2 VAJ KEEB KWM 6

Xalaumoos Xyeem Pub Lub Tuam Tsev Rau (יחוח)Yahweh

(1 Vajntxwv 8:12-21)

1 Ces Xalaumoos txawm hais tias, (יחוח)Yahweh tau hais tias, nws yuav nyob hauv qhov tsaus ntuj nti.

2 Kuv tau ua lub tuam tsev zoo heev rau koj, yog lub chaw rau koj nyob mus ib txhis li.

3 Mas vajntxwv tig los foom koob hmoov rau ib tsoom Ixayees sawvdaws rau thaum lawv sawvdaws tseem sawv ntsug.

4 Nws hais tias, cia li qhuas (יחוח)Yahweh uas yog cov Ixayees Tus Tswv uas txhais tes ua tau tiav raws li tej lus uas cog tseg rau kuv txiv Daviv lawd, hais tias,

5 txij hnub uas kuv coj kuv haiv neeg tawm hauv Iziv tebchaws los, kuv tsis tau xaiv ib lub moos twg hauv cov xeem Ixayees sawvdaws cia ua lub tuam tsev rau kuv lub npe nyob, thiab kuv tsis tau xaiv ib tug txivneej twg los ua tus thawj kav kuv haiv neeg Ixayees.

6 Tiamsis nimno kuv tau xaiv Yeluxalees ua chaw rau kuv lub npe nyob thiab kuv tau xaiv Daviv ua tus kav kuv haiv neeg Ixayees.

7 Kuv txiv Daviv tau npaj siab cia tias yuav ua lub tuam tsev rau (יחוח)Yahweh uas yog Ixayees Tus Tswv lub npe nyob.

8 Tiamsis (יחוח)Yahweh hais rau kuv txiv Daviv tias, qhov uas koj npaj siab yuav ua lub tuam tsev rau kuv lub npe nyob ntawd koj twb ua zoo lawm.

9 Tiamsis koj tsis yog tus uas yuav ua lub tuam tsev. Koj tus tub uas yuav yug los yog tus uas yuav ua lub tuam tsev rau kuv lub npe nyob.

10 Nimno (יחוח)Yahweh twb ua rau tej lus uas nws cog tseg ntawd tiav lawm. Rau qhov kuv tau sawv los nyob kuv txiv Daviv chaw thiab nyob saum cov Ixayees lub zwm txwv raws li (יחוח)Yahweh tau cog lus tseg thiab kuv tau ua lub tuam tsev rau (יחוח)Yahweh uas yog cov Ixayees Tus Tswv lub npe nyob.  

11 Thiab qhov ntawd kuv tau tso lub phij xab uas ntim (יחוח)Yahweh tej lus uas nws cog tseg rau cov Ixayees.

​

Xalaumoos Tej Lub Thov

(1 Vajntxwv 8:22-53)

12 Mas Xalaumoos sawv ntsug ntawm (יחוח)Yahweh lub thaj xyeem sab xub ntiag tab meeg ib tsoom Ixayees sawvdaws, thiab nws tsa hlo nws ob txhais tes. 13 Xalaumoos tau muab tooj liab ua ib lub sam thiaj ntev tsib tshim, dav tsib tshim, siab peb tshim thiab tau muab txawb rau hauv lub tshav puam mas nws nyob saud. Nws txhos caug tab meeg ib tsoom Ixayees sawvdaws thiab tsa tes rau saum ntuj.

14 Mas nws hais tias, Au (יחוח)Yahweh uas yog Ixayees Tus Tswv, yeej tsis muaj ib tug timtswv twg zoo cuag li koj, tsis hais saum qaum ntuj thiab hauv ntiajteb. Koj ua raws li koj cog lus tseg thiab koj ua txojkev hlub uas ruaj khov tshwm rau koj cov tub qhe uas ua lawv lub neej raws li koj txojkev kawg siab kawg ntsws.

15 Koj tau ua rau kuv txiv Daviv uas yog koj tus tub qhe raws li tej lus uas koj twb cog tseg rau nws lawd. Koj lub qhov ncauj tau hais thiab koj txhais tes ua tiav rau hnub no.

