2 VAJNTXWV 25

1 Xyoo cuaj uas vajntxwv Nenpukhanexas kav hauv Npanpiloos, hnub xiab kaum lub kaum hli, nws coj nws cov tub rog huvsi tuaj ua rog rau Yeluxalees thiab vij lub nroog cia. Lawv tsub av vij puag ncig lub nroog.

2 Lub nroog thiaj raug vij mus txog xyoo kaum ib uas Xedekhiyah ua vajntxwv.

3 Hnub xiab cuaj lub plaub hlis, muaj kev tshaib nqhis loj heev hauv lub nroog, tsis muaj zaub mov abtsi li rau cov pejxeem noj.

4 Lub ntsa loog thiaj raug tsoo pob ib qho.  Txawm yog cov Kheedias nyob vij lub nroog los vajntxwv thiab cov tub rog sawvdaws khiav tawm hmo ntuj hla vajntxwv lub vaj tawm lub rooj loog taug txojkev uas muaj ob sab ntsa loog mus. Lawv txawm khiav yuav mus rau Alanpas.

5 Tiamsis Kheedias cov tub rog caum vajntxwv qab thiab caum cuag nws rau ntawm lub tiaj Yelikhaus, mas vajntxwv cov tub rog txawm khiav ua sab ua sua tag lawm.

6 Lawv thiaj ntes tau vajntxwv thiab coj nws mus cuag Npanpiloos tus vajntxwv ntawm lub moos Linplas, mas vajntxwv Npanpiloos txiav txim rau nws.

7 Lawv txawm tua Xedekhiyah cov tub tab meeg nws saib ntsoov, thiab muab Xedekhiyah ob lub qhov muag kaus pov tseg thiab muab saw hlau khi coj nws mus rau Npanpiloos.  

8 Hnub xiab xya lub tsib hlis, yog xyoo kaum cuaj uas Nenpukhanexas ua vajntxwv kav hauv Npanpiloos, mas Nenpuxaladas uas yog tus thawj rog uas zov vajntxwv, thiab yog Npanpiloos tus vajntxwv ib tug tub teg tub taws, tau tuaj rau ntawm Yeluxalees.

9 Nws muab (יחוח)Yahweh lub tuam tsev thiab vajntxwv lub tsev thiab tej tsev hauv Yeluxalees huvsi hlawv pov tseg.  Nws hlawv tej tsev loj txhua lub kub nyhiab tag huvsi.

10 Thiab cov tub rog Kheedias sawvdaws uas nrog tus thawj rog zov vajntxwv ua ke kuj tsoo tej ntsa loog Yeluxalees pob tag huvsi.

11 Mas Nenpuxaladas uas yog tus thawj rog zov vajntxwv muab cov tibneeg uas tseem tshuav nyob hauv lub nroog thiab cov uas khiav mus zwm rau Npanpiloos tus vajntxwv thiab cov pejxeem sawvdaws kuav kiag tawm tebchaws mus lawm.

12 Tiamsis tus thawj rog uas zov vajntxwv tseg cov tibneeg uas pluag pluag heev hauv lub tebchaws ib txhia nyob tu vaj txiv hmab thiab laij teb.

13 Tej ncej tooj liab uas nyob hauv (יחוח)Yahweh lub tuam tsev thiab tej tsheb thawb dej thiab lub rhawv dej tooj liab uas nyob hauv (יחוח)Yahweh lub tuam tsev, mas cov Kheedias muab tsoo ua tej dwb daim thiab coj tej tooj liab mus rau Npanpiloos.

14 Lawv kuj coj tej lauj kaub, tej duav phuaj, tej tais khwb teeb xeeb, thiab tej tais rau hmoov tshuaj tsw qab thiab tej twj taig tooj liab txhua yam uas siv hauv lub tuam tsev,

15 thiab tej duav hlau yawm ncaig taws thiab tej phaj. Tej uas xuas kub ua mas tus thawj rog uas zov vajntxwv coj mus yuav ua kub, tej uas xuas nyiaj ua nws coj mus yuav ua nyiaj.

16 Tej tooj liab uas ua ob tug ncej, thiab lub rhawv dej thiab tej tsheb thawb dej uas Xalaumoos ua cia rau hauv (יחוח)Yahweh lub tuam tsev, nyhav dhau lawm thiaj luj tsis tag.

