Xalaumoos Xyeem Lub Tuam Tsev Rau (יחוח)Yahweh

(1 Vajntxwv 8:62-66)

1 Thaum Xalaumoos thov tag, txawm muaj hluavtaws poob saum ntuj los kub tej qhov txhia chaw uas ua kevcai hlawv huvsi xyeem thiab tej tsiaj uas muab tua xyeem mas (יחוח)Yahweh lub hwjchim ci ntsa iab puv nkaus lub tuam tsev.

2 Cov pov thawj mus rau hauv (יחוח)Yahweh lub tuam tsev tsis tau, rau qhov (יחוח)Yahweh lub hwjchim ci ntsa iab puv nkaus nws lub tuam tsev.

3 Thaum cov Ixayees sawvdaws pom hluavtaws nqis los thiab pom (יחוח)Yahweh lub hwjchim ci ntsa iab saum lub tuam tsev, lawv khoov ntshis ua plhu ti nkaus cov lag zeb uas pua hauv av, thiab lawv pe hawm (יחוח)Yahweh thiab ua nws tsaug hais tias, (יחוח)Yahweh yog tus zoo, nws txojkev hlub ruaj khov nyob mus ib txhis tsis kawg.

4 Mas vajntxwv thiab cov pej xeem sawvdaws tua tsiaj xyeem rau ntawm

(יחוח)Yahweh xub ntiag.

5 Vajntxwv Xalaumoos muab nyuj 22,000 tus thiab yaj 120,000 tus tua xyeem.  Vajntxwv thiab cov pejxeem sawvdaws thiaj muab lub tuam tsev xyeem pub rau (יחוח)Yahweh li no.

6 Cov pov thawj nyias sawv ntawm nyias lub chaw thiab cov Levis kuj sawv ntsug tuav tej cuab yeej phim nkauj rau (יחוח)Yahweh uas vajntxwv Daviv tau npaj cia ua (יחוח)Yahweh tsaug uas siv rau thaum Daviv qhuas (יחוח)Yahweh hais tias, (יחוח)Yahweh txojkev hlub ruaj khov nyob mus ib txhis tsis kawg. Cov pov thawj tshuab raj nyob ncaj ntawm cov Levis xub ntiag.  Thiab cov Ixayees sawvdaws sawv ntsug.

7 Mas Xalaumoos ua kevcai tu lub plawv tshav puam uas ncaj ntawm lub qhov rooj tuam tsev kom dawb huv. Nws muab tsiaj ua kevcai hlawv huvsi xyeem thiab muab cov hlab hluas roj hlawv ua kevcai xyeem sib raug zoo rau qhov ntawd, vim lub thaj tooj liab uas Xalaumoos tau ua lawm, tsis txaus tso tej uas ua kevcai hlawv huvsi xyeem thiab tej uas ua kevcai xyeem qoob loo thiab tej hlab hluas roj.

8 Zaum ntawd Xalaumoos thiab ib tsoom Ixayees sawvdaws ua kevcai npaj noj haus xya hnub.  Muaj tibneeg coob heev tuaj txoos ua ke txij ntua ntawm txojkev uas mus rau lub moos Hamas mus txog ntua tus dej Iziv.

9 Mas hnub uas yim, lawv tuaj txoos ua ke caiv so, rau qhov lawv twb ua kevcai xyeem pub lub thaj rau (יחוח)Yahweh tau xya hnub thiab ua kevcai npaj noj haus xya hnub lawm.

10 Hnub tim nees nkaum peb, lub xya hli mas Xalau-moos tso cov pejxeem rov mus tsev. Lawv zoo siab thiab lub siab luag ntxhi, vim yog tej kev zoo uas (יחוח)Yahweh ua tshwm los rau Daviv thiab Xalaumoos thiab rau (יחוח)Yahweh haiv neeg Ixayees.

​

(יחוח)Yahweh Tshwm Rau Xalaumoos

(1 Vajntxwv 9:1-9)

11 Xalaumoos ua tau (יחוח)Yahweh lub tuam tsev thiab nws lub tsev tiav tag li no. Txhua yam uas Xalaumoos tau xav tseg tias yuav ua (יחוח)Yahweh lub tuam tsev thiab nws lub tsev mas nws ua tau tiav huvsi lawm.

12 Mas (יחוח)Yahweh los tshwm rau Xalaumoos thaum hmo ntuj thiab hais rau nws tias, kuv twb hnov koj tej lus thov lawm thiab kuv tau xaiv lub chaw no ua lub tsev uas tua tsiaj xyeem rau kuv.

13 Thaum kuv kaw rooj ntug tsis pub kom nag los, lossis kuv hais kom kooj txig los noj tej qoob loo hauv lub tebchaws lossis tso mob kis los rau hauv kuv haiv neeg,

14 mas yog kuv haiv neeg uas luag hu raws li kuv lub npe txo hwjchim thiab taij thov thiab nrhiav kuv thiab tig ntawm lawv tej kev txhaum, kuv yuav nyob saum ntuj mloog thiab yuav zam lawv lub txim thiab yuav kho lawv lub tebchaws kom zoo.

15 Kuv yuav tsa muag saib thiab tig ntsej mloog tej lus uas lawv thov ntawm lub chaw no.

16 Rau qhov nimno kuv tau xaiv thiab tu lub tuam tsev no kom dawb huv kom kuv lub npe thiaj nyob hauv ib txhiab ib txhis. Kuv lub qhov muag thiab kuv lub siab yuav nrog nraim lub chaw no mus ib txhis.

17 Hais txog koj, yog koj ua koj lub neej tab meeg kuv ib yam nkaus li koj txiv Daviv ua thiab ua txhua yam raws li uas kuv hais kom koj ua, thiab tuav rawv kuv tej kab ke thiab kuv tej kevcai,

18 mas kuv yuav tsa koj lub zwm txwv nyob ruaj khov raws li kuv tau cog lus tseg rau koj txiv Daviv lawm tias, tsis muaj ib hnub twg uas koj caj ces yuav tu ncua tus txivneej ua vajntxwv kav cov Ixayees li.

19 Tiamsis yog nej thim thiab muab kuv tej kab ke thiab kuv tej lus cob qhia uas kuv tau cob rau nej tso tseg, es nej mus ua koom tu thiab pe hawm luag tej dab, 20 mas kuv yuav muab nej rho kiag tawm ntawm lub tebchaws uas kuv tau muab rau nej, thiab kuv yuav muab lub tuam tsev uas kuv tu kom dawb huv rau kuv lub npe nyob lawd, laim pov tseg kom ploj ntawm kuv qhov muag.  Kuv yuav muab lub tuam tsev ua paj lug rau txhua haiv neeg hais tiag luag ncauj luag lo.  

21 Lub tuam tsev no uas zoo nkauj kawg mas txhua tus uas taug kev yuav xav tsis thoob thiab hais tias, ua cas (יחוח)Yahweh ua li ntawd rau lub tebchaws no thiab lub tuam tsev no?  

22 Ces luag yuav teb tias, vim yog lawv muab (יחוח)Yahweh uas yog lawv tej poj koob yawm txwv Tus Tswv uas coj lawv tawm hauv Iziv tebchaws los tso pov tseg, es mus tsawv nkaus luag tej dab los pe hawm thiab ua koom tu. Vim li no (יחוח)Yahweh thiaj coj tej xwm txheej phem no huvsi los raug lawv.