16 Au (יחוח)Yahweh uas yog Ixayees Tus Tswv, yog li ntawd nimno thov koj ua raws li tej lus uas koj tau cog tseg rau kuv txiv Daviv uas yog koj tus tub qhe hais tias, yog koj tej tub ki ceev faj rau txhua txojkev uas lawv ua thiab coj raws li kuv txoj kevcai ib yam li koj, mas tsis muaj ib hnub twg uas koj caj ces yuav tu ncua tus txivneej uas nyob saum cov Ixayees lub zwm txwv tab meeg kuv.

17 Au (יחוח)Yahweh uas yog Ixayees Tus Tswv, tej lus uas koj tau hais tseg rau kuv txiv Daviv uas yog koj tus tub qhe mas thov koj ua kom tiav.

18 Mas (יחוח)Yahweh yuav nrog tibneeg nyob hauv lub ntiajteb lov? Saib maj, txawm yog saum nruab ntug thiab nruab ntug uas siab kawg nkaus los twb tsis txaus rau koj nyob. Mas lub tuam tsev uas kuv ua no yim huab tsis txaus rau koj nyob.

19 Thov koj saib rau koj tus tub qhe tej lus taij lus thov no. Au (יחוח)Yahweh uas yog kuv Tus Tswv, thov koj mloog kuv lub suab thiab tej lus taij thov uas koj tus tub qhe thov ntawm koj xub ntiag no,

20 xwv koj lub qhov muag thiaj saib ntsoov lub tuam tsev no nruab hnub hmo ntuj, yog lub chaw uas koj cog lus tseg tias koj yuav tso koj lub npe nyob hauv, koj thiaj li mloog tej lus thov uas koj tus tub qhe tig xubntiag rau lub chaw no thov.

21 Thiab thov koj mloog koj tus tub qhe thiab koj haiv neeg Ixayees tej lus taij thov rau thaum lawv tig xub ntiag rau lub chaw no thov. Koj nyob saum ntuj uas yog koj lub chaw nyob mas thov koj mloog. Thaum koj hnov lawd, thov koj zam txim.

22 Yog leejtwg tau ua txhaum rau nws kwvtij zej zog es yuav tau twv tsawm, thiab nws tuaj twv tsawm ntawm koj lub thaj xyeem hauv lub tuam tsev no,

23 mas thov koj nyob saum ntuj mloog thiab thov koj tu.  Thov koj txiav txim rau koj cov tub qhe ob tog, rau txim rau tus uas ua txhaum thiab coj tej uas nws ua ntawd rov poob rau saum nws taubhau.  Thiab tus uas tsis txhaum mas thov koj tsa kom nws muaj cai pauj qhov uas nws ua ncaj ncees.

24 Yog koj haiv neeg Ixayees swb lawv cov yeeb ncuab, rau qhov lawv tau ua txhaum rau koj, mas yog lawv tig rov los cuag koj thiab lees yuav koj lub npe thiab taij thov koj hauv lub tuam tsev no,

25 ces thov koj nyob saum ntuj mloog thiab zam koj haiv neeg Ixayees lub txim thiab coj lawv rov los rau hauv lub tebchaws uas koj tau pub rau lawv thiab lawv tej poj koob yawm txwv.

26 Thaum rooj ntug kaw thiab tsis muaj nag los, vim yog lawv tau ua txhaum rau koj, mas yog lawv tig xub ntiag rau lub chaw no thov thiab lees yuav koj lub npe thiab tig ntawm lawv tej kev txhaum rau thaum koj tsim txom lawv,

27 ces thov koj nyob saum ntuj mloog thiab thov koj zam koj cov tub qhe uas yog koj haiv neeg Ixayees lub txim. Thov koj qhia txoj kev zoo uas tsim nyog lawv taug rau lawv, thiab thov koj pub nag los rau hauv koj lub tebchaws uas koj tau pub ua qub txeeg qub teg rau koj haiv neeg.

