Vajntxwv Xailab Tso Cov Yahdah Rov Mus

(2 Vaj Keeb Kwm 36:22-23)

1 Thawj xyoo uas vajntxwv Xailab kav Pawxias tebchaws, mas (יחוח)Yahweh tshoov Pawxias tus vajntxwv Xailab lub siab, xwv thiaj ua kom tiav raws li tej lus uas (יחוח)Yahweh kom Yeremyah lub qhov ncauj hais, Xailab thiaj tshaj tawm thoob plaws nws lub tebchaws thiab muab sau cia hais tias,

2 Pawxias tus vajntxwv Xailab hais li no. (יחוח)Yahweh uas yog Tus Tswv nyob saum ntuj, tau pub ib tsoom tebchaws huvsi hauv lub ntiajteb rau kuv, thiab nws hais kom kuv ua lub tuam tsev rau nws rau hauv lub nroog Yeluxalees uas nyob hauv Yahdah tebchaws.  

3 Nej cov muaj leejtwg yog nws haiv neeg, thov (יחוח)Yahweh uas yog nws Tus Tswv nrog nraim tus ntawd nyob.  Nws cia li rov mus rau Yeluxalees uas nyob hauv Yahdah tebchaws thiab rov tsim kho (יחוח)Yahweh uas yog cov Ixayees Tus Tswv lub tuam tsev dua tshiab, yog Tus Tswv uas muaj hwjchim loj kawg nkaus nyob hauv Yeluxalees.

4 Thiab txhua tus uas tshuav nyob, tsis hais nyob rau qhovtwg los, cia cov tibneeg uas lawv nrog nyob ntawd pab nyiaj thiab kub thiab qhov txhia chaw thiab tsiaj txhu, muab tshaj tej uas zoo siab pub xyeem rau (יחוח)Yahweh lub tuam tsev uas nyob hauv Yeluxalees.

5 Ces xeem Yahdah thiab xeem Npeeyamees cov thawj hauv txhua cum thiab cov pov thawj thiab cov Levis, yog txhua tus uas (יחוח)Yahweh Tus Ntsuj Plig Dawbhuv tau tshoov lub siab, thiaj npaj yuav mus ua (יחוח)Yahweh lub tuam tsev rau hauv Yeluxalees dua tshiab.

6 Mas txhua tus uas nrog lawv nyob ua ke, pab tej twj siv nyiaj thiab kub thiab qhov txhia chaw thiab tsiaj txhu thiab tej yam muaj nqis, tshaj tej uas zoo siab muab xyeem pub.

7 Tej twj siv hauv (יחוח)Yahweh lub tuam tsev uas Nenpukhanexas twb coj hauv Yeluxalees mus cia rau hauv nws lub tsev uas teev dab, mas vajntxwv Xailab muab rho tawm los.

8 Pawxias tus vajntxwv muab tej ntawd rho los cob rau Miledas uas yog tus ceev nyiaj, mas Miledas thiaj muab suav rau Senpaxas uas yog Yahdah ib tug thawj.

9 Tej ntawd muaj npaum li no. Peb caug lub tais kub, ib txhiab lub tais nyiaj, nees nkaum cuaj lub phaj,

10 peb caug lub phaj kub, plaub puas kaum lub phaj nyiaj thiab lwm yam tais phaj ib txhiab lub.  

11 Tej twj taig uas muab kub, muab nyiaj ua huvsi muaj tsib txhiab plaub puas lub. Tej no huvsi Senpaxas coj los rau thaum uas coj cov uas poob tebchaws hauv Npanpiloos rov los txog hauv Yeluxalees.