Yahsafas Ua Vajntxwv Kav Yahdah

1 Axas tus tub Yahsafas sawv nws chaw ua vajntxwv kav Yahdah thiab cuab zog npaj tawm tsam cov Ixayees.

2 Nws xa tub rog nyob rau hauv Yahdah txhua lub moos uas muaj ntsa loog thiab tsa tub rog mus zov thoob plaws Yahdah teb chaws thiab hauv Efa‑is tej moos uas nws txiv Axas twb txeeb tau lawd.  

3 (יחוח)Yahweh nrog nraim Yahsafas nyob, rau qhov Yahsafas taug nraim nws txiv txoj kev uas thaum nws txiv pib ua vajntxwv, nws tsis nrhiav teev tej dab Npa‑as,

4 nws nrhiav (יחוח)Yahweh uas yog nws txiv Tus Tswv thiab ua lub neej raws (יחוח)Yahweh tej lus cob qhia, nws tsis ua raws li cov Ixayees ua.

5 Vim li no (יחוח)Yahweh thiaj pub nws kav tau lub tebchaws nyob ruaj khov. Mas tag nrho cov Yahdah coj tshav ntuj tuaj pub rau Yahsafas, nws thiaj nplua nuj heev thiab muaj koob meej.

6 Nws muaj siab loj siab tuab ua raws li (יחוח)Yahweh txojkev. Thiab nws rhuav tshem tej chaw siab uas teev dab thiab tej ncej dab Aselas hauv Yahdah tebchaws mus.

7 Xyoo peb uas nws ua vajntxwv kav, nws txib nws cov thawj uas yog Npeeha‑is, Obadyah, Xekhaliyah, Nethanees thiab Mikhayah mus qhia rau hauv Yahdah tej moos.

8 Thiab cov Levis no kuj nrog lawv mus, yog Semayah, Nethaniyah, Xenpadiyah, Axahees, Semilamaus, Yahnathas, Adauniyah, Thaunpiyah thiab Thaunpadaniyah thiab nrog cov Levis no ua ke yog Elisamas thiab Yahlas uas ua pov thawj.

9 Lawv coj (יחוח)Yahweh phau ntawv kevcai mus qhuab qhia thoob plaws Yahdah tebchaws. Lawv mus txhua nrho Yahdah tej moos thiab qhia cov pejxeem.

10 (יחוח)Yahweh ua rau txhua lub tebchaws uas nyob ib ncig Yahdah ntshai heev, lawv thiaj tsis tuaj ua rog rau Yahsafas.

11 Cov Filixatees qee leej coj tshav ntuj tuaj pub rau Yahsafas thiab coj nyiaj tuaj them se rau nws. Cov Alanpias kuj coj 7,700 tus txiv yaj thiab 7,700 tus txiv tshis tuaj pub rau nws.

12 Yahsafas thiaj vam meej heev zuj zus tuaj.

Nws tsim tej chaw ruaj khov thiab tej moos khaws qhov txhia chaw hauv Yahdah teb chaws,

13 thiab nws khaws qhov txhia chaw ntau kawg cia rau hauv Yahdah tej moos. Nws muaj cov tub rog uas siab loj siab tuab nyob hauv Yeluxalees.

14 Ntawm no mus yog txheeb cov tub rog raws li lawv xeem.  

Xeem Yahdah cov thawj uas kav ib txhiab leej ib tug yog Anas uas ua thawj kav 300,000 leej tub rog uas siab loj siab tuab,

15 tus ob yog Yahkanas uas ua tus thawj kav 280,000 leej,

16 tus peb yog Xikhis tus tub Amasiyah uas yeem ua koom tu (יחוח)Yahweh, nws kav 200,000 leej tub rog uas siab loj siab tuab.

17 Xeem Npeeyamees muaj Eliyadas uas yog tub rog siab loj siab tuab kav 200,000 leej tub rog uas muaj hneev thiab daim phiaj hlau thaiv.

18 Tus ob yog Yahxanpas uas kav 180,000 leej uas muaj cuab yeej ua rog.

19 Cov no tu vajntxwv tsis suav rau cov tub rog uas vajntxwv txib mus nyob rau hauv tej moos uas muaj ntsa loog thoob Yahdah tebchaws lawd.