28 Yog lub tebchaws raug kev tshaib nqhis, yog muaj mob kis lossis qoob loo nce hmob lossis tuaj pwm lossis muaj kooj muaj kab ntsig, lossis lawv cov yeeb ncuab tuaj vij lawv hauv lub moos twg, mas txawm yog muaj kev mob phem yam twg los kev mob kev nkeeg yam twg tshwm tuaj,

29 thiab txawm yog ib tug twg lossis koj haiv neeg Ixayees huvsi taij li cas thiab thov li cas, vim qhov uas nyias paub nyias kev txom nyem thiab nyias tej kev nyuaj siab es tsa tes ncaj rau lub tuam tsev no,

30 ces thov koj nyob saum ntuj uas yog koj lub chaw nyob mloog thiab zam txim thiab ua rau txhua tus uas koj twb paub hauv lawv lub siab, raws li lawv tau ua huvsi, rau qhov tsuas yog koj tib leeg xwb thiaj paub hauv tibneeg lub siab huvsi, 31 kom lawv thiaj hwm thiab paub ntshai koj thiab ua lawv lub neej raws li koj txojkev txhua hnub, txhua lub sijhawm uas lawv nyob hauv lub tebchaws uas koj tau pub rau peb tej poj koob yawm txwv.

32 Ib yam nkaus li ntawd, thaum lwm haiv neeg ib tug twg uas tsis yog koj haiv neeg Ixayees tuaj lwm lub tebchaws deb tuaj, vim yog hnov txog koj lub npe thiab koj txhais tes uas muaj hwjchim thiab koj txhais npab uas tsa hlo, mas thaum nws tuaj tig xub ntiag rau lub tuam tsev no thov,

33 ces thov koj nyob saum ntuj uas yog koj lub chaw nyob mloog thiab thov koj ua raws li txhua yam uas lwm haiv neeg tau thov rau koj, xwv txhua haiv neeg hauv ntiajteb thiaj paub koj lub npe thiab ntshai thiab hwm koj yam nkaus li koj haiv neeg Ixayees, thiab lawv thiaj paub tias lub tuam tsev uas kuv tau ua no, hu raws li koj lub npe.

34 Yog koj haiv neeg tawm mus ua rog rau lawv cov yeeb ncuab rau txojkev twg uas koj txib lawv mus, es lawv tig xub ntiag thov ncaj rau lub nroog no uas koj tau xaiv cia thiab tig xubntiag thov ncaj rau lub tuam tsev uas kuv tau ua rau koj lub npe nyob,

35 mas thov koj nyob saum ntuj mloog lawv tej lus taij lus thov thiab tuav lawv txojcai.

36 Yog lawv ua txhaum rau koj, vim tsis muaj ib tug twg uas tsis ua txhaum, es koj npau taws rau lawv, thiab muab lawv cob rau yeeb ncuab, lawv thiaj raug ntes coj mus rau yeeb ncuab lub tebchaws, tsis hais deb los ze,

37 yog lawv lub siab xam pom lawv tej kev txhaum rau hauv lub tebchaws uas lawv raug ntes coj mus ntawd thiab ntxeev dua siab thiab taij thov koj hauv lub tebchaws uas lawv nyob ntawd hais tias, peb tau ua txhaum thiab ua tsis ncaj thiab ua phem kawg li,

38 yog lawv ntxeev dua siab, kawg siab kawg ntsws, kawg tswvyim plab plaws hauv lub tebchaws uas lawv raug yeeb ncuab ntes coj mus nyob ntawd, thiab yog lawv tig xub ntiag rau lawv lub tebchaws uas koj pub rau lawv tej poj koob yawm txwv thov koj thiab tig xub ntiag rau lub nroog uas koj tau xaiv cia thiab lub tuam tsev uas kuv tau ua rau koj lub npe nyob no,

39 mas thov koj nyob saum ntuj uas yog koj lub chaw nyob mloog lawv tej lus taij lus thov thiab tuav lawv txojcai thiab zam koj haiv neeg lub txim uas lawv tau ua txhaum rau koj.

40 Au kuv Tus Tswv, nimno thov koj tsa koj lub qhov muag saib thiab thov koj tig ntsej mloog tej lus uas thov ntawm lub chaw no.

41 Au Txiv (יחוח)Yahweh, thov koj sawv tsees los rau hauv koj lub chaw so, koj thiab koj lub phij xab uas muaj koj lub hwjchim. Au Txiv (יחוח)Yahweh, thov kom koj txoj kev cawm dim nyob ntawm koj cov pov thawj, thiab cia koj cov tibneeg uas dawb huv zoo siab rau qhov koj ua zoo rau lawv.

42 Au Txiv (יחוח)Yahweh, thov tsis txhob tso tus uas koj hliv roj tsa lawd pov tseg. Thov koj nco ntsoov koj txojkev hlub ruaj khov uas koj muab rau koj tus tub qhe Daviv.