Tus Poj Vajntxwv Uas Kav Hauv Senpas Tebchaws Tuaj Saib Xalaumoos

(1 Vajntxwv 10:1-13)

1 Thaum tus poj vajntxwv uas kav Senpas tebchaws tau hnov txog Xalaumoos lub meej mom, nws txawm tuaj rau Yeluxalees nug Xalaumoos txog ntau yam uas ceeblaj teb tau. Nws coj ib pab tub teg tub taws coob coob nrog nws tuaj, thiab muaj ntxhuav thauj tej txuj lom thiab kub ntau kawg thiab tej qe zeb hlaws muaj nqis. Thaum nws tuaj cuag Xalaumoos lawd, nws thiaj piav txhua yam uas nyob hauv nws lub siab huvsi rau Xalaumoos.

2 Mas Xalaumoos teb txhua yam uas nws nug tau huvsi tsis muaj ib yam uas Xalaumoos yuav tsis paub thiab piav tsis tau rau nws li.

3 Thaum tus poj vajntxwv hauv Senpas pom Xalaumoos lub tswvyim thiab pom lub tsev uas nws tau ua,

4 thiab pom tej zaub mov saum nws lub rooj thiab cov nom tswv uas nrog nws nyob thiab nws cov tub teg tub taws uas tu nws thiab tej ris tsho uas lawv hnav, thiab cov uas thiab cawv txiv hmab thiab lawv cev ris tsho, thiab pom tej uas nws muab ua kevcai hlawv xyeem ntawm (יחוח)Yahweh lub tuam tsev, mas tus poj vajntxwv ntawd tsis pom qab xav li lawm.

5 Mas nws thiaj hais rau vajntxwv tias, tej xov uas kuv nyob hauv kuv lub tebchaws hnov uas hais txog koj tej haujlwm thiab koj lub tswvyim yeej los muaj tseeb tiag.  

6 Tiamsis kuv tsis ntseeg tej lus ntawd mus txog thaum kuv tau tuaj cuag thiab kuv lub qhov muag tau pom lawm.  Saib maj, tej uas lawv piav koj lub tswvyim loj kawg rau kuv hnov ntawd, twb tsis muaj txog ib nrab.  Koj tseem zoo tshaj tej lus uas kuv tau hnov lawd.

7 Koj cov tibneeg tau hmoov zoo lauj! Koj cov tub teg tub taws uas ua haujlwm ntawm koj xub ntiag ib txwm thiab hnov koj tej tswvyim plab plaws mas tau hmoov zoo lauj!

8 Qhuas (יחוח)Yahweh uas yog koj Tus Tswv uas txaus siab rau koj thiab tsa koj nyob saum nws lub zwm txwv ua vajntxwv rau (יחוח)Yahweh uas yog koj Tus Tswv. Vim koj Tus Tswv hlub cov Ixayees thiab xav tias yuav tsa lawv nyob ruaj khov mus ib txhis li, mas nws thiaj tsa koj ua vajntxwv kav lawv kom koj thiaj txiav txim ncaj thiab ua ncaj ncees.

9 Mas nws txawm muab kub nyhav ib puas nees nkaus talas thiab tej txuj lom ntau kawg thiab tej qe zeb hlaws muaj nqis rau vajntxwv. Yeej tsis tau muaj dua tej txuj lom uas yuav ntau cuag li tej uas tus poj vajntxwv hauv Senpas muab rau vajntxwv Xalaumoos no li.

10 Dua li ntawd Hilas cov tibneeg thiab Xalaumoos cov tibneeg uas thauj kub ntawm lub moos Aufis tuaj, kuj thauj ntoo liab txiv khau tawv thiab tej qe zeb hlaws muaj nqis tuaj thiab.

11 Mas vajntxwv thiaj muab cov ntoo liab txiv khau tawv ua cov ntaiv hauv

(יחוח)Yahweh lub tuam tsev thiab hauv vajntxwv lub tsev, thiab ua cov nkauj nog ncas me thiab cov nkauj nog ncas loj rau cov hu nkauj. Yeej tsis tau pom dua tej yam uas zoo li ntawd hauv tebchaws Yahdah.

12 Vajntxwv Xalaumoos pub txhua yam rau tus poj vajntxwv hauv Senpas raws li uas nws xav yuav thiab raws li nws thov, thiab ntau dua tej uas nws coj tuaj pub rau vajntxwv. Mas nws thiab nws cov tub teg tub taws txawm rov qab mus rau nws lub tebchaws lawm.

​

Xalaumoos Nplua Nuj Thiab Muaj Koob Meej

(1 Vajntxwv 10:14-29; 2 Vaj Keeb Kwm 1:14-17)

13 Ib xyoos twg mas Xalaumoos tau kub nyhav rau pua rau caum rau talas,

14 tsis xam tej kub uas cov tub lag tub luam coj tuaj, thiab tej vajntxwv uas kav Alanpias tebchaws thiab tej tswv xeev uas kav hauv lub tebchaws coj kub thiab nyiaj tuaj rau Xalaumoos.

