחוח)Yahweh, yog xya pua tus nyuj thiab xya txhiab tus yaj.

12 Thiab lawv cog lus tseg tias, lawv yuav nrhiav (יחוח)Yahweh uas yog lawv tej poj koob yawm txwv Tus Tswv kawg siab kawg ntsws,

13 thiab hais tias leejtwg tsis yeem nrhiav (יחוח)Yahweh uas yog cov Ixa-yees Tus Tswv mas tus ntawd yuav raug muab tua tuag, tsis hais laus los hluas, pojniam los txivneej huvsi.

14 Lawv tsa suab nrov cog lus twv rau (יחוח)Yahweh thiab qw nrov nrov thiab tshuab raj xyu thiab raj kub yaj.

15 Cov Yahdah sawvdaws zoo siab rau tej lus cog tseg ntawd, rau qhov lawv tau cog lus twv kawg siab kawg ntsws thiab nrhiav (יחוח)Yahweh kawg lawv lub siab ntshaw thiab lawv kuj ntsib nws, thiab (יחוח)Yahweh pub lawv tau so tus yees rau txhua fab.

16 Txawm yog nws pog Ma‑akhas los vajntxwv Axas muab hle tsis pub nyob lub rooj poj vajntxwv lawm, rau qhov nws pog tau ua ib tug dab mlom qias vuab tsuab los teev tus dab Aselas. Thiab Axas muab nws niam tus dab mlom ntawd ntov tsoo coj mus hlawv pov tseg rau ntawm lub hav Khiloos,

17 tiamsis tsis tau rhuav tshem tej chaw siab teev dab hauv cov Ixayees.  Txawm li ntawd los nws lub siab tsis muaj ib qho chaw thuam li mus tag nws sim neej uas ua vajntxwv.

18 Nws muab tej nyiaj, tej kub, tej twj siv uas nws thiab nws txiv tau yeem lus xyeem lawd, coj los cia rau hauv (יחוח)Yahweh lub tuam tsev.

19 Mas tsis muaj kev ua rog mus txog xyoo peb caug tsib uas Axas ua vajntxwv kav.