Axas Thiab Npeehadas Cog Lus Sib Raug Zoo

(1 Vajntxwv 15:17-24)

1 Xyoo peb caug rau uas Axas ua vajntxwv kav mas cov Ixayees tus vajntxwv Npa‑asas tuaj ua rog rau cov Yahdah.  Nws ua lub moos Lamas los tav kev tsis pub ib tug nkag mus cuag tau cov Yahdah tus vajntxwv Axas thiab tsis pub ib tug tawm tau.

2 Ces Axas txawm muab tej nyiaj tej kub hauv tej txhab (יחוח)Yahweh lub tuam tsev thiab hauv vajntxwv lub tsev ib txhia xa mus rau Alas tus vajntxwv Npeehadas uas nyob hauv lub nroog Damaxakas, thiab hais tias,

3 thov koj nrog kuv cog lus sib raug zoo ib yam li kuv txiv thiab koj txiv tau ua los lawd. Kuv xa cov nyiaj thiab kub no tuaj rau koj es thov koj mus rhuav tej lus uas nrog Ixayees tus vajntxwv Npa‑asas cog lus sib raug zoo lawd tseg, xwv nws thiaj thim tub rog ntawm kuv mus.

4 Ces Npeehadas kuj mloog vajntxwv Axas hais.  Nws txawm tso thawj tub rog mus ntaus Ixayees tej moos, mas lawv ntaus yeej lub moos Iyoos, Daj, Anpeema‑is, thiab tej moos uas khaws qhov txhia chaw cia hauv Nathalis tebchaws huvsi.  

5 Thaum Npa‑asas hnov tej xwm ntawd, nws txawm tseg tsis ua lub moos Lamas thiab tso nws tes haujlwm tseg.

6 Ces vajntxwv Axas txawm coj cov Yahdah sawvdaws mus muab tej pob zeb thiab tej ntoo uas Npa‑asas ua lub moos Lamas ntawd coj los tsim kho lub moos Kenpas thiab Mixapas.

7 Thaum ntawd Hana-nis uas hais pom tom hauv ntej tuaj cuag Yahdah tus vajntxwv Axas thiab hais rau nws tias, vim koj vam khom Alas tus vajntxwv tsis vam khom (יחוח)Yahweh uas yog koj Tus Tswv, yog li no Alas tus vajntxwv cov tub rog thiaj dim hauv koj txhais tes lawm.

8 Cov tibneeg Ithi-aupiam thiab cov tibneeg Linpias tsis yog pab tub rog uas coob kawg muaj tsheb ua rog thiab tub rog caij nees coob kawg lov? Txawm li cas los vim koj vam khom (יחוח)Yahweh, nws thiaj muab lawv rau hauv koj txhais tes.  

9 Rau qhov (יחוח)Yahweh mus mus los los, qhov muag saib ntsoov thoob plaws lub ntiajteb kom thiaj ua nws lub hwjchim tshwm los pab cov uas lub siab xib rau nws. Qhov no koj ua ruam kawg li, rau qhov txij no mus koj yuav muaj kev ua rog.

10 Ces Axas txawm chim rau tus uas hais pom tom hauv ntej ntawd, thiaj muab nws ntes kaw rau hauv tsev lojfaj, rau qhov nws npau taws heev rau qhov uas tus xibhwb hais li ntawd. Axas kuj tsim txom cov pejxeem qee leej heev rau lub sijhawm ntawd.

11 Axas tej haujlwm txij thaum pib mus txog thaum kawg mas twb muab sau cia rau hauv phau ntawv uas hais txog Yahdah thiab Ixayees tej vajntxwv lawm.

12 Xyoo peb caug cuaj uas Axas ua vajntxwv kav, nws txawm mob nws txhais kotaw, mas nws tus mob loj heev tuaj. Txawm yog nws mob los nws kuj tsis nrhiav (יחוח)Yahweh, nws nrhiav tej Kws tshuaj pab xwb.

13 Axas txawm tuag mus nrog nws tej poj koob yawm txwv nyob, nws tuag rau thaum nws ua vajntxwv kav tau plaub caug ib xyoos.  

14 Lawv muab nws faus rau hauv lub qhov ntxa uas nws tho rau nws hauv Daviv lub nroog.  Lawv muab nws lub cev tuag tso rau saum lub txaj uas pleev cov tshuaj tsw qab puv nkaus uas yog tus Kws tov tshuaj twb tov cia lawd.  Thiab lawv rauv ib cub tawg loj

heev ua koob meej rau nws.