Xalaumoos Tej Haujlwm

(1 Vajntxwv 9:10-28)

1 Xalaumoos siv sijhawm nees nkaum xyoo ua tau (יחוח)Yahweh lub tuam tsev thiab ua tau nws lub tsev,

2 mas Xalaumoos mam li kho tej moos uas Hilas tau pub rau nws thiab kom cov Ixayees mus nyob rau hauv.

3 Xalaumoos mus rau lub moos Hama-xaunpas thiab txeeb tau lub moos ntawd.

4 Nws kho lub moos Thamaus hauv teb chaws moj sab qhua thiab kho tej moos khaws cuab txhiaj cuab tam cia rau hauv Hamas.

5 Nws kho lub moos Npe Hauloos pem roob thiab lub moos Npe Hauloos nram tiaj, ua ob lub moos ruaj khov muaj ntsa loog, muaj qhov rooj thiab muaj las rooj.  

6 Thiab ua lub moos Npa‑alas thiab ua txhua lub moos uas nws khaws cuab txhiaj cuab tam cia rau hauv, thiab ua tej moos uas nws khaws tej tsheb nees ua rog rau hauv, thiab ua tej moos uas nws cov tub rog caij nees nyob, thiab ua txhua yam uas Xalaumoos xav kom ua rau hauv lub nroog Yeluxalees thiab hauv tebchaws Lenpanoos thiab thoob plaws tej tebchaws uas Xalaumoos kav.  

7 Cov Hithais, cov Amaulais, cov Pelixais, cov Hivais thiab cov Yenpus uas tseem tshuav nyob, uas tsis yog tibneeg Ixayees,

8 mas cov tibneeg no cov noob uas tshuav nyob hauv lub tebchaws uas cov Ixayees tsis tau muab ua puam tsuaj tag ces Xalaumoos muab lawv yuam ua qhev los txog niaj hnub nimno.

9 Tiamsis cov tibneeg Ixayees mas Xalaumoos tsis yuam ua qhev. Lawv ua vajntxwv cov tub rog thiab ua nws cov nom tswv thiab ua thawj kav cov tsheb nees ua rog thiab ua nws cov tub rog uas caij nees.

10 Cov no yog vajntxwv Xalaumoos cov nom tswv uas ua hlob huvsi muaj ob puas tsib caug leej, yog cov uas saib cov pejxeem.  

11 Xalaumoos coj Falaus tus ntxhais ntawm Daviv lub nroog mus rau lub tsev uas nws tau ua rau Falaus tus ntxhais nyob, vim nws hais tias, kuv tus pojniam tsis tsim nyog nyob hauv Ixayees tus vajntxwv Daviv lub tsev, rau qhov txhua qhov chaw uas (יחוח)Yahweh lub phij xab tau nyob hauv, yog tej chaw uas dawb huv lawm.

12 Xalaumoos ua kevcai hlawv huvsi xyeem rau (יחוח)Yahweh saum (יחוח)Yahweh lub thaj uas nws tau ua rau ntawm leej qab khav ntawm lub tuam tsev.

13 Nws pheej xyeem raws li Mauxes tau hais tseg kom xyeem rau hnub Sabbath thiab hnub hli xiab thiab tej kevcai uas ib xyoo ua peb zaug, yog kevcai noj ncuav tsis xyaw keeb, kevcai xya lub chib so thiab kevcai nyob tsev pheeb suab.

14 Raws li nws txiv Daviv tau qhia tseg lawm mas nws thiaj tsa cov pov thawj ua tej pab ua (יחוח)Yahweh tes haujlwm, thiab tsa cov Levis kom ua lawv tes haujlwm hu nkauj qhuas thiab pab cov pov thawj ua haujlwm raws li uas niaj hnub twb teem cia lawm, thiab tsa cov uas zov tej rooj loog ua tej pab mus zov txhua lub rooj loog.  Rau qhov Daviv uas yog (יחוח)Yahweh tus tub qhe tau hais tseg li ntawd.

15 Lawv thiaj ua txhua yam raws li uas vajntxwv tau hais kom cov pov thawj thiab cov Levis ua uas ntsig txog txhua yam thiab ntsig txog tej txhab nyiaj huvsi.

16 Xalaumoos thiaj ua tau txhua yam tiav tag txij hnub uas pib ua (יחוח)Yahweh lub tuam tsev txog hnub uas ua tau tiav. Yog li no (יחוח)Yahweh lub tuam tsev thiaj li tiav tag huvsi.  

17 Xalaumoos txawm mus rau lub moos Exi‑oos Kenpaws thiab lub moos Elaus ntawm ntug dej Hiavtxwv Liab hauv teb chaws Edoos.

18 Hilas txib nws cov tub teg tub taws xa nkoj txwg thiab cov uas txawj tsav nkoj txwg mus rau Xalaumoos, mas lawv thiaj nrog Xalaumoos cov tub nkoj mus txog lub moos Aufis mus thauj tau kub nyhav plaub puas tsib caug talas qhov ntawd los rau vajntxwv Xalaumoos.