Xalaumoos Ua (יחוח)Yahweh Lub Tuam Tsev

(1 Vajntxwv 6:1-29)

1 Xalaumoos pib ua (יחוח)Yahweh lub tuam tsev rau hauv Yeluxalees saum lub roob Mauliyah uas (יחוח)Yahweh tau tshwm rau nws txiv Daviv pom, ncaj ntawm lub chaw uas Daviv tau teem cia, yog ntawm Aulanas uas yog tibneeg Yenpus lub tshav ntaus qoob.

2 Nws pib nqis tes ua rau lub ob hlis, xyoo plaub uas nws ua vajntxwv kav.

3 Xalaumoos ua (יחוח)Yahweh lub tuam tsev dav thiab ntev li no, yog ntev rau caum tshim thiab dav nees nkaum tshim, raws tej tshim uas siv thaum ub.

4 Leej qab khav uas yuav nkag rau hauv lub tuam tsev, ntev nees nkaum tshim npaum li lub tuam tsev qhov uas dav, siab nees nkaum tshim.  Hauv lub nrog tsev, nws muab tseem kub luam thoob plaws.

5 Phab ntsa lub tuam tsev sab hauv lub nrog tsev, nws muab cov ntoo ciab nplooj suab xov thiab muab kub zoo zoo luam thiab sais ua tej tsob toov laj thiab cov saw txaij nraug zees rau ntawd.

6 Nws muab cov qe zeb hlaws muaj nqis los teem cia rau hauv lub tuam tsev.  Cov kub yog cov kub ntawm lub moos Pava‑is.

7 Nws thiaj muab kub luam lub tuam tsev, yog luam tej las, tej taw rooj, tej phab ntsa thiab cov qhov rooj huvsi thiab txaug duab Khelunpees rau ntawm tej phab ntsa.

8 Nws ua chav dawb huv kawg nkaus, qhov ntev thiab qhov dav yog nees nkaum tshim xwm fab dav li lub tuam tsev. Nws muab kub zoo zoo nyhav rau pua talas los luam rau.

9 Cov ntsia hlau kub nyhav tsib caug sekhees. Thiab nws muab kub luam tej chav txheej saud.

10 Hauv chav dawb huv kawg nkaus ntawd, nws muab ntoo ua ob tug Khelunpees thiab muab kub luam.

11 Ob tug Khelunpees nthuav kooj tis dav nees nkaum tshim. Ib tug ib sab kooj tis ntev tsib tshim ti nkaus ib sab phab ntsa tuam tsev, thiab ib sab ntev tsib tshim tuaj twb nkaus ib tug Khelunpees sab kooj tis.

12 Tus Khelunpees no ib sab kooj tis kuj ntev tsib tshim ti nkaus ib sab phab ntsa tuam tsev thiab, ib sab kooj tis ntev tsib tshim kuj txuas nkaus thawj tug Khelunpees sab kooj tis thiab.

13 Ob tug Khelunpees no li kooj tis nthuav dav nees nkaum tshim. Nkawv sawv ntsug tig xub ntiag mus rau tom chav dawb huv.  

14 Nws muab ntaub xiav thiab tsamxem thiab liab thiab ntaub mag zoo zoo ua daim ntaub thaiv thiab ua paj ntaub duab Khelunpees rau ntawm daim ntaub ntawd.

15 Nws ua ob tug ncej rau ntawm lub qhov rooj tuam tsev, siab peb caug tsib tshim thiab ua ob lub hau ncej, siab tsib tshim txawb rau saum ob tug ncej.

16 Nws ua cov saw zoo li cov saw khuam caj qwb lo rau saum cov hau ncej thiab nws ua ib puas lub txiv ntsiav kws dai rau ntawm cov saw ntawd.

17 Nws txhos ob tug ncej rau ob sab qhov rooj tuam tsev, ib tug nyob sab ped ib tug nyob sab nrad.  Nws tis npe rau tus uas nyob sab nrad hu ua Yakhis, tus uas nyob sab ped nws hu ua Npau‑as.