15 Vajntxwv Xalaumoos muab kub ntaus ua ob puas daim phiaj loj thaiv, ib daim phiaj mas siv kub nyhav rau pua sekhees ua.

16 Nws muab kub ntaus ua dua peb puas daim phiaj thaiv, ib daim phiaj siv kub nyhav peb puas sekhees. Vajntxwv muab cov phiaj kub ntawd khaws cia hauv lub tsev Hav Zoov Lenpanoos.

17 Vajntxwv muab kaus ntxhw ua ib lub zwm txwv loj kawg li thiab muab cov tseem kub los luam.

18 Lub zwm txwv ntawd muaj rau theem ntaiv thiab lub chaw tiag taw yog xuas kub ua lo nkaus rau lub zwm txwv, mas ob sab ntawm lub zwm txwv muaj ob lub chaw tso tes mas muaj ob tug tsov ntxhuav sawv ze ntawm ob lub chaw tso tes ntawd,

19 thiab muaj kaum ob tug tsov ntxhuav txawb rau ntawm rau theem ntaiv ntawd ob sab huvsi, ib theem ntaiv ib tug. Lub zwm txwv zoo li no mas tsis tau ua dua rau lwm lub tebchaws li.

20 Tej khob uas vajntxwv Xalaumoos siv haus dej mas puav leej xuas kub ua xwb, thiab tej twj siv hauv lub tsev Hav Zoov Lenpanoos huvsi puav leej yog xuas tseem kub ua xwb. Ncua sijhawm uas Xalaumoos nyob mas saib nyiaj yam li tsis muaj nqis abtsi li.

21 Rau qhov vajntxwv tej nkoj txwg nrog Hilas cov tibneeg mus rau lub moos Thasis. Mas Thasis cov nkoj yuav thauj kub, thauj nyiaj, thauj kaus ntxhw, thauj liab, thauj noog yaj yuam, peb xyoos tuaj ib zaug.

22 Yog li no mas vajntxwv Xalaumoos thiaj li muaj nyiaj nplua nuj thiab muaj lajlim tswv yim plab plaws ntau dua txhua tus vajntxwv uas nyob hauv ntiajteb no.

23 Txhua tus vajntxwv thoob ntiajteb xav tuaj cuag Xalaumoos, xav hnov nws tej tswvyim plab plaws uas (יחוח)Yahweh pub rau nws.

24 Txhua tus kuj coj tshav ntuj tuaj pub, yog tej uas xuas nyiaj xuas kub ua, tej tsoos tsho, tej cuab yeej ua rog, tej txuj lom, nees thiab luj txwv tuaj, niaj xyoo muaj li no.

25 Xalaumoos muaj plaub txhiab kem nkuaj rau nees thiab rau cov tsheb nees ua rog thiab muaj tub rog caij nees kaum ob txhiab leej uas nws kom ib txhia nyob rau hauv tej moos uas nws npaj rau tej tsheb nees ua rog thiab ib txhia nrog vajntxwv nyob hauv lub nroog Yeluxalees.

26 Xalaumoos kav tej vajntxwv huvsi, txij ntua tus dej Yufetis mus txog Filixatees tebchaws thiab txog ntawm teb chaws Iziv ciam teb.

27 Vajntxwv ua rau tej nyiaj uas nyob hauv lub nroog Yeluxalees muaj nqis ib yam li tej pob zeb xwb, thiab ua rau ntoo ciab muaj ntau yam nkaus li tej ntoo txiv cev hauv tej pov roob Sefelas.

28 Thiab lawv yuav nees hauv Iziv tebchaws thiab hauv txhua lub tebchaws los rau Xalaumoos.

​

Xalaumoos Tuag

(1 Vajntxwv 11:41-43)

29 Lwm yam haujlwm uas Xalaumoos ua thiab txhua yam uas nws ua txij thaum pib mus txog thaum kawg, twb muab sau cia rau hauv Nathas uas ua xibhwb cev (יחוח)Yahweh lus phau ntawv keeb kwm, thiab hauv phau ntawv uas sau (יחוח)Yahweh tej lus uas Ahiyah uas yog tibneeg hauv Silaus hais, thiab hauv phau ntawv uas sau tej lus uas Idaus tus uas hais pom tom hauv ntej, ua yog toog pom ntsig txog Nenpas tus tub Yelaunpau‑as lawm.

30 Xalaumoos nyob hauv Yeluxalees ua vajntxwv kav cov Ixayees huvsi tau plaub caug xyoo.  

31 Xalaumoos kuj tuag mus nrog nws tej poj koob yawm txwv nyob thiab lawv muab nws faus rau hauv nws txiv Daviv lub nroog, ces nws tus tub Lehaunpau‑as ua vajntxwv kav nyob nws chaw.