17 Ib tug ncej siab kaum yim tshim, muaj lub hau ncej tooj liab txawb rau saud, lub hau ncej siab peb tshim.  Muaj ib daim ntxais qhov muag tooj liab thiab tej lub txiv ntsiav kws tooj liab, nyob puag ncig lub hau ncej. Tus ncej uas ob kuj zoo ib yam nkaus thiab muaj daim ntxais qhov muag.

18 Tus thawj rog uas zov vajntxwv kuj ntes Xelayah uas yog tus tuam pov thawj hlob thiab Xefaniyah uas yog pov thawj yau thiab peb tug uas zov qhov rooj

tuam tsev.

19 Ntawm lub nroog nws kuj ntes ib tug thawj rog uas saib xyuas cov tub rog thiab tsib tug uas ua vajntxwv lub chaw sablaj uas tseem nyob hauv lub nroog, thiab ntes tus tub sau ntawv ntawm tus thawj rog uas txhij tub rog thoob tebchaws, thiab ntes cov pej xeem rau caum leej uas tseem nyob hauv lub nroog.

20 Nenpuxaladas uas ua tus thawj rog zov vajntxwv ntes cov tibneeg no coj los txog ntawm vajntxwv Npanpiloos hauv lub moos Linplas.

21 Mas Npanpiloos tus vajntxwv muab lawv nplawm thiab muab lawv tua pov tseg rau ntawm lub moos Linplas hauv Hamas tebchaws. Yahdah thiaj raug muab ntes kuav tawm hauv nws lub tebchaws mus lawm.

​

Kedaliyah Kav Yahdah Tebchaws

(Yeremyah 40:7-9, 41:1-3)

22 Nenpukhanexas tsa Kedaliyah uas yog Ahikhas tus tub thiab yog Safas tus xeeb ntxwv ua tus kav cov tibneeg uas tseem tshuav nyob hauv lub tebchaws, yog cov uas Npanpiloos tus vajntxwv tseg cia nyob.

23 Thaum cov thawj uas kav tub rog thiab lawv cov tub rog tau hnov tias Npanpiloos tus vajntxwv tsa Kedaliyah ua tus kav tebchaws, lawv thiab lawv cov tub rog txawm tuaj cuag Kedaliyah rau ntawm lub moos Mixapas. Lawv cov ntawd yog Nethaniyah tus tub Yisama‑ees thiab Khale‑as ob tug tub Yah-kanas thiab Yahnathas, thiab Thahumes tus tub Xelayah uas yog tibneeg hauv lub moos Nethaufas, thiab Ya‑axaniyah uas yog tibneeg hauv Ma‑akhas tus tub.  

24 Mas Kedaliyah cog lus twv rau lawv thiab lawv cov tibneeg hais tias, nej tsis txhob ntshai Kheedias cov tub teg tub taws. Cia li nyob hauv lub tebchaws no thiab tu vajntxwv Npanpiloos ces nej yuav tau noj qab nyob zoo.

25 Lub xya hli, Nethaniyah tus tub Yisama‑ees uas yog Elisamas tus xeeb ntxwv thiab yog keeb vajntxwv, coj kaum leej nrog nws tuaj ntaus thiab tua Kedaliyah thiab cov tibneeg Yahdah thiab cov Kheedias uas nrog nws nyob ntawm Mixapas tuag tag.

26 Ces cov pejxeem ntawd tag nrho cov uas ua hlob thiab cov yau sawvdaws thiab cov thawj rog sawv kev tsees mus rau Iziv tebchaws, rau qhov lawv ntshai cov Kheedias.

​

Tso Yahyakhees Dim Hauv Tsev Lojfaj

(Yeremyah 52:31-34)

27 Thaum Yahdah tus vajntxwv Yahyakhees poob tebchaws tau peb caug xya xyoo mas hnub tim nees nkaum tsib lub kaum ob hlis, rau xyoo uas Evimelaudas pib ua vajntxwv kav hauv Npanpiloos, Evimelaudas zoo siab tso Yahdah tus vajntxwv Yahyakhees dim hauv tsev lojfaj.

28 Nws hais zoo rau Yayakhees thiab pub nws nyob lub rooj siab dua tej vajntxwv uas nrog nws nyob hauv Npanpiloos txhua tus.

29 Yayakhees txawm hle cev tsoos tsho raug txim, thiab nws niaj hnub tau nrog vajntxwv koom rooj noj mov mus tag sim neej.

30 Vajntxwv pheej niaj hnub pub qhov txhia chaw tsis tu ncua rau Yahyakhees mus tag Yahyakhees sim neej.