Xalaumoos Npaj Ua Lub Tuam Tsev

(1 Vajntxwv 5:1-16)

1 Xalaumoos txiav txim siab yuav ua lub tuam tsev rau (יחוח)Yahweh lub npe thiab ua ib lub tsev vajntxwv rau nws.

2 Mas Xalaumoos txib xya caum txhiab leej ua cov uas kwv qhov txhia chaw thiab yim caum txhiab leej ua cov uas txaug pob zeb pem tej roob thiab peb txhiab rau pua leej ua cov uas saib xyuas lawv.

3 Xalaumoos xa xov mus rau Hilas uas ua vajntxwv kav lub nroog Thailab tias, koj tau pab kuv txiv Daviv, yog xa ntoo ciab tuaj rau nws ua lub tsev rau nws nyob lawm mas thov koj ua ib yam li ntawd rau kuv thiab.

4 Nimno kuv tab tom yuav ua lub tuam tsev rau (יחוח)Yahweh uas yog kuv Tus Tswv lub npe, thiab yuav muab xyeem pub kiag ua lub chaw hlawv hmoov tshuaj tsw qab ntawm nws xub ntiag thiab ua chaw txawb cov ncuav uas xyeem rau ntawm nws xubntiag ib txhis thiab ua kevcai hlawv huvsi xyeem rau thaum sawv ntxov thiab thaum yuav tsaus ntuj thiab rau hnub Sabbath thiab rau hnub hli xiab thiab rau tej kevcai npaj noj npaj haus uas teem cia rau (יחוח)Yahweh uas yog peb Tus Tswv raws li uas hais tseg rau cov Ixayees ib txhiab ib txhis.

5 Lub tuam tsev uas kuv yuav ua ntawd mas loj heev, rau qhov peb Tus Tswv loj dua tej timtswv huvsi.

6 Tiamsis leejtwg yuav muaj peev xwm ua tau lub tuam tsev rau nws nyob, rau qhov saum nruab ntug uas siab kawg nkaus los twb tsis txaus rau nws nyob? Kuv yog leejtwg es yuav ua lub tuam tsev rau nws nyob tau, tsuas yog ua lub chaw hlawv tej hmoov tshuaj tsw qab xyeem rau ntawm nws xub ntiag xwb?

7 Yog li ntawd nimno thov koj xa ib tug txivneej uas txawj ua Kws kub, Kws nyiaj, Kws tooj liab thiab Kws hlau thiab txawj ntos ntaub tsamxem thiab liab thiab xiav, thiab yog tus Kws txawj txaug, kom nws thiaj nrog kuv cov tibneeg uas ua Kws ua haujlwm hauv Yahdah thiab hauv Yeluxalees, uas kuv txiv Daviv nrhiav cia lawd.

8 Thov koj xa cov ntoo ciab thiab cov ntoo ciab nplooj suab thiab cov ntoo liab ntawm roob Lenpanoos tuaj rau kuv, rau qhov kuv paub tias koj cov tibneeg txawj txiav ntoo hauv Lenpanoos. Mas kuv cov tub teg tub taws yuav nrog koj cov tub teg tub taws ua haujlwm,

9 es npaj ntoo kom ntau heev rau kuv, rau qhov lub tuam tsev uas kuv yuav ua no mas yuav ua loj kawg thiab zoo nkauj kawg li.

10 Kuv yuav muab cov mog uas zom tau lawm, nees nkaum txhia Khuas, cov qeb nees nkaum txhiab Khuas, cawv txiv hmab nees nkaum txhiab npas, thiab roj aulib nees nkaum txhiab npas rau koj cov tub teg tub taws uas txiav ntoo ntawd. 11 Mas Hilas uas ua vajntxwv kav lub nroog Thailab ua ntawv teb tuaj rau Xalaumoos tias, twb yog vim (יחוח)Yahweh hlub nws haiv neeg, nws thiaj tsa koj ua vajntxwv kav lawv.

12 Hilas kuj hais tias, qhuas (יחוח)Yahweh uas yog cov Ixayees Tus Tswv, tus uas tsim lub ntuj thiab lub teb, yog tus uas pub ib tug tub uas txawj ntse rau vajntxwv Daviv, muaj lajlim tswvyim plab plaws thiab muaj kev nkag siab, yog tus uas yuav ua lub tuam tsev rau (יחוח)Yahweh thiab ib lub tsev vajntxwv rau nws.

13 Nimno kuv xa ib tug Kws uas txawj thiab nkag siab zoo tuaj rau koj, yog Hulas,

14 nws niam yog tibneeg xeem Daj nws txiv yog tibneeg hauv lub nroog Thailab. Nws txawj ua Kws kub, Kws nyiaj, Kws tooj liab, Kws hlau, txawj txaug pob zeb thiab ua Kws ntoo thiab txawj ntos ntaub tsamxem thiab xiav thiab liab thiab ntos tau ntaub mag zoo zoo, thiab txawj txaug txhua yam thiab ua raws li tej qauv txaij nraug zees uas muab rau nws ua.  Nws yuav nrog koj cov Kws ua haujlwm uas koj txiv Daviv uas yog kuv tus tswv tau nrhiav cia lawm ua haujlwm ua ke.  

15 Yog li ntawd mas cov mog, cov qeb, cov roj, cov cawv txiv hmab uas koj hais txog ntawd, koj cia li xa tuaj rau peb uas yog koj cov tub qhe.

16 Mas peb yuav txiav cov ntoo ntawm Lenpanoos npaum li uas koj xav yuav thiab peb yuav muab ua phuaj es xa hauv dej hiavtxwv mus rau ntawm lub moos Yafaus, es koj thiaj coj tau mus rau ntawm Yeluxalees.

17 Mas Xalaumoos thiaj txheeb lwm haiv neeg uas nyob hauv Ixayees tebchaws tej npe huvsi ib yam li nws txiv Daviv tau txheeb ib zaug lawm. Mas txheeb tau muaj 153,600 leej.

18 Nws txib xya caum txhiab leej ua cov uas kwv qhov txhia chaw, yim caum txhiab leej ua cov uas txaug pob zeb pem roob thiab peb txhiab rau pua leej ua cov uas saib thiab txhib cov tibneeg ntawd ua haujlwm.