(יחוח)Yahweh  Kev Teem Txim

1 Kuv pom (יחוח)Yahweh  sawv ntawm lub thaj xyeem ib sab thiab nws hais tias, cia li ntaus tej hau ncej ua kom tej taw rooj ua zog koog, thiab cia li muab lov ua tej dwb daim poob rau saum cov pejxeem sawvdaws taubhau. Cov uas tseem tshuav nyob, kuv yuav xuas ntaj tua pov tseg, yuav tsis muaj ib tug twg khiav mus tau, yuav tsis dim ib tug kiag li.

2 Txawm yog lawv khawb mus txog tub tuag teb los kuv txhais tes yuav ntes lawv qhov ntawd los. Txawm yog lawv nce mus txog saum ntuj, los kuv yuav coj lawv nqes qhov ntawd los.

3 Txawm yog lawv khiav nkaum rau saum lub ncov roob Khamees, los kuv yuav nrhiav lawv thiab ntes lawv qhov ntawd los. Txawm yog lawv khiav nkaum rau hauv qab thu hiavtxwv kom dhau kuv qhov muag, los kuv yuav hais rau tus zaj uas nyob hauv kom tom lawv.

4 Txawm yog lawv raug ntes coj mus rau ntawm yeeb ncuab xubntiag lawm, los kuv yuav txib tej hniav ntaj hniav riam tua lawv qhov ntawd. Kuv yuav tsom ntsoov saib lawv rau qhov phem, tsis yog saib rau qhov zoo.

5 (יחוח)Yahweh  uas muaj hwjchim loj kawg nkaus, nws kov lub ntiajteb mas lub ntiajteb yaj ntshis tag, thiab txhua tus uas nyob hauv yuav quaj ntsuag. Lub ntiajteb phwj tuaj yam li tus dej Nais, thiab rov nqeg ib yam li tus dej Nais hauv Iziv tebchaws.

6 Tus uas tsim nws lub chaw nyob rau txheej saum ntuj, thiab tsim lub ntuj khwb lub ntiajteb, yog tus uas hu dej hiavtxwv tawm tuaj thiab muab hliv rau saum lub ntiajteb, nws lub npe hu ua (יחוח)Yahweh .

7 (יחוח)Yahweh  hais tias, cov Ixayees es, nej tsis thooj li cov tibneeg Khuj rau kuv lov? Kuv tsis coj cov Ixayees tawm hauv Iziv tebchaws los lov, thiab tsis tau coj cov Filixatees tawm hauv Kathaus tebchaws thiab cov Alas tawm hauv Khis tebchaws los lov?

8 Saib nawj, (יחוח)Yahweh  lub qhov muag saib ntsoov lub tebchaws uas ua txhaum muaj txim. Kuv yuav muab lub tebchaws ntawd rhuav tshem kom ploj ntais hauv lub ntiajteb mus, tiamsis kuv yuav tsis rhuav tshem Yakhauj caj ces kom tu noob nrho. (יחוח)Yahweh  hais li no ntag.

9 Kuv yuav hais thiab kuv yuav tshau cov Ixayees hauv nruab nrab ib tsoom tebchaws sawvdaws ib yam li muab vab tshaus los tshau, tiamsis tsis muaj ib lub qe zeb yuav poob rau hauv av.

10 Kuv haiv neeg uas ua txhaum txhua tus yuav tuag tag rau hniav ntaj, lawv yog cov uas hais tias, kev phem yuav caum tsis cuag thiab tsis raug peb.

​

Cov Ixayees Yuav Rov Vam Meej Li Qub

11 Hnub ntawd kuv yuav tsa Daviv lub tsev ntaub uas vau lawd sawv dua tshiab, thiab kho tej ntu uas tawg thiab tsa tej uas pob tag ua tej niag pawg dua tshiab, thiab tsim dua tshiab kom zoo yam li yav thaum ub.

12 Lawv thiaj li txeeb tau tej uas tshuav hauv Edoos tebchaws thiab hauv txhua lub tebchaws uas hu raws li kuv lub npe los ua lawv teej lawv tug. (יחוח)Yahweh  uas yuav ua tej no hais li no ntag.

13 (יחוח)Yahweh  hais tias, saib maj, lub caij lub nyoog tabtom los mas tus uas laij teb, yuav laij yeej tus uas hlais, thiab tus uas tsuam kua txiv hmab, yuav tsuam yeej tus uas cog noob txiv hmab. Tej cawv txiv hmab qab zib yuav nrog saum tej roob los, thiab yuav ntws saum tej pov roob huvsi los.

14 Kuv yuav pub kuv haiv neeg Ixayees rov vam meej li qub. Lawv yuav tsim tej moos uas pob tag dua tshiab thiab nyob rau hauv, lawv yuav cog vaj txiv hmab thiab tau cawv txiv hmab los haus, lawv yuav cog vaj txiv ntoo thiab tau noj tej txiv ntawd.

15 Kuv yuav cog lawv rau hauv lawv lub tebchaws, lawv yuav tsis raug muab dob tawm hauv lub tebchaws uas kuv twb pub rau lawv dua li lawm. Nej Tus Tswv, (יחוח)Yahweh  hais li no